‘Orhomurun re ne Tikẹrẹ Osolobrugwẹ’!

1-2. (a) Me yo fori ne ru na sabu vwo obọdẹn onyerẹnkugbe rhẹ ohworho? (b) Me ye ne yono kpahen uvuẹn urhomu-ẹmro ọnana?

WU VWO obọdẹn ugbehian? Marhẹ ugbehian are o ru tonrhọ? Ọkezẹko wu lelirie ghwọghọ ọke kugbe, yono kpahen ebẹnbẹn yen, ji rhe ekwakwa re je yi ọrhẹ ekwakwa ro vwo utuoma kpahen. Wu ji mẹrẹnvwrurhe taghene o vwo obọdẹn iruemru ro fori wu hẹrokele. Fọkiẹ ọnana, ne wu vwo ẹgwọlọ kpahiẹn omamọ.

² Na sabu vwo obọdẹn onyerẹnkugbe rhẹ ohworho, ene vi dje omẹdamu phia ji lele ọravwọ ghwọghọ ọke kugbe. Omaran o ji fo ne ru, na sabu vwo obọdẹn onyerẹnkugbe rhẹ i Jehova. Uvuẹn urhomu-ẹmro ọnana, ene yono kpahen oborẹ ene ru tikẹrẹ i Jehova ọrhẹ erere ra na mẹrẹn erhe ruẹ omaran. Jene kiki yono kpahen oborẹ ọsoriẹ o fo ne tikẹrẹ i Jehova, ro rhiẹ Ugbehian rọ mai kpẹnkpẹn re vwori.

3. Mesoriẹ o fo ne roro kodo kpahen erere ra na mẹrẹn erhe tikẹrẹ i Jehova? Dje udje yi.

³ Itiọrurhomẹmro, wu ne kwerhọ ye taghene ne tikẹrẹ i Jehova yọ mai rhomu. Ọrẹn, erhe roro kodo kpahen oborẹ o rhomu te, ono mwu ọwan rhe tiẹkẹriẹ. (Ps. 63:​6-8) Jerẹ udje, ọwan i rheri taghene ene vwo omọkpokpọ arha riẹ omamọ emaren, sasoma, dabu ronmoma, ji da ame obuebun. Udabọ ọrana, ihworho buebun i vwa damerhọ ekwakwa enana-a, habaye aye i vwa hẹrote oma aye-e. Ọrẹn, erhe roro kpahen erere ra na mẹrẹn, ono mwu ọwan rha hẹrote oma ọwan. Omaran ọ ji havwọ, ọwan i rheri taghene o rhomurun ne tikẹrẹ i Jehova, ọrẹn, erhe roro kodo kpahen erere ra na mẹrẹn, ono mwu ọwan rhe tiẹkẹrẹ Ugbehian ọwan.—Ps. 119:​27-30.

4. Jerẹ oborẹ ọ ha uvuẹn Psalm 73:​28, me yẹ ọbo ijoro na ọ tare?

⁴ Se Psalm 73:28. Ohworho rọ ya i Psalm 73 na onyẹ i Levi ra ha mwu nọ rhọ so ijoro uvuẹn oghwa ẹga i Jehova. O fiotọre taghene ọ fuevwan ga i Jehova uvwre ẹgbukpe buebun ne. Udabọ ọrana, ọ ji mẹrẹn ọghanronmẹ rọ nọ karorhọ omayen ọrhẹ awọrọ taghene, ne “tikẹrẹ Osolobrugwẹ,” orhomurun hariẹn kugbe awọrọ. Erere ego ya na mẹrẹn erhe tikẹrẹ Osolobrugwẹ?

OMAMERHOMẸ Ọ HAVWIẸ RE “NE TIKẸRẸ OSOLOBRUGWẸ”

5. (a) Erhe tikẹrẹ i Jehova mesoriẹ ọrana ọnọ yẹ ọwan omamerhomẹ? (b) Lele oborẹ ọ ha uvuẹn Proverbs 2:​6-16, marhẹ ẹghwanren i Jehova ono ru rhua erere vwo ji sẹroruọ?

⁵ Onyerẹnkugbe ọwan rhẹ i Jehova ọrhọ gbanhanrhọ, oma nọ nọ ji merhen ọwan. (Ps. 65:4) O vwo iroro buebun ri na lẹrhẹ oma merhen ọwan. Jerẹ udje, ọwan a mẹrẹn erere orhianẹ a ha iruemru-urhi Baibol ruiruo. Ẹghwanren rọ ha uvuẹn i Baibol na ọ sẹrorẹ ọwan nẹ ekwakwa ri na sabu ha ẹkuọn rẹn ọwan, ji lẹrhẹ ọwan kẹnoma rẹn erusọ eghwaghwa. (Se Proverbs 2:​6-16.) Ọnana yọ soriẹ i Baibol na ọ ta: “Omamerhomẹ ọ havwiẹ rẹn ohworho ro vwo ẹghwanren ọrhẹ ohworho ro vwo ọmẹrẹnvwrurhe.”—Prov. 3:13.

6. Mesoriẹ ọbo ijoro na o mwuomarhọ?

⁶ Itiọrurhomẹmro, idibo i Jehova e ji mwuomarhọ ọkezẹko. Ọrọ ya i Psalm 73 o mwuomarhọ ọke rọ mẹrẹn irueruo osehiẹn ra phia. Nọ rioma kpahen evwọkon ri vwa mọrọn irhi Jehova ji tuekwẹre, fọkime nọ họhọre taghene akpọ o rhomẹ rẹn aye. No ji roro taghene ihworho re gbozighi ra ji kparoma e fe, vwo omọkpokpọ, aye i vwa ji rioja-a. (Ps. 73:​3-7, 12) Ọbo ijoro na no ji roro taghene o vwo oborẹ ọsoriẹ ọnọ ga i Jehova-a, fọkiẹ osehiẹn rọ mẹrẹn. Fọkiẹ erhirhiẹ na, nọ tare: “Itiọrurhomẹmro, mi wian fughwẹ ọke mie ruẹ ọmudu mẹ fon jeghwai ghwe abọ mẹ fon.”—Ps. 73:13.

7. Me yo fori ne ru erhe mwuomarhọ? (Ji ni ọbe na.)

⁷ Ọbo ijoro na ọ ha uphẹn rẹn omemwurhọ na no kpe ẹhẹn yen rhotọre-e. No ruẹ emru kpahiẹn. Nọ “ruẹ oghwa ẹga ọduado Osolobrugwẹ,” avwaye yi Jehova ọ kpọ iroro yi vi. (Ps. 73:​17-19) Jehova ro rhiẹ Ugbehian ọwan o rhe ọke erhe mwuomarhọ. Arha nekpẹn ọkpọvi mie yi nyoma ẹrhomo, ji rhiabọ dede userhumu ro tiobọnẹ rẹn ọwan nyoma i Baibol ọrhẹ ukoko na, ene vwo omẹgbanhon re ne din ebẹnbẹn na. Ọke ọfiamu ọrhọ vuọn ẹhẹn ọwan dede, Jehova ọnọ ha urhebro rẹn ọwan jeghwai ru ọwan gbanhon.—Ps. 94:19.a

ERHE “TIKẸRẸ OSOLOBRUGWẸ” ENE NYERẸN OBỌDẸN AKPỌ JI VWO IFIẸRORHỌ

8. Izede erọrọ ego yo rhomu ne tikẹrẹ Osolobrugwẹ?

⁸ Ne tikẹrẹ Osolobrugwẹ o rhomurun harẹn ọwan uvuẹn izede eva erọrọ. Ọrukaro, ọnọ lẹrhẹ ọwan nyerẹn obọdẹn akpọ. Ọreva, ọ yẹrẹ ọwan obọdẹn ifiẹrorhọ kpahen obaro na. (Jer. 29:11) Jene yono kpahen erere enana.

9. Marhẹ ene ru nyerẹn obọdẹn akpọ erhe tikẹrẹ i Jehova?

⁹ Erhe tikẹrẹ i Jehova, ene nyerẹn obọdẹn akpọ. Ihworho buebun inyenana ri vwe vwo imwẹro kpahen Osolobrugwẹ, e roro taghene ituakpọ ephian ine hwuo obaro na. Ọrẹn, uyono i Baibol na ọ lẹrherẹ ọwan vwo imwẹro ne taghene Osolobrugwẹ “o nyerẹn, ọye yọ jeghwai kwosa rẹn ihworho ra gwọliẹ nẹ otọre ẹhẹn sa.” (Heb. 11:6) Inyenana, ọwan e nyerakpọ omamerhomẹ fọkime, a ha ẹga rẹn Jehova ro rhiẹ Ọsẹ ọwan obẹ odjuwu.—Deut. 10:​12, 13.

10. Lele oborẹ ọ ha uvuẹn Psalm 37:​29, marhẹ obaro akpọ na ono rhirhiẹ rẹn ihworho ri hẹroso i Jehova?

¹⁰ Ihworho buebun inyenana, e vwo ifiẹrorhọ kpahen obaro na-a, fọkiẹ ọnana oborẹ ọ mai ghanren rẹn aye yẹ iruo aye, oborẹ aye ine ru rọnmọ ji vwiẹ emọ ọrhẹ oborẹ aye ine ru koko igho hẹrhẹ obaro na. Aye i vwa ha Osolobrugwẹ ba iroro aye-e. Ọrẹ ovẹnẹ, idibo i Jehova i vwo ifiẹrorhọ taghene ọnọ hẹrote aye. (Ps. 25:​3-5; 1 Tim. 6:17) Ọwan i hẹroso Osolobrugwẹ ro tiri ọwan kẹroma, ji hẹrosuiẹ taghene ono ruẹ oborẹ o veri. Ọwan i fiẹrorhọ taghene obaro na, ana ha ẹga riẹn bẹmẹdẹ uvuẹn i Paradais.—Se Psalm 37:29.

11. Erere erọrọ ego ya mẹrẹn erhe tikẹrẹ Osolobrugwẹ, marhẹ oma o ruie kpahen ọnana?

¹¹ Ne tikẹrẹ Osolobrugwẹ o rhomurun harẹn ọwan uvuẹn izede erọrọ buebun. Jerẹ udje, Jehova o veri taghene ọnọ harhomu edandan idibo yi ri ghwẹriẹre. (Isa. 1:18) Omarana, o fo ne mwuomarhọ phan fọkiẹ edandan re ru vrẹn ne-e. (Ps. 32:​1-5) E ji vwo uphẹn ra na lẹrhẹ oma merhen i Jehova. (Prov. 23:15) Itiọrurhomẹmro, wu na sabu roro kpahen ebrurhọ erọrọ ra mẹrẹn, fọkime e vwo obọdẹn onyerẹnkugbe rhẹ Osolobrugwẹ. Ọrẹn, marhẹ wu ne ru rhe tiẹkẹrẹ Osolobrugwẹ?

OBORẸ ENE RU RHE ‘TIẸKẸRẸ OSOLOBRUGWẸ’

12. Me wu ru ne, ne wu sabu tikẹrẹ Osolobrugwẹ?

¹² Bọmọke wu ki bromarhame, wu ruẹ ekwakwa buebun ri ha userhumu wẹn tikẹrẹ i Jehova. Wu yono irhomẹmro buebun kpahen i Jehova ọrhẹ Jesu Kristi ne, wu ghwẹriẹ nẹ edandan enọ, wu vwo esegburhomẹmro kpahen Osolobrugwẹ, ji damoma ruẹ ọhọriẹ uvuẹn akpenyerẹn ọnọ. Na sabu rhe tiẹkẹrẹ Osolobrugwẹ, ene vi rhe ruẹ ekwakwa enana.—Col. 2:6.

13. Ekwakwa esa ego yi na ha userhumu rẹn ọwan rhe tiẹkẹrẹ i Jehova?

¹³ Me yọ nọ ha userhumu rẹn ọwan rhe tiẹkẹrẹ i Jehova? (1) Ene vi rhe se i Baibol na ji yonie. Erhe ruẹ ọnana, o fori na damoma yono irhomẹmro ikokodo kpahen Osolobrugwẹ. O fori ne vwẹruọ oborẹ ọhọre Osolobrugwẹ o mevirhọ rẹn ọwan, ji nyalele iruemru-urhi ri ha uvuẹn i Baibol na. (Eph. 5:​15-17) (2) Ene vi ru esegburhomẹmro ọwan gbanhon, nyoma re ne roro kodo kpahen eka ri djephia taghene Jehova o vwo ẹgwọlọ kpahen ọwan. (3) Ana vi kẹnoma rẹn ekwakwa ri Jehova o vwo utuoma kpahen ọrhẹ ihworho re ruẹ ekwakwa erana.—Ps. 1:1; 101:3.

14. Lele oborẹ ọ ha uvuẹn 1 Corinthians 10:​31, me ya na sabu ru kẹdẹkẹdẹ nẹ oma ọ merhen i Jehova? (Ji ni ifoto na.)

¹⁴ Se 1 Corinthians 10:31. Ọ ghanranren omamọ na hatua ekwakwa ra lẹrhẹ oma merhen i Jehova. Ọnana ọ vrẹn oborẹ ọwan e ruẹ uvuẹn owian aghwoghwo na ọrhẹ uyono ukoko. O surhobọmwu oborẹ e nyerakpọ ọwan lele. Jerẹ udje, arha ta urhomẹmro ọke ephian ji tiobọnẹ harẹn awọrọ, ọ lẹrhẹ oma merhen i Jehova. (2 Cor. 8:21; 9:7) Ọ ji gwọlọ na ha ukẹro ọghoghanren ni ẹghẹlẹ arhọ. Ọye yọ ma arhọ, omarana, ana sabu tikẹriẹ nyoma ra na ha ukẹro ro serhọ ni emaren ẹriọ ọrhẹ enyo ẹda, ji dabu hẹrote oma ọwan. Arha damoma ruẹ ekete omẹgbanhon ọwan o teri nẹ oma ọ merhen i Jehova, ọwan ni na ghanren hariẹn omamọ.—Luke 16:10.

15. Ukẹro ọgo yi Jehova ọ gwọlọre na ha ni awọrọ?

¹⁵ Jehova o dje uruemru esiri rẹn evwata ọrhẹ eri vwe rhiẹ evwata. (Matt. 5:45) Ọ ji gwọlọ ne ruẹ omaran rẹn awọrọ. Jerẹ udje, o fo na ‘tẹmro ri na suẹ ẹkuọn rẹn awọrọ ji vwo uruemru unuẹkọ-ọ, ukpomaran o fori ne dje uruemru dẹndẹn rẹn ihworho ephian.’ (Titus 3:2) Fọkiẹ ọnana, o fo na ha ukẹro sakamu ni ihworho ri vwe vwo imwẹro kpahen i Jehova-a. (2 Tim. 2:​23-25) Ene tikẹrẹ Osolobrugwẹ rhọ nyoma re ne dje uruemru esiri phia rẹn awọrọ ji roro rẹn aye.

ANA SABU “TIKẸRẸ OSOLOBRUGWẸ” UDABỌ ORUSỌ ỌWAN

16. Marhẹ oma o ruẹ ọrọ ya i Psalm 73 ọke oru?

¹⁶ Me wu ne ruo orhianẹ ẹhọn o kpokpuo fọkiẹ orusọ wu ru vrẹn ne, ji ni oma taghene Jehova o vwo ẹgwọlọ kpahuọ-ọn? Jerẹ oborẹ e yono vrẹn ne, aruẹ emru ọnana ọ ji phia rẹn ọrọ ya i Psalm 73. Nọ tare: “Aghwẹ mẹ i joma sun mẹ vru; idjaghwẹ mẹ i joma kpọ mẹ se.” (Ps. 73:2) Nọ tare taghene nọ “tuekwẹre” o vwo rho “roro te-e,” nọ “họhọ aranmo ro vwo vwo ọhọ” obaro i Jehova. (Ps. 73:​21, 22) Ọkezẹko, ọnana ọ lẹrheriẹ roro taghene orho mwuovwan ẹgwọlọ i Jehova ọrhẹ ẹharhomu ọnẹye-en.

17. (a) Me yẹ ọbo ijoro na o ruru ọke ẹhẹn yen o seriotọre? (b) Me ya na sabu yono nẹ udje yi? (Ji ni ifoto na.)

¹⁷ Dedevwo ọbo ijoro na o rorori taghene Jehova ọ sẹrerhumuje vwo ne, ọrẹn iroro na o wenerin ọke oru. Ọ họhọre taghene uvuẹn erhirhiẹ omiamiamo na, ọ mẹrẹnvwrurhe taghene o fori no tikẹrẹ i Jehova jerẹ oborẹ ẹmriẹn o djephia: “Ọrẹn vwana, mẹmẹ ọrhẹ owẹwẹ [Jehova] i gba havwiẹ ọke ephian; wu mọrọn obọrhe mẹ ne. We sun mẹ nyoma urhebro ọnọ, orho ru, ne wu ne brọghọ rhọ mẹ oma.” (Ps. 73:​23, 24) Ẹhẹn ọwan orho seriotọre, o ji fo na ha aruẹ ukẹro ọrana ni Jehova. (Ps. 73:26; 94:18) Arha tobọ rusọ dede, ana sabu ghwẹriẹ ji rharhumu bru i Jehova, rhẹ imwẹro na taghene o ‘mwuegbe rọ nọ harhomu’ ọwan. (Ps. 86:5) Ọ ghanranren omamọ ne tikẹrẹ i Jehova maido ọke ẹhẹn ọwan orho seriotọre.—Ps. 103:​13, 14.

“TIKẸRẸ OSOLOBRUGWẸ” BẸMẸDẸ

18. Mesoriẹ o fo ne rhe tiẹkẹrẹ i Jehova?

¹⁸ Jehova ọ gwọlọre ne tiẹkẹriẹ ji rhe yono kpahiẹn, fọkime a sabu yono kpahiẹn hiẹ-ẹn. Baibol na ọ tare taghene “a sabu vwẹruọ” izede, orhienbro ọrhẹ irherhe i Jehova hiẹ-ẹn.—Rom. 11:33.

19. Imwẹro ọgo yọ ha uvuẹn Psalm 73?

¹⁹ Psalm 79:13 nọ tare: “Ame ri rhiẹ ihworho ọrhẹ igegede ri ha otọre ẹruete ọnọ, ine jiruo bẹmẹdẹ; ame ina jeghwai ha ujiri wẹn nẹ uvwiẹ fiẹ uvwiẹ.” Wu na sabu vwo imwẹro taghene wu ne vwo ebrurhọ, wu rhe tikẹrẹ Osolobrugwẹ ji ta rhẹ imwẹro taghene: “Osolobrugwẹ yẹ atita rọ sẹrorẹ ọmudu mẹ, ọye yi mi na ji ga bẹmẹdẹ.”—Ps. 73:26.