Hẹrokele Oruru i Jesu Kpahen Owian Aghwoghwo na

1. Uruemru ọgo yọ lẹrhẹ idibo i Jehova vẹnẹ awọrọ uvuẹn akpọ na?

EMRU owu rọ lẹrhẹ idibo i Jehova vẹnẹ awọrọ ra gemai ruẹ taghene aye Ilele Kristi, yẹ orurua aye i vwo kpahen owian aghwoghwo na. (Titus 2:14) Ọrẹn, ọkezẹko oruru wu vwo kpahen owian aghwoghwo na ọnọ sabu seriotọre. Erhirhiẹ na ọnọ sabu họhọ ọrẹ ọkpako ukoko owu rọ tare, “Ọkezẹko, oma ọ vwọ kpare mẹ mi ne ghwoghwo-o.”

2. Me yọ nọ sabu lẹrhiẹ bẹn ra na sẹrorẹ oruru ọwan kpahen owian aghwoghwo na?

² Oma ọnọ sabu rha merhen ọwan re ne vwobọrhọ ewian erọrọ uvuẹn ukoko na, ghwẹ ọke ra wian owian aghwoghwo na. Mesoriẹ? Fọkime erhe vwobọrhọ owian ebanbọn ọrhẹ ẹruete Aghwẹlẹ Uvie, hobọtua imizu rẹ oghwọghọ kpregede ọ phia riẹn, yanghene ha urhebro rẹn imizu ukoko na, ọwan na mẹrẹn erere na ogege. Habaye erhe lele imizu ukoko na wian kugbe, oma nọ merhen ọwan fọkime e rheri taghene aye i vwo ọdaremẹro kpahen oborẹ e ru rẹn aye. Ọrẹn, ọkezẹko udabọ omẹdamu ọwan uvuẹn owian aghwoghwo na ẹgbukpe buebun, o vwo ọrọ ghwẹriẹ ne-e. Yanghene ana sabu vwa ihworho ra tiẹn urhomu re ghwoghwo. Ọwan i ji rhe taghene rẹ oba na o tiẹkẹrẹ ne na, ẹkparehaso ọnọ gbanhonrhọ. (Matt. 10:22) Me yọ nọ ha userhumu rẹn ọwan sẹrorẹ oruru ọwan ji ruie gbanhonrhọ?

3. Me yẹ udje rọ ha uvuẹn Luke 13:​6-9 o yonirin ọwan kpahen i Jesu?

³ Ana mẹrẹn iyono buebun kpahen oruru nẹ udje i Jesu. Ọke rọ wian owian aghwoghwo na, o kwe nẹ oruru ro vwori o seriotọre-e. Ukpomaran, nọ tobọ kerabọ owian aghwoghwo yi. (Se Luke 13:​6-9.) Jerẹ ohworho rọ wian gbanhon hẹrote ogba i vine ẹgbukpe esa rọ vwọ mọ emamọ i fig owuorowu, omaran i Jesu ọ ha ẹgbukpe esa ghwoghwo rẹn itu i Jew na ri vwe rhiabọ dede aghwoghwo yi. Ọrẹn, jerẹ oborẹ ọrọ hẹrote ogba i vine na o vwo fiobọrhotọre, omaran i Jesu o vwo fiobọrhotọre yanghene tirierhumu. Ukpomaran, no fiomarhọ owian na rhọ ji damoma te ọmudu aye.

4. Izede ẹne ego ye ne ru hẹrokele udje i Jesu?

⁴ Uvuẹn urhomu-ẹmro ọnana, ene yono kpahen oborẹ i Jesu o ru dje oruru phia, maido uvwre ibiamo erhan ri kẹta rọ wian owian aghwoghwo na. (Se “After these things,” ẹmro re dje fiotọre ọrẹ Luke 10:1.) Erhe yono nẹ oborẹ ọ tẹmro lele ji hẹrokelie, ọnọ ha userhumu rẹn ọwan vwo oruru rhọ. Vwana, jena mẹrẹn oborẹ ene ru hẹrokele udje i Jesu uvuẹn izede ẹne enana: (1) Ọ tẹnrovi ọhọre i Jehova, (2) ọ kpomavi rẹn aruẹmẹrẹn i Baibol, (3) ọ hẹroso i Jehova nọ hobọtua ye, ọrhẹ (4) o vwo ifiẹrorhọ taghene ihworho ezẹko ina kerhọ ye.

Ọ TẸNROVI ỌHỌRE I JEHOVA

5. Marhẹ i Jesu o ru djephia taghene ọ tẹnrovi ọhọre Osolobrugwẹ eruo?

⁵ Jesu o ghwoghwo “iyẹnrẹn esiri Uvie” na, fọkime o rheri taghene ọrana owian ri Jehova ọ gwọlọre nọ wian. (Luke 4:43) Owian aghwoghwo na yọ mai ghanren uvuẹn akpenyerẹn i Jesu. Ibiamo ri kẹta uvuẹn akpenyerẹn yen dede, o ghwoghwo nẹ “amwa riẹ amwa ọrhẹ nẹ ọko riẹ ọko,” ji yono awọrọ. (Luke 13:22) O ji yono idibo yi erọrọ nẹ aye i homaba ye wian owian ọnana.—Luke 10:1.

6. Marhẹ owian aghwoghwo na o ru surhobọmwu kowian kowian re vwori uvuẹn ogame i Jehova? (Ji ni ifoto na.)

⁶ Inyenana, owian aghwoghwo na yẹ owian rọ mai ghanren ri Jehova o tiobọnu rẹn ọwan. (Matt. 24:14; 28:​19, 20) Kowian kowian re vwori uvuẹn ogame i Jehova o surhobọmwu owian aghwoghwo na. Jerẹ udje, era wian owian ebanbọn yanghene ga uvuẹn Oghọn Ukoko e ruẹ omaran nẹ aye i sabu hobọtua owian aghwoghwo na. Era ha userhumu rẹn imizu oghwọghọ kpregede ọ phia riẹn, e ruẹ omaran neneyo imizu na i sabu rharhumu tuẹn ogame i Jehova rhọ, tobọ te owian aghwoghwo na. Erhe rhe ọghanronmẹ owian aghwoghwo na ji karorhọ taghene ọrana yẹ owian rọ mai ghanren ri Jehova ọ yẹrẹ ọwan, oruru ọwan nọ nọ gbanhonrhọ. János ro rhiẹ ọkpako ukoko ro rhirhiẹ Hungary, nọ tare, “Mia karorhọ omamẹ ọke ephian taghene mi sabu ha owian ọrọrọ wene owian aghwoghwo na-a; ọrana yẹ owian rọ mai ghanren re vwori.”

7. Mesoriẹ i Jehova ọ gwọlọ ne rhe ghwoghwo iyẹnrẹn esiri na? (1 Timothy 2:​3, 4)

⁷ Ana sabu ruẹ oruru ọwan kpahen owian aghwoghwo na gbanhonrhọ, nyoma ra na ha ukẹro ri Jehova ọ ha ni ihworho ni aye. Ọ gwọlọre nẹ ihworho buebun i rhon iyẹnrẹn esiri na ji kpahenrhọ ye. (Se 1 Timothy 2:​3, 4.) Fọkiẹ ọnana, no yono ọwan ọke ephian na sabu tona owian aghwoghwo na rhọ. Jerẹ udje, ibroshọ na Ẹguọlọ wu Vwo Kpahen Ihworho—Ono Mwuo Ruẹ Idibo, o vwo irorẹdjẹ sansan ri na ha userhumu rẹn ọwan tuẹn ikuegbe rhọ rhẹ ẹhẹn re ne ruẹ idibo. Ọrhọ tobọ rhianẹ ihworho a kerhọ ọwan vwana-a, aye ina sabu vwo uphẹn aye ina kerhọ bọmọke ukpokpogho rode ọnọ ki tonrhọ. Ọkezẹko, oborẹ a ta rẹn aye vwana, yo no mwu aye kerhọ obaro na. Ọrẹn, nẹ ọrana ọ ki sabu phia, ene vi rhe ghwoghwo iyẹnrẹn esiri na.

Ọ KPOMAVI RẸN ARUẸMẸRẸN I BAIBOL

8. Me yẹ aruẹmẹrẹn i Baibol ri Jesu ọ dabu vwẹruọ ye o mwurien ru?

⁸ Jesu ọ dabu vwẹruọ oborẹ aruẹmẹrẹn i Baibol ine te orugba lele. O rheri taghene ẹgbukpe esa gbẹ uphrophro ọvo, yo no ghwoghwo iyẹnrẹn esiri na. (Dan. 9:​26, 27) O ji rhe aruẹmẹrẹn ro sekpahen ọke ro no hwu ọrhẹ oborẹ ono hwu lele. (Luke 18:​31-34) Fọkiẹ ọnana, Jesu nọ ha ọke ro vwori ruiruo izede ẹghwanren. Ọnana no ji mwuie ghwoghwo rhẹ oruru, neneyo ọ sabu wian owian ra yẹriẹ hin.

9. Mesoriẹ aruẹmẹrẹn i Baibol ọ lẹrhẹ ọwan ghwoghwo rhẹ oruru?

⁹ Arha dabu vwẹruọ aruẹmẹrẹn i Baibol, ọrana ọnọ lẹrhẹ ọwan ghwoghwo rhẹ oruru. Ọwan i rheri taghene ibiọke ọvo yọ hẹrhẹre bọmọke ana ki ghwọghọ enyerakpọ ọnana. E rheri taghene ekwakwa ra phia vwana ọrhẹ iruemru ihworho e djephia, yẹ oka ro djephia taghene ọwan e nyerẹn uvuẹn ẹdẹ ri koba. Ọwan i rheri taghene eghrẹn rọ ha uvwre Omẹgbanhon Akpọ ọrẹ Anglo-America ọrhẹ Russia kugbe era hobọtua ye, yọ lẹrhẹ aruẹmẹrẹn ro sekpahen orodje obọrẹ o rierun ọrhẹ orodje obọrẹ o riotọre te orugba “uvuẹn ẹdẹ oba na.” (Dan. 11:40) Ọwan i ji rhe taghene isihanghwẹ oma re dje kpahen uvuẹn Daniel 2:​43-45, o mevirhọ Omẹgbanhon Akpọ ọrẹ Anglo-America. Jerẹ oborẹ aruẹmẹrẹn na o djephia, ọwan i vwo imwẹro taghene phẹrẹkpẹ, Uvie Osolobrugwẹ ọnọ ghwọghọ isuensun ituakpọ ephian. Aruẹmẹrẹn enana ephian i djephia taghene ọwan e nyerẹn uvuẹn ẹdẹ oba na, omarana, no fori ne ghwoghwo iyẹnrẹn esiri na rhẹ okpakpa.

10. Izede erọrọ ego yẹ aruẹmẹrẹn i Baibol ono ru yẹ ọwan oruru rhọ?

¹⁰ Ọwan i vwo omwemẹ re ne ghwoghwo kpahen aruẹmẹrẹn i Baibol rẹn ihworho. Omizu ọmase owu re se Carrie rọ ga ọbe Dominican Republic, nọ tare, “Ive irhorhomu i Jehova kpahen obọdẹn akpọ obaro na, yo mwu mẹ ghwoghwo urhomẹmro na rẹn awọrọ.” Nọ habaye: “Mia rha mẹrẹn oborẹ ihworho a dẹrughwaroghwẹ inyenana, no mwu mẹ ẹro taghene aye dede ina ji riamerhen ive enana.” Aruẹmẹrẹn i Baibol ọ ha urhebro rẹn ọwan ne fiomarhọ owian aghwoghwo na, fọkime ọwan i rheri taghene Jehova ọ ha oberhumu owian na. Leila ro rhirhiẹ ẹkwotọre i Hungary, nọ tare: “Isaiah 11:​6-9 ọ yẹre mẹ oruru, ne mi ghwoghwo iyẹnrẹn esiri na rẹn ihworho ephian. Mi rheri taghene kohworho kohworho ọnọ sabu wene nyoma userhumu i Jehova.” Habaye, omizu ọhworhare owu re se Christopher ro rhirhiẹ ẹkwotọre i Zambia, nọ tare: “Jerẹ oborẹ Mark 13:10 ọ mẹraruiẹ rhotọre, iyẹnrẹn esiri na o kerabọ lele akpọ na ephian ne, ghini ọkpẹ uphẹn taghene mi ha usuẹn ere ghwoghwie.” Aruẹmẹrẹn i Baibol ego ye mwuo ghwoghwo?

Ọ HẸROSO I JEHOVA NỌ HOBỌTUA YE

11. Mesoriẹ i Jesu ọ hẹroso i Jehova nọ ha userhumu riẹn ghwoghwo rhẹ oruru? (Luke 12:​49, 53)

¹¹ Jesu ọ hẹroso i Jehova taghene ọnọ yẹ ye omẹgbanhon nọ sabu rhe ghwoghwo rhẹ oruru. Dedevwo Jesu ọ ha ona ruiruo, ọrẹn o rheri taghene iyẹnrẹn esiri na ọnọ suẹ ẹkparehaso ji lẹrhẹ ihworho ezẹko tuekwẹre. (Se Luke 12:​49, 53.) Fọkiẹ owian aghwoghwo na, ilori ẹga ọke ọrana na damoma aye ine kpe i Jesu hwu. (John 8:59; 10:​31, 39) Ọrẹn, Jesu o fiobọrhotọre-e, fọkime o rheri taghene Jehova rhẹ ọye i gba havwiẹ. Nọ tare: “Orhiẹ omẹmẹ ọvo yi havwiẹ-ẹ, ọrẹn Ọsẹ na ro djeri mẹ rhe ọrhẹ omẹmẹ i gba havwiẹ. . . . Ọ sẹrerhumuji mẹ vwo-o, fọkime mie ruẹ ekwakwa ra merhiẹn oma ọke ephian.”—John 8:​16, 29.

12. Marhẹ i Jesu o ru mwuegbe idibo yi nẹ aye i ghwoghwo udabọ ẹkparehaso?

¹² Jesu ọ karorhọ idibo yi taghene aye ina sabu hẹroso i Jehova nọ hobọtua aye. Ọ yẹrẹ aye imwẹro ọgbọ buebun taghene Jehova ọnọ ha userhumu rẹn aye uvuẹn ọke ẹkparehaso. (Matt. 10:​18-20; Luke 12:​11, 12) Omarana, nọ ha urhebro rẹn aye nẹ aye i ru dẹndẹn. (Matt. 10:16; Luke 10:3) Ọ ji ta rẹn aye taghene aye i vwa gba ihworho ri vwa gwọlọ kerhọ urhomu aye-e. (Luke 10:​10, 11) Habaye, ọ ta rẹn aye taghene aye ina sabu zẹ orhianẹ a kparahasuẹ aye. (Matt. 10:23) Dedevwo Jesu o vwo oruru ji hẹroso i Jehova, ọrẹn ọ kẹnoma rẹn erhirhiẹ ri na sabu fiẹ arhọ ye rhẹ imwofẹn.—John 11:​53, 54.

13. Mesoriẹ o fo ne wu vwo imwẹro taghene Jehova ọnọ ha userhumu wẹn?

¹³ Ọwan i gwọlọ userhumu i Jehova na sabu rhe ghwoghwo udabọ ẹkparehaso. (Rev. 12:17) Mesoriẹ o fo ne wu vwo imwẹro taghene Jehova ọnọ hobọtua? Roro kpahen ẹrhomo i Jesu rọ ha uvuẹn John urhomu-ẹmriẹn 17. Jesu ọ rẹ i Jehova nọ hẹrote inyikọ ye, Jehova ọ kpahenrhọ orẹ ọrana. Ọbe i Acts ọ nẹ iyẹnrẹn kpahen oborẹ o ru ha userhumu rẹn inyikọ na ghwoghwo udabọ ẹkparehaso. Uvuẹn ẹrhomo ọrana, Jesu ọ ji rẹ i Jehova nọ hẹrote ihworho ri ne vwo esegburhomẹmro kpahen aghwoghwo inyikọ na. Wu ha usuẹn ihworho erana. Me te ọke na, Jehova ọ ji kpahanrhọ ẹrhomo i Jesu; ọnọ ha userhumu wẹn jerẹ oborẹ ọ ha userhumu rẹn inyikọ na.—John 17:​11, 15, 20.

14. Marhẹ e ru rhe taghene ana sabu rhe ghwoghwo rhẹ oruru? (Ji ni ifoto na.)

¹⁴ Rẹ oba na o tiẹkẹrẹ ne na, ọnọ sabu bẹn re ne ghwoghwo iyẹnrẹn esiri na rhẹ oruru, ọrẹn Jesu ọ yẹrẹ ọwan imwẹro taghene ọnọ hobọtua ọwan. (Luke 21:​12-15) Jerẹ i Jesu ọrhẹ idibo yi, ọwan i vwa gba ihworho kerhọ aghwoghwo ọwa-an, habaye, ọwan a ji kẹnoma rẹn ẹfro. Arha tobọ dobọ owian ọwan ji dede, imizu ukoko na a ji damoma ghwoghwo iyẹnrẹn esiri na fọkime aye i hẹroso i Jehova ukperẹ ono rhiẹ omẹgbanhon aye. Jerẹ oborẹ i Jehova o tiobọnu omẹgbanhon rẹn idibo yi ọke ahwanren, omaran ọnọ ji yẹ ọwan omẹgbanhon na sabu “wian owian aghwoghwo na gba,” jerẹ oborẹ ọ gwọleriẹ. (2 Tim. 4:17) Wu na sabu vwo imwẹro taghene wu rha hẹroso i Jehova, ọnọ ha userhumu wẹn rhe ghwoghwo rhẹ oruru.

O VWO IFIẸRORHỌ

15. Me yo djephia taghene Jesu o vwo ifiẹrorhọ taghene ihworho ina kerhọ iyẹnrẹn esiri na?

¹⁵ Jesu o vwo ifiẹrorhọ taghene ihworho ezẹko ina kerhọ iyẹnrẹn esiri na. Fọkiẹ ọnana, nọ sabu sẹrorẹ oruru kpahen owian aghwoghwo na. Jerẹ udje, uvuẹn ehion ẹgbukpe 30 C.E., Jesu nọ mẹrẹnvwrurhe taghene ihworho buebun i vwo omwemẹ aye ina kerhọ iyẹnrẹn esiri na, omarana, nọ hare aye dje okegbe rọ ho te evuon ne. (John 4:35) Emrẹ ẹgbukpe owu ọ vrẹn, nọ ta rẹn idibo yi: “Orhọ na ọ doro.” (Matt. 9:​37, 38) Ọke oru, nọ kanrunumwuien taghene: “Orhọ na ọ doro . . . Are i gba rẹ Onini orhọ na no dje ihworho ya wian uvuẹn orhọ ye.” (Luke 10:2) Jesu o vwo ifiẹrorhọ taghene ihworho ina kpahenrhọ iyẹnrẹn esiri na, oma ọ ji merhiẹn ọke aye a ghini kerhọ ye.—Luke 10:21.

16. Marhẹ idje i Jesu o ru djephia taghene o vwo ifiẹrorhọ kpahen owian aghwoghwo na? (Luke 13:​18-21) (Ji ni ifoto na.)

¹⁶ Jesu o yono idibo yi nẹ aye i vwo ifiẹrorhọ kpahen owian aghwoghwo na, fọkime ọnọ lẹrhẹ aye sẹrorẹ oruru aye. Jerẹ udje, roro kpahen idje yi eva. (Se Luke 13:​18-21.) Jesu ọ ha ukeri mustard yono aye taghene iyẹnrẹn esiri Uvie na ono kerabọ omamọ, habaye o vwo oborẹ ọnọ sabu dobọ ye ji-i. Ọ ji ha oborẹ o phie dje idjedje rẹn aye taghene iyẹnrẹn esiri Uvie na ono kerabọ omamọ ji hobọte ihworho bibiesuọn. Nyoma idje enana, Jesu nọ ha userhumu rẹn idibo yi mẹrẹnvwrurhe taghene iyẹnrẹn esiri aye e ghwoghwo na, ono vwo efikparobọ.

17. Iroro ego ye vwori rọ soriẹ o fo ne vwo ifiẹrorhọ taghene ihworho ine rhiabọ dede iyẹnrẹn esiri na?

¹⁷ Arha dabu roro kpahen oborẹ iyẹnrẹn esiri na ọ hobọte ihworho lele inyenana, ono mwu ọwan rhe ghwoghwo rhẹ oruru. Kẹgbukpe kẹgbukpe, ihworho buebun ri vwo omamọ ẹhẹn a rhiẹ Ẹkarorhọ Uhwu i Jesu, ji rhiabọ dede uyono i Baibol. Buebun aye e bromarhame ji homaba ọwan wian owian aghwoghwo na. Ọwan e rhe uchunu ihworho ri hẹrhẹre ri ne rhiabọ dede iyẹnrẹn esiri na-a, ọrẹn ọwan i rheri taghene Jehova o koko otu gbidigbidi, ri na nyavrẹn ukpokpogho rode rọ sa na. (Rev. 7:​9, 14) Onini orhọ na o fiẹrorhọ taghene ihworho buebun ine rhiabọ dede iyẹnrẹn esiri na, o ji fo ne vwo ifiẹrorhọ ọrana.

18. Me ya gwọlọre nẹ ihworho i djokarhọ uvuẹn oma ọwan?

¹⁸ Idibo i Jesu i vwo oruru kpahen owian aghwoghwo na. Ọke ihworho a mẹrẹn oborẹ inyikọ na e fiudugbere tẹmro lele, aye ni “mẹrẹnvwrurhe taghene aye rhẹ i Jesu i gba havwiẹ bi.” (Acts 4:13) Ihworho arha mẹrẹn ọwan re ghwoghwo iyẹnrẹn esiri na rhẹ oruru, aye ni na mẹrẹnvwrurhe taghene ọwan a hẹrokele udje i Jesu.