“Are i Djẹ Rẹn Oma Are . . . Ohworho Are Ina ga”

1. Me ye ne vi ru na sabu vwo obọdẹn omamerhomẹ, mesoriẹ? (Isaiah 48:​17, 18)

ỌSẸ ọwan obẹ odjuwu o vwo ẹgwọlọ kpahen ọwan omamọ, ọ ji gwọlọ na riamerhen akpọ vwana ọrhẹ obaro na. (Eccl. 3:​12, 13) Ọ marẹn ọwan ne vwo ena sansan, ọrẹn ọ yẹ ọwan omẹgbanhon re ne sun oma ọwa-an, yanghene brorhiẹn oborẹ ọgbare ọrhẹ oborẹ ọsọre-e. (Eccl. 8:9; Jer. 10:23) O rheri taghene na sabu vwo obọdẹn omamerhomẹ, ana vi ha ẹga riẹn ji mọrọn irhi enẹyen.—Se Isaiah 48:​17, 18.

2. Imwẹro ọgo yẹ Echu ọ gwọlọre ne vwo, marhẹ i Jehova ọ kpahenrhọ ofian ọrana lele?

² Echu ọ gwọlọre ne vwo imwẹro taghene ana sabu vwo omamerhomẹ vabọ userhumu i Jehova, habaye, ituakpọ ọvo ina sabu sun oma aye. (Gen. 3:​4, 5) Jehova nọ kpahenrhọ ofian ọnana nyoma rọ ha uphẹn rẹn ituakpọ nẹ aye i sun oma aye ibiọke. Ọrẹ omemwurhọ, usun ituakpọ o se fughwẹ ne. Ọrẹn, Baibol na o vwo idje ehworhare ọrhẹ emẹse ri mẹrẹn aghọghọ uvuẹn ogame i Jehova. Ohworho ọrukaro usuẹn aye yẹ Jesu Kristi. Jene kiki yono kpahen oborẹ ọsoriẹ o brorhiẹn taghene ọnọ ga i Jehova. Orho ru, ne ne yono kpahen oborẹ ọsoriẹ Ọsẹ ọwan obẹ odjuwu o mwuovwan ẹga ra na hariẹn. Obẹtaye, ene yono kpahen iroro ezẹko rọ soriẹ e brorhiẹn taghene ana ga i Jehova.

OBORẸ ỌSORIẸ I JESU O BRORHIẸN TAGHENE ỌNỌ GA I JEHOVA

3. Me yẹ Echu ọ ta rẹn Jesu no ru, odjẹ ọgo yi Jesu ọ djẹre?

³ Ọke i Jesu ọ ha otọrakpọ na, o brorhiẹn ohworho rọ nọ ga. Ogege i Jesu ọ ghwai bromarhame hin, Echu nọ ta riẹn taghene orho gburhomu rhotọre ji ha ẹga riẹn, ọnọ ha ọsoso ivie ri ha otọrakpọ na riẹn. Jesu nọ kpahenrhọ riẹn: “Nẹ aran, Echu! Fọkime a yariẹ rhotọre: ‘Jehova Osolobrugwẹ ọnọ ọvo ye wu na ha ẹga riẹn, ọye ọvo ye wu na vi ha ẹga ro fiotọre riẹn.’” (Matt. 4:​8-10) Mesoriẹ i Jesu ọ djẹ odjẹ ọrana? Jene yono kpahen iroro na ezẹko.

4-5. Iroro ezẹko ego yo mwu i Jesu ga i Jehova?

⁴ Iroro ọrukaro ro mwu i Jesu ga i Jehova yẹ ẹgwọlọ—Jesu o vwo ẹgwọlọ okokodo kpahen Ọsẹ ye. (John 14:31) Habaye, Jesu ọ ga i Jehova fọkime ọrana yẹ oborẹ o fori no ru. (John 8:​28, 29; Rev. 4:11) O rheri taghene Jehova yẹ Esiri arhọ, ra na sabu hẹroso ro ji tiobọnẹ ghwologhwolo. (Ps. 33:4; 36:9; Jas. 1:17) Jehova ọ ji mọrenfian rẹn i Jesu dẹ-ẹ, habaye, ọye yọ ji yẹ ye kemru kemru ro vwori. (John 1:14) Ọrẹ ovẹnẹ, Echu yọ lẹrhẹ ihworho hwuẹ. Ọye ọmọrenfian ro vwo ufiuvwele, o vwo ji roro rẹn awa-an. (John 8:44) Fọkiẹ ọnana, Jesu no tigban i Jehova ukperẹ ọnọ homaba Echu kparehasuiẹ.—Phil. 2:​5-8.

⁵ Jesu ọ tẹnrovi oborẹ ono nerhumu atamwu ọnẹyen rhe, ọnana iroro ọrọrọ ro mwurien ga i Jehova. (Heb. 12:2) O rheri taghene ọrhọ sẹrorẹ atamwu ọnẹyen, ono ruẹ odẹ i Jehova fon ji gbẹn izede firhọ re ne fiobarhọ ojẹriọ ri Dẹbolo ọ soro.

OBORẸ ỌSORIẸ I JEHOVA O MWUOVWAN ẸGA RA NA HARIẸN

6-7. Mesoriẹ ihworho buebun inyenana i vwa ga i Jehova, ọrẹn mesoriẹ o mwuovwan ẹga ọwan?

⁶ Ihworho buebun inyenana i vwa ga i Jehova-a, fọkime aye e ji rhe kpahen iruemruie ọrhẹ oborẹ o ru rẹn aye ne-e. Aye i họhọ ihworho rẹ ọnyikọ Paul o ghwoghwo riẹn uvuẹn Athens.—Acts 17:​19, 20, 30, 34.

⁷ Paul o dje rẹn era kerhọ ye taghene Osolobrugwẹ urhomẹmro na o “tiobọnu arhọ ọrhẹ ẹhẹn kugbe ekwakwa ephian rẹn ihworho ephian.” Nọ habaye: “Nyoma yen yẹ ọwan e vwo arhọ, sabu nya ji nyerẹn.” Osolobrugwẹ yẹ Ọmemama na, rọ “ma ihworho ri ha egbamwa na ephian nyoma ọhworhare owu,” omarana, o mwuovwan ẹga ọwan.—Acts 17:​25, 26, 28.

8. Me yi Jehova ono jo ruo? Djeyi fiotọre.

⁸ Ri Jehova o rhiẹ Ọmemama ọrhẹ Osuinsuensun na, ọnọ sabu gba ihworho nẹ aye i ha ẹga riẹn. Ọrẹn, Jehova o vwo ruẹ omara-an. Ukpomaran, ọ yẹrẹ ọwan oka ro djephia taghene ọ havwiẹ, o ji vwo ẹgwọlọ kpahen ọwan owuowu. Ọ gwọlọre nẹ ihworho ephian i rhiẹ igbehian yen bẹmẹdẹ. (1 Tim. 2:​3, 4) Fọkiẹ ọnana, Jehova o yonorin ọwan ne yono awọrọ kpahen ọhọriẹ, ji ta rẹn aye kpahen ekwakwa irhorhomu ro no ru rẹn ituakpọ. (Matt. 10:​11-13; 28:​19, 20) O firẹ ọwan rhẹ ikoko sansan, ji ha ekpako ukoko mwu ri na hẹrote ọwan.—Acts 20:28.

9. Marhẹ i Jehova o ru dje ẹgwọlọ ye phia?

⁹ Jehova o dje ẹgwọlọ ye phia, nyoma ro tiobọnu ekwakwa irhorhomu rẹn ihworho ri vwe vwo imwẹro taghene o nyerẹn. Roro kpahen ọnana: Uvwre ẹgbukpe buebun rhe, ihworho buebun i djẹ odjẹ aye ine ruẹ oborẹ o jerẹ aye. Udabọ ọrana, Jehova ọ ji yẹ aye oborẹ aye i gwọlọre nẹ aye i sabu nyerakpọ ji riamerhiẹn. (Matt. 5:​44, 45; Acts 14:​16, 17) Ọ yẹrẹ aye uphẹn nẹ aye i vwo igbehian ọrhẹ ekrun ri vwo ẹgwọlọ kpahen aye, ji mẹrẹn erere nẹ owian aye. (Ps. 127:3; Eccl. 2:24) Ọnana o djephia taghene Jehova o vwo ẹgwọlọ kpahen ituakpọ ephian. (Ex. 34:6) Vwana, jena karorhọ oma ọwan oborẹ ọsoriẹ e brorhiẹn taghene ana ga i Jehova ọrhẹ erere ro no tiobọnu rẹn ọwan.

OBORẸ ỌSORIẸ E BRORHIẸN TAGHENE ANA GA I JEHOVA

10. (a) Me yo mwu ọwan ga i Jehova? (Matthew 22:37) (b) Erere ọgo ye wu mẹrẹn nẹ erhionrin i Jehova ne? (Psalm 103:​13, 14)

¹⁰ Jerẹ i Jesu, ọwan a ga i Jehova fọkiẹ ẹgwọlọ okokodo re vwo kpahiẹn. (Se Matthew 22:37.) Ọwan e tiẹkẹrẹ i Jehova fọkiẹ iruemru enẹyen. Jerẹ udje, roro kpahen erhionrin ri Jehova o vwo kpahen ọwan. Ọke emọ Israel a tiẹn uvwele i Jehova, nọ ta rẹn aye: “Biko, are i ghwẹriẹ nẹ izede ibiobiomu are.” (Jer. 18:11) Jehova o rheri taghene ọwan a gba-a, ọwan jẹ eyẹn. (Se Psalm 103:​13, 14.) We rhe roro kpahen ẹharhomu i Jehova ọrhẹ iruemru enẹyen erọrọ, o vwo mwuo wu na ga ye bẹmẹdẹ?

11. Iroro erọrọ ego yo mwu ọwan ga i Jehova?

¹¹ Ọwan a ji ga i Jehova fọkime ọrana yẹ oborẹ o fori ne ru. (Matt. 4:10) Habaye, ọwan i rheri taghene ana mẹrẹn erere arha ga ye. Arha fuevwan kpahen i Jehova, ne ruẹ odẹ ye fuan, ji dje i Dẹbolo rhiẹ ọmọrenfian, ọnana nọ lẹrhẹ oma merhen i Jehova. Erhe brorhiẹn ra na ga i Jehova vwana, ene vwo uphẹn ra na ga ye bẹmẹdẹ!—John 17:3.

12-13. Me ye yono nẹ udje i Jane ọrhẹ Pam?

¹² Ọke ra ji ha emọvwerhe dede, ana sabu vwo ẹgwọlọ okokodo kpahen i Jehova, ro no rhirhiẹ ye te ọke re rhiẹ imirẹghwa. Djokarhọ udje emẹse awanva re se Jane ọrhẹ Pama ri rhiẹ imizu. Jane ọ ha ẹgbukpe 11, Pam ọ ha ẹgbukpe 10 ọke aye a tuẹn uyono i Baibol rhọ. Dedevwo eri vwiẹrẹ aye e vwo omamerhomẹ kpahen uyono i Baibo-ol, ọrẹn aye i ha uphẹn rẹn Jane ọrhẹ Pam nẹ aye i kwomakugbe iyono Iseri Jehova, takpu aye ine rhe lele aye riẹ ishọshi obẹta ọkprughwre na. Jane nọ tare, “Oborẹ Iseri Jehova i yonirin mẹ uvuẹn i Baibol na, ọ ha userhumu mẹ kẹnoma rẹn irueruo ọfanrhiẹn ọrhẹ imwu egbogbanhon ẹha jerẹ oborẹ otuẹdẹre mẹ e ruẹ.”

¹³ Ọke ẹgbukpe ezẹko a vrẹn, aye awanva ni rhiẹ Iseri Jehova. Ọke oru, aye ni tuẹn owian ọkobaro rhọ, ji hẹrote eri vwiẹrẹ aye ri ho ne. Jane nọ karorhọ oborẹ i Jehova o ru rẹn aye vrẹn ne, nyoma rọ ta: “Ọnana o yonorin mẹ taghene Jehova ọ hẹrote igbehian yen, jerẹ oborẹ 2 Timothy 2:19 ọ tare, ‘Jehova o rhe ihworho enẹyen.’” Itiọrurhomẹmro, Jehova ọ hẹrote ihworho ri vwo ẹgwọlọ kpahiẹn ji brorhiẹn aye ina ga ye!

14. Marhẹ ẹmro ọrhẹ irueruo ọwan o ru chochọn odẹ i Jehova? (Ji ni ifoto na.)

¹⁴ Ọwan i gwọlọre nẹ awọrọ i rhe urhomẹmro na kpahen i Jehova. Roro kpahen ọnana: Gba haye taghene wu vwo ugbehian rọ kpẹnkpẹnren ro tiobọnẹ ghwologhwolo, rọ ji harhomẹ. Ẹdẹ owu, ne wu rhon ohworho rọ ta erharhere ẹmro kpahen ugbehian ọnọ na, taghene ọye ọvwọkon, a sabu hẹrosuiẹ-ẹ. Me wu ne ruo? Itiọrurhomẹmro wu na chochọn yen. Omaran ọ ji havwọ, ọke Echu ọrhẹ ihworho ra hobọtua ye arha mọrenfian baren odẹ i Jehova, ọwan na chochọn odẹ ye. (Ps. 34:1; Isa. 43:10) E djephia taghene a gwọlọ ga i Jehova rhẹ ọsoso ẹhẹn ọwan, nyoma ẹmro ọrhẹ irueruo ọwan.

15. Erere ọgo yẹ ọnyikọ Paul ọ mẹrẹnren fọkiẹ ewene ro ruru uvuẹn akpenyerẹn yen? (Philippians 3:​7, 8)

¹⁵ Ọwan i vwo omwemẹ re ne ruẹ ewene uvuẹn akpenyerẹn ọwan, na sabu ga i Jehova vuọnvuọn. Jerẹ udje, ọnyikọ Paul ọ kpariroro vrẹn otitimẹ akpọ na, nọ sabu nyalele i Kristi ji ga i Jehova. (Gal. 1:14) Fọkiẹ ọnana, no vwo omamerhomẹ uvuẹn akpenyerẹn yen, ji vwo uphẹn ro no leli Kristi sun obẹ odjuwu. Ọ vioja orhienbro yi-i, ọwan i ji vioja ye-e.—Se Philippians 3:​7, 8.

16. Me ye yono nẹ udje i Julia? (Ji ni ifoto na.)

¹⁶ Arha ha ogame i Jehova karo uvuẹn akpenyerẹn ọwan, ene vwo omamerhomẹ vwana ọrhẹ obọdẹn akpọ obaro na. Roro kpahen udje omizu ọmase owu re se Julia. Bọmọke i Julia o ki yono urhomẹmro na, ọ ha usuẹn era so ijoro uvuẹn ishọshi owu nẹ ọke rọ ha ọmọvwerhe. Ọwena ijoro ẹsuọ owu, nọ djokarhọ ona ro vwori ji dabu yonie. O jiri-i, Julia no titiri omamọ, nọ jeghwai so ijoro uvuẹn ekete ri titiri omamọ. Ọke rọ ha isukuru owu ro titiri omamọ re yono oborẹ a so ijoro, owuọwan uvuẹn iklasiẹ nọ ta riẹn kpahen Osolobrugwẹ, ji dje riẹn taghene odẹ ye i Jehova. O jiri-i, Julia no yono i Baibol na ọgbeva ọkprughwre. No brorhiẹn rọ nọ ga i Jehova vuọnvuọn, ukperẹ ọnọ hatua owian ijoro ẹsuọ. Orhienbro ọrana ọ lọhọ-ọ. Nọ tare, “Ihworho buebun ni ta mẹ taghene orhienbro mẹ ọsọre, ọrẹn mi gwọlọ ga i Jehova vuọnvuọn.” Marhẹ oma o ruie vwana kpahen orhienbro ọrana ro bruru rọ vrẹn ẹgbukpe 30 ne? Nọ tare, “Mi vwo ẹhẹn ro totọre, mi ji hẹroso i Jehova taghene ọnọ hẹrote edamẹ mẹ ephian obaro na.”—Ps. 145:16.

WU VWA DOBỌ OGAME I JEHOVA JI-I

17. Re nyerẹn uvuẹn ẹdẹ ri koba na, marhẹ ọrana ono ru hobọte ihworho ri brorhiẹn aye ina ga i Jehova ọrhẹ eri vwa ga ye?

¹⁷ Ọwan e nyerẹn uvuẹn ẹdẹ ri koba. Ọnyikọ Paul nọ yare: “Fọkime ‘uvwrọke krẹn vwaran, ohworho rọ sa na ọnọ rhiọ, ọ vwọ samọ kpọke-e.’” (Heb. 10:37) Marhẹ ọnana o ru sekpahen ọwan? Ibiọke ọvo yọ hẹrhẹre rẹ ihworho ine brorhiẹn sẹ aye ina ga i Jehova. (1 Cor. 7:29) Orhianẹ a ghwanriẹn brorhiẹn ra na ga i Jehova ne, e rheri taghene ana dẹrughwaroghwu ebẹnbẹn “uvwrọke krẹn” ọvo.

18. Me yi Jehova ọrhẹ i Jesu i gwọlọre ne ru?

¹⁸ Jesu ọ ha urhebro rẹn idibo yi nẹ aye i rhe lelie ọke ephian. (Matt. 16:24) Omarana, orhianẹ ọwan a ga i Jehova ẹgbukpe buebun ne, o fo ne fiobọrhotọre-e. O fori na wian gbanhon na sabu nyamwu orhienbro ra na ga i Jehova. Dedevwo ọ lọhọ-ọ, ọrẹn ana mẹrẹn ebrurhọ buebun vwana!—Ps. 35:27.

19. Me ye yono nẹ udje i Gene?

¹⁹ Ihworho ezẹko e roro taghene aye i rha ga i Jehova aye i riamerhen akpọ-ọ. Orhianẹ wẹwẹ uphuphẹn, we roro ọkezẹko taghene ogame i Jehova ọnọ da obọ ji wu ne nyerẹn omamọ akpọ? Idama owu re se Gene nọ tare: “Ni mie roro taghene mi rhe rhiẹ Oseri Jehova, mi sabu nyerẹn aruẹ akpọ mi gwọlọre-e. Nọ họhọre taghene otuẹdẹre mẹ erọrọ a riakpọ ghwẹ mẹ, aye e riẹ ipati sansan, kọnrhọ omomaye, ji ruiruẹn re jiri ozighi, ọrẹn mia ha ọsoso ọke mẹ riẹ uyono ukoko ọrhẹ owian aghwoghwo na.” Marhẹ iroro ọnana ọ hobọte i Gene lele? Nọ tare, “Ni mia bẹbẹ ruẹ ekwakwa ibiobiomu, uvwrọke ọrana nọ họhọre taghene mia riakpọ. Ọrẹn, omamerhomẹ na ọ tọ-ọ. Ni mie roro kpahen irhomẹmro ri mi yonorin uvuẹn i Baibol na, ji brorhiẹn mi na ha ọsoso akpọ mẹ ga i Jehova. Avwọke ọrana rhe, nọ họhọre taghene Jehova ọ kpahanrhọ ẹrhomo mẹ owuowu.”

20. Orhienbro ọgo yo fori ne bru?

²⁰ Ọbo ijoro owu nọ so ijoro vwe i Jehova: “Omamerhomẹ ọ havwiẹ harẹn ohworho wu djẹre, no rhirhiẹ egodo ọnọ.” (Ps. 65:4) Omarana, jene bru aruẹ orhiẹn ri Joshua o bruru ọke rọ ta: “Harẹn omẹmẹ ọrhẹ unuoghwa mẹ, ame ina ga i Jehova.”—Josh. 24:15.