Damoma Vwo Aruẹ Iroro ri Jehova Ọrhẹ Jesu i Vwori

1-2. Me yẹ ẹgwọlọ re vwo kpahen i Jehova o surhobọmwu, marhẹ i Jesu o ru djeyi phia?

“WU NE vi vwo ẹgwọlọ kpahen i Jehova Osolobrugwẹ ọnọ rhẹ ọsoso ọmuduo ọrhẹ ọsoso arhọ ọnọ ọrhẹ ọsoso omẹgbanhuọn ọrhẹ ọsoso ẹhẹn ọnọ.” (Luke 10:27) Jesu ọ tare taghene ọnana yẹ urhi rọ mai ghanren uvuẹn Urhi Moses. Djokarhọ taghene ẹgwọlọ re vwo kpahen i Jehova o surhobọmwu ọmudu ọwan, ojemẹ, oborẹ e roro kpahan, ọrhẹ oborẹ e ruẹ ekwakwa lele. O ji sekpahen ẹga ro nẹ ẹhẹn rhe ra ha rẹn i Jehova—omaran ji te omẹgbanhon ọwan. Habaye, ẹgwọlọ re vwo kpahen i Jehova o ji sekpahen ọmudu ọrhẹ iroro ọwan. Itiọrurhomẹmro, a sabu vwẹruọ iroro i Jehova ephia-an. Ọrẹn, ana sabu vwẹruọ iroro Osolobrugwẹ nyoma re ne yono kpahen “iroro i Kristi,” fọkime Jesu o vwo aruẹ iroro Ọsẹ ye.—1 Cor. 2:16 ẹmro re dje fiotọre “ọwan i vwo iroro i Kristi.”

² Jesu o vwo ẹgwọlọ kpahen Jehova rhẹ ọsoso ẹhẹn yen. O rhe oborẹ Jehova ọ gwọlọre no ru, o ji vwo omwemẹ ro no ruie, dedevwo o rheri taghene ọnọ rioja. Fọkime Jesu ọ tẹnrovi ọhọre Ọsẹ ye ro no ruo, ọ ha uphẹn rẹn emru owuorowu ja lẹrhiẹ ru ọhọre Ọsẹ ye-e.

3. Me yẹ ọnyikọ Peter o yono mie i Jesu, urhebro ọgo yi Peter ọ yẹ Ilele Kristi? (1 Peter 4:1)

³ Peter ọrhẹ inyikọ ri hẹrhẹre i vwo uphẹn aye e leli Jesu ghwọghọ ọke kugbe ji yono mie yi. Ọke ẹhẹn ọfuanfon na o mwu i Peter ya ileta ọrukaro, nọ ha urhebro rẹn Ilele Kristi nẹ aye i vwo aruẹ iroro ọrẹ i Kristi.a (Se 1 Peter 4:1.) Peter ọ ha ẹmro isodja a ha ruiruo ba ileta ye, rọ tare: ‘Are i mwuegbe oma are.’ Omarana, Ilele Kristi i rha hẹrokele aruẹ iroro i Jesu, yanghene oborẹ o ruẹ ekwakwa lele, ọnọ ha userhumu rẹn aye wọnrọn haso akpọ rẹ Echu o suẹn ọrhẹ ẹhẹn aye ine ruẹ ọdandan.—2 Cor. 10:​3-5; Eph. 6:12.

4. Marhẹ urhomu-ẹmro ọnana ono ru ha userhumu rẹn ọwan ha urhebro i Peter ruiruo?

⁴ Ene yono kpahen aruẹ iroro i Jesu ọrhẹ oborẹ ene ru hẹrokelie. Ene ji yono kpahen oborẹ ene ru (1) vwo aruẹ iroro i Jehova, rọ nọ ha userhumu rẹn ọwan vwo aruẹ iroro owu, (2) vwo uruemru omeriotọre, ọrhẹ (3) vwo iroro rọ gbare nyoma ra na hẹroso i Jehova ọrẹ ẹrhomo.

VWO ARUẸ IRORO I JEHOVA

5. Erhirhiẹ ọgo yi Peter o vwo vwo aruẹ iroro Jehova?

⁵ Roro kpahen erhirhiẹ owu ọke i Peter ọ vwọ ha iroro i Jehova ruiruo. Jesu ọ ta rẹn inyikọ ye taghene ono riẹ i Jerusalem, ji rioja ekwakwa buebun nẹ abọ ilori ẹga na, ene ji kpe yi hwu. (Matt. 16:21) Ọ bẹnren ri Peter ono kwerhọ oborẹ i Jesu ọ tare—ro rhiẹ Messiah re vive kpahen na ọrhẹ ọrẹ ono simi Israel. (Matt. 16:16) Omarana, Peter no se i Jesu riẹ okokọ ji ta riẹn: “Ọrovwori, gbe arodọmẹ rẹn oma; ekwakwa enana i phia wẹ-ẹn.” (Matt. 16:22) Fọkime Peter o dje iroro i Jehova phia-a, iroro yi orho serhọ rhẹ ọrẹ i Jesu-u.

6. Izede ọgo yi Jesu o ru djephia taghene iroro yi o serhọ rhẹ ọrẹ i Jehova?

⁶ Iroro i Jesu ọ dabu serhọ rhẹ iroro Ọsẹ ye obẹ odjuwu. Jesu nọ ta rẹn Peter: “Riẹ oberhumu mẹ, Echu! Wẹwẹ ọgbanrhọ ha mẹ, fọkime we roro iroro ituakpọ, ukperẹ ono rhiẹ iroro Osolobrugwẹ.” (Matt. 16:23) Peter o vwo iroro ro serhọ ro mwurien ta omaran, ọrẹn, Jesu ọ tiẹn urhebro i Peter. O vwo oborẹ ana sabu yono nie rhe. Jehova ọ gwọlọ nẹ i Jesu ọ hatua ojemẹ omobọ-ọ. Uvuẹn erhirhiẹ ọrana, Peter no yono oborẹ ọ ghanren te re ne vwo aruẹ iroro Osolobrugwẹ.

7. Marhẹ i Peter o ru djephia taghene ọ gwọlọ vwo aruẹ iroro i Jehova ọke oru? (Ni ifoto ọbe na.)

⁷ Itiọrurhomẹmro, Peter no djephia taghene ọ gwọlọ vwo aruẹ iroro Osolobrugwẹ. Vwana, o te ọke Ihworho Egbamwa na ine rhiẹ usuẹn ihworho Osolobrugwẹ ne. Ne dje i Peter ye ghwoghwo rẹn Cornelius ro rhiẹ Ohworho Agbamwa na, ro ji rhiẹ usuẹn ihworho erukaro ri na ghwẹriẹ rhiẹ Ilele Kristi. Itu i Jew ọrhẹ Ihworho Egbamwa na i vwe ruẹ kugbe-e, omarana, Peter ọ gwọlọ userhumu nọ sabu wian owian ra yẹriẹ na. Ọke i Peter o vwẹruọ iroro Osolobrugwẹ kpahen erhirhiẹ na, no wene iroro yi. Omarana, ọke re dje ihworho me seyi, nọ “nyaren ogege.” (Acts 10:​28, 29) No ghwoghwo rẹn Cornelius ọrhẹ ekruien, aye ni bromarhame.—Acts 10:​21-23, 34, 35, 44-48.

8. Marhẹ ene ru djephia taghene iroro ọwan o serhọ rhẹ ọrẹ i Jehova? (1 Peter 3:8 ọrhẹ ekete ra djokarhọ)

⁸ Ẹgbukpe buebun a vrẹn, Peter nọ ha urhebro rẹn Ilele Kristi na nẹ aye i vwo “aruẹ iroro owu.” (Se 1 Peter 3:8 ọrhẹ ekete ra djokarhọ.) Arha hẹrokele i Jehova, na na sabu vwo aruẹ iroro owu jerẹ oborẹ ọ ha uvuẹn i Baibol. Jerẹ udje, Jesu o jiririe rẹn idibo yi nẹ aye i ha Uvie na karo uvuẹn akpenyerẹn aye. (Matt. 6:33) Fọkiẹ ọnana, oghwoghwẹmro uvuẹn ukoko ọnọ, ọnọ sabu brorhiẹn ro no vwobọrhọ owian Uvie na vuọnvuọn. Ukperẹ ene kpe ẹhẹn yen riotọre, o fori na hobọtua ye.

VWO OMERIOTỌRE

9-10. Marhẹ i Jesu o ru dje uruemru omeriotọre phia?

⁹ Uvuẹn ason e ki kpe i Jesu, no yono i Peter ọrhẹ inyikọ ri hẹrhẹre oborẹ ọ ghanren te aye ine vwo uruemru omeriotọre. Jesu no dje i Peter ọrhẹ John nẹ aye i mwuegbe emaren rọ kẹta ro no lele aye re kugbe bọmọke ono ki hwu. Ọkezẹko, aye yi ji mwuegbe itọwẹli ọrhẹ oze rẹ idibo ri hẹrhẹre ine ghwe aghwẹ rhọ, bọmọke aye ina ki riẹ emaren na. Ọrẹn, ọrọmo yọ nọ homariotọre ghwe aghwẹ aye?

¹⁰ Ogege, Jesu no dje uruemru omeriotọre phia. Ọnana o gbe inyikọ na unu omamọ, fọkime ọnana owian ọvrẹn. Jesu no kuẹ ewun otafiẹ nu, nọ ha itọwẹli ji gba ye mwu ugbewuien, no rhie ame rhẹ oze na, nọ tuẹn aghwẹ idibo yi eghwe rhọ. (John 13:​4, 5) Owian ro no ghwe aghwẹ inyikọ ye awan 12 na ọnọ ha ọke omamọ—Judas rọ nọ rhẹ ye na ọ ji ha usuẹn aye. Udabọ ọrana, Jesu ọ homariotọre ghwe aghwẹ aye ephian. Ọke oru, Jesu nọ dabu djeyi fiotọre rẹn aye: “Are i vwẹruọ oborẹ mi ru rẹn are na? Are e se mẹ ‘Oyono’ ọrhẹ ‘Ọrovwori,’ ẹmro are ọ gbare fọkime omaran mi ghini havwọ. Omarana, orhianẹ mẹmẹ ro rhiẹ Ọrovwori ọrhẹ Oyono o ghwe aghwẹ are, no ji fo nẹ are i ghwe aghwẹ owuowọnwan.”—John 13:​12-14.

11. Marhẹ i Peter o ru djephia taghene o vwo uruemru omeriotọre ne? (1 Peter 5:5) (Ji ni ifoto na.)

¹¹ Peter o yono nẹ uruemru omeriotọre i Jesu. Ọke i Jesu ọ ghwẹrioma riẹ odjuwu hin, Peter no ruẹ igbevwunu nyoma ro simi ọhworhare owu ro rhiẹ ukpolo nẹ evwan rhe. (Acts 1:​8, 9; 3:​2, 6-8) Itiọrurhomẹmro, otu buebun i mẹrẹn igbevwunu ọnana. (Acts 3:11) Peter ọ ha ujiri na rẹn omayen ji vwonma jerẹ oborẹ awọrọ ọke ọrana e ruẹ? Ẹjo, ukpomaran ọ ha ujiri na vwe Jehova ọrhẹ i Jesu, nyoma rọ ta: “Nyoma odẹ [i Jesu] ọrhẹ esegburhomẹmro ame i vwo kpahen odẹ na, yi mia sabu simi ọhworhare ọnana rẹ are a mẹrẹn na.” (Acts 3:​12-16) Ẹmro ri Peter ọ ha ruiruo uvuẹn ileta rọ ya vwe Ilele Kristi, ọ ta kpahen ọghanronmẹ re ne vwo uruemru omeriotọre, rọ nọ sabu karorhọ ọwan kpahen ọke ri Jesu ọ ha itọwẹli gba ugbewuien, ji ghwe aghwẹ inyikọ na.—Se 1 Peter 5:5.

12. Marhẹ ene ru hẹrokele i Peter vwo uruemru omeriotọre ọke ephian?

¹² Ana sabu hẹrokele udje i Peter, nyoma re ne vwo uruemru omeriotọre. Karorhọ taghene ne vwo uruemru omeriotọre ọ ghwẹ ọrẹ ana ghwai tẹmro ri serhọ. Ẹmro na “omeriotọre” ri Peter ọ ha ruiruo, o ji sekpahen ukẹro ra ha ni oma ọwan ọrhẹ awọrọ. Ọwan a ha userhumu rẹn awọrọ fọkime e vwo ẹgwọlọ kpahen Jehova ọrhẹ ihworho, orhiẹ fọkiẹ ujiri ra na yẹ ọwa-an. Arha ga i Jehova rhẹ omamerhomẹ, ji ruẹ ekete omẹgbanhon ọwan o teri rẹn imizu ukoko na, yo no djephia taghene e vwo uruemru omeriotọre, ọrhọ tobọ rhianẹ awọrọ i vwa djokarhọ omẹdamu ọwa-an.—Matt. 6:​1-4.

VWO “IRORO RỌ GBARE”

13. Dje oborẹ o mevirhọ ne “vwo iroro rọ gbare.”

¹³ Me yo mevirhọ ne “vwo iroro rọ gbare”? (1 Pet. 4:7) Olele Kristi ro vwo iroro rọ gbare ọ nekpẹn ọkpọvi mie i Jehova, bọmọke o ki brorhiẹn. Olele Kristi ọrana, o rheri taghene onyerẹnkugbe yi ọrhẹ ọrẹ i Jehova yọ mai ghanren. Ọ ha ukẹro ro serhọ ni omayen, fọkime o rheri taghene o vwo ekete rọ vwiẹlẹ. O djephia ọke ephian taghene ọ hẹroso Osolobrugwẹ nyoma rọ nẹrhomo vwe yi.b

14. Erhirhiẹ ọgo yi Peter ọ vwọ hẹroso i Jehova?

¹⁴ Uvuẹn ason rọ kẹta i Jesu o ki hwu, nọ ha orhetio rẹn idibo yi: “Are ephian ina kproghwẹ fọkiẹ oborẹ ọnọ phia mẹ ason ọnana.” Peter nọ tare rhẹ uduefigbere: “Ọrhọ tobọ rhianẹ eri hẹrhẹre na ina kproghwẹ fọkiẹ oborẹ ọnọ phia wẹn, mẹmẹ i kproghwẹ dẹ-ẹ!” Uvuẹn ason ọrana, Jesu nọ ha urhebro rẹn idibo yi ezẹko: “Are i rha dẹrẹ ji rha nẹrhomo ọke ephian.” (Matt. 26:​31, 33, 41) Orhianẹ i Peter ọ nyalele urhebro ọrana bi, manẹ ọ sabu fiudugbere kwe taghene ọye odibo i Jesu. Ukpomaran, Peter nọ tiẹn Oninie, rọ lẹrheriẹ vioja ọke oru.—Matt. 26:​69-75.

15. Marhẹ i Jesu o ru djephia taghene o vwo iroro rọ gbare uvuẹn ason rọ kẹta o ki hwu?

¹⁵ Jesu ọ dabu hẹroso i Jehova. Dedevwo Jesu ohworho rọ gbare, ọ ji nẹrhomo ọke ephian. Ọrana yọ yẹriẹ uduefigbere sabu ruẹ ọhọre i Jehova. (Matt. 26:​39, 42, 44; John 18:​4, 5) Itiọrurhomẹmro, ẹrhomo i Jesu ọ nẹren ọke ephian ọ sẹrẹ i Peter ẹro-o.

16. Marhẹ i Peter o ru djephia taghene o vwo iroro rọ gbare? (1 Peter 4:7)

¹⁶ Ọke oru, Peter nọ dabu hẹroso i Jehova omamọ nyoma rọ nẹrhomo ọke ephian. Jesu ra rhọmọnuhwu, nọ yẹ i Peter ọrhẹ inyikọ ri hẹrhẹre na imwẹro taghene, ene tiobọnu ẹhẹn ọfuanfon rẹn aye nẹ aye i sabu wian owian aghwoghwo na. Habaye, Jesu nọ ji ta taghene aye i daji uvuẹn i Jerusalem bọmọke oborẹ ọ ta rẹn aye ono ki rugba. (Luke 24:49; Acts 1:​4, 5) Me yi Peter o ruru uvwrọke rọ hẹrhẹ? Peter ọrhẹ Ilele Kristi ri hẹrhẹ “ne gbromarhọ ẹrhomo ẹnẹ.” (Acts 1:​13, 14) Ọke oru, uvuẹn ileta ọrukaro ri Peter ọ yare, nọ ha urhebro rẹn Ilele Kristi ri hẹrhẹre nẹ aye i vwo iroro rọ gbare ji hẹroso i Jehova ọke ephian nyoma ẹrhomo. (Se 1 Peter 4:7.) Vwana, Peter no yono oborẹ ọ ghanren te nọ hẹroso i Jehova, ji rhiẹ usimo rẹn ukoko na.—Gal. 2:9.

17. Udabọ ena re vwori, me yo fori ne rhe ruẹ? (Ji ni ifoto na.)

¹⁷ Na sabu vwo iroro rọ gbare, ana vi rha nẹrhomo vwe i Jehova. O fori na karorhọ taghene ana rha nẹrhomo vwe i Jehova, o toro ena re vwori-i. Omarana, bọmọke ene ki brorhiẹn eghoghanren, o fori na nẹrhomo vwe i Jehova, ji hẹrosuiẹ taghene ọye yọ mai rhe oborẹ oserhọ rẹn ọwan.

18. Marhẹ ene ru vwo aruẹ iroro i Jehova ọke ra gwọlọ brorhiẹn?

¹⁸ Ọ merhoma omamọ taghene Jehova ọ marẹn ọwan na sabu hẹrokele iruemruie. (Gen. 1:26) Itiọrurhomẹmro, e rheri taghene a sabu hẹrokele i Jehova gbagba-a. (Isa. 55:9) Ọrẹn jerẹ i Peter, ana sabu djephia taghene a gwọlọ vwo aruẹ iroro i Jehova. Omarana, jena rha damoma vwo aruẹ iroro Osolobrugwẹ, omeriotọre, ọrhẹ iroro rọ gbare.