O Vwo Oborẹ wu na Sabu Yono nẹ Ekwakwa wu tu Yono Uvuẹn i Baibol na?

1. Marhẹ iyono i Baibol na i ru hobọto ọke we tu yono urhomẹmro na?

IYONO erukaro re tu yono uvuẹn i Baibol na i ha userhumu rẹn ọwan ruẹ ewene uvuẹn akpenyerẹn ọwan ne. Jerẹ udje, ọke re tu yono taghene odẹ Osolobrugwẹ i Jehova, ọwan ni kpare udjoghwẹ ọrukaro nyoma re rhiẹ ugbehian yen. (Isa. 42:8) Habaye, ọke ọwan e yono kpahen erhirhiẹ ihworho ri hwuru i havwọ, e vwe rhe brudu sẹ ihworho re vwo ẹgwọlọ kpahen ri hwu ne a rioja-a. (Eccl. 9:10) Ọke re ji yono kpahen ive Osolobrugwẹ kpahen i Paradais uvuẹn otọrakpọ na, e vwe rhe brudu kpahen obaro na-a. Ọwan ni vwo imwẹro taghene ene nyerẹn ọke jijiri— orhiẹ ẹgbukpe 70 yanghene 80 ọvo-o—ọrẹn bẹmẹdẹ.—Ps. 37:29; 90:10.

2. Marhẹ 2 Peter 1:​12, 13 o ru djephia taghene Ilele Kristi ri te edje ne ina sabu mẹrẹn erere nẹ iyono erukaro rẹ aye i tu yono?

² O fo na ha ukẹro sakamu ni iyono erukaro re tu yono uvuẹn i Baibol na-a. Ọnyikọ Peter ọ ya vwe Ilele Kristi ri “dabu gbanhon uvuẹn urhomẹmro na” uvuẹn ileta ọreva rọ yare. (Se 2 Peter 1:​12, 13.) Ọke ọrana o vwo evwọkon ezẹko uvuẹn ukoko na ri vwa gwọlọ nẹ imizu na i mevigbanhon uvuẹn urhomẹmro na. (2 Pet. 2:​1-3) Peter ọ gwọlọ bọn imizu na gbanhon nọ sabu sẹrorẹ aye nẹ iyono efian. Omarana, nọ karorhọ aye iyono aye i rheri bi. Iyono enana ina ha userhumu rẹn aye sẹrorẹ atamwu aye toba.

3. Dje kpahen oborẹ ọsoriẹ o fo nẹ Ilele Kristi ephian i rhe roro kpahen iyono erukaro rẹ aye i tu yono.

³ Ọrhọ tobọ rhianẹ o jiri ne ra ha uvuẹn ukoko na, o ji vwo oborẹ ana sabu yono nẹ iyono erukaro re tu yono. Jerẹ udje: Ohworho rọ tona emaren e sere ọrhẹ ọrọ vwọ tona, ina sabu ha ekwakwa ra ha sere emaren owu ọvo ruiruo. Ọrẹn ọke oru, ọrọ tona na ọnọ sabu ha ekwakwa erana ruiruo izede ọrọrọ rọ nọ sabu lẹrhẹ emaren na merhen san. Omaran ọ ji havwọ, ukẹro rẹ ohworho rọ ha uvuẹn ukoko na jiri ne ọ ha ni iyono ro tu yono uvuẹn i Baibol na, ọnọ vẹnẹ ohworho rọ tuẹn uyono i Baibol rhọ obọ. Ọkezẹko, erhirhiẹ ọwan ọrhẹ uphẹn ẹga sansan re vwori bi, i wene ne avwọke re bromarhame. Arha ha iyono re yono vrẹn ne ruiruo uvuẹn erhirhiẹ ọwan vwana, ana mẹrẹn iyono ekpokpọ erọrọ ra na sabu ha ruiruo. Jene yono kpahen oborẹ Ilele Kristi ri te edje ne ina sabu yono nẹ ekwakwa esa rẹ aye i tu yono nẹ i Baibol na.

JEHOVA YẸ ỌMEMAMA NA

4. Marhẹ o ru hobọte ọwan re rhe taghene Jehova yẹ Ọmemama ọwan?

⁴ “Ohworho rọ ma i kemru kemru yẹ Osolobrugwẹ.” (Heb. 3:4) Ọwan i rheri taghene Ọmemama ọwan rọ mai vwo omẹgbanhon ọrhẹ ẹghwanren yọ ma otọrakpọ na ọrhẹ kemru kemru ri ha uvuien. Ọye yọ maren ọwan, omarana, ọ dabu rhe ọwan. Ọ hẹrote ọwan. Habaye, o ji rhe oborẹ ọ mai rhomu rẹn ọwan. Rẹ ọwan e rhe taghene Jehova yẹ Ọmemama ọwan, ọnana o wene akpenyerẹn ọwan ne.

5. Urhomẹmro ọgo ye yono ne rọ nọ ha userhumu rẹn ọwan vwo omeriotọre? (Isaiah 45:​9-12)

⁵ Ra mẹriẹn taghene Jehova yẹ Ọmemama ọwan na, no yono ọwan ne vwo omeriotọre. Ọke i Job ọ tẹnrovi omayen ọrhẹ awọrọ phan, Jehova nọ karorhọ ye taghene Ọye yẹ Ọmemama Rọmaigbanhon na. (Job 38:​1-4) Ọnana ọ ha userhumu rẹn i Job rhe taghene oborẹ i Jehova o ruẹ ọgbare ọke ephian. Ọke oru, ọmẹraro Isaiah nọ yare: “O fori nẹ ọphiẹ ọ ta rẹn Ọrọ ma Eriẹ: Me wa ma?’”—Se Isaiah 45:​9-12.

6. Ọkiọgo yo fo ne roro kpahen omẹgbanhon Ọmemama ọwan? (Ji ni ifoto na.)

⁶ Olele Kristi ọrhọ ga i Jehova ẹgbukpe buebun ne, ọnana ọnọ sabu lẹrhiẹ hẹroso irherhe yi phan ukperẹ ọnọ hẹroso ọkpọvi Jehova rọ ha uvuẹn i Baibol na. (Job 37:​23, 24) Ọrẹn, me yọ nọ phia orho roro kpahen ẹghwanren ọrhẹ omẹgbanhon rode Ọmemama yen? (Isa. 40:22; 55:​8, 9) Ọnana ọnọ ha userhumu riẹn vwo omeriotọre ji ha ọhọre i Jehova karo.

7. Me yi Rahela o ruru nọ sabu rhiabọ dede ewene re ruru?

⁷ Rahela ro rhirhiẹ Slovenia, nọ tare taghene orho roro kpahen Ọmemama yen, ọ ha userhumu riẹn rhiabọ dede ewene ekpokpọ ukoko i Jehova o tiobọnẹ. Nọ tare: “Ọkezẹko ọ bẹn mẹ mi ne rhiabọ dede ewene era kobaro uvuẹn ukoko na i tiobọnu. Jerẹ udje, dedevwo mi ni Iyẹnrẹn Ọkpokpọ Ọrẹ 8 Ugboma Usuon ọ Haphia Ọrẹ 2023, o ji gbe mẹ unu ọke mie tu mẹrẹn omizu ọhworhare rọ kpare ẹtuegban rọ ha ẹmro phia. Omarana, ni mi nẹrhomo vwe i Jehova nọ ha userhumu mẹ riẹnrioma rhẹ ewene ọnana.” Rahela nọ mẹrẹnvwrurhe taghene Ọmemama ọwan rọ ma odjuwu ọrhẹ otọrakpọ na, yo suẹn ukoko yi izede ro serhọ. Orhianẹ ọ bẹn wu ne rhiabọ dede ewene ọkpokpọ yanghene ọkpọvi re tiobọnu, o fori ne wu dabu roro kpahen ẹghwanren ọrhẹ omẹgbanhon rode Ọmemama ọwan.—Rom. 11:​33-36.

OBORẸ ỌSORIẸ OSOLOBRUGWẸ Ọ HA UPHẸN RẸN OJẸRIỌ

8. Erere ọgo ya mẹrẹn ne fọkime e rhe kpahen oborẹ ọsoriẹ Osolobrugwẹ ọ ha uphẹn rẹn ojẹriọ?

⁸ Mesoriẹ Osolobrugwẹ ọ ha uphẹn rẹn ojẹriọ? Ihworho ezẹko ri vwe rhe ẹkpahenrhọ rẹn onọ ọrana, a tuekwẹre kpahen Osolobrugwẹ ji roro taghene Osolobrugwẹ o vwo nyerẹ-ẹn! (Prov. 19:3) Ọrẹn, wu yono ne taghene a rioja fọkiẹ ọdandan ọrhẹ ijẹgba ra ha riuku, orhiẹ Osolobrugwẹ yọ soriẹ-ẹ. Habaye, wu ji yono ne taghene Jehova o vwo erhionrin kpahen ituakpọ, neneyo ihworho buebun i sabu vwo uphẹn aye ine yono kpahen i Jehova ọrhẹ oborẹ ono ru fiobarhọ ojẹriọ bẹmẹdẹ. (2 Pet. 3:​9, 15) Irhomẹmro enana wu yono ne na, i tiruo kẹrẹ Osolobrugwẹ rhọ ne.

9. Uvuẹn aruẹ erhirhiẹ ọgo yo fo ne roro kpahen oborẹ ọsoriẹ i Jehova ọ ha uphẹn rẹn ojẹriọ?

⁹ Ọwan i rhe oborẹ ọsoriẹ o fo ne vwo erhionrin uvwrọke ra hẹrhẹ i Jehova no fiobarhọ ojẹriọ. Udabọ ọrana, ọwan yanghene ihworho re vwo ẹgwọlọ kpahen i rhe rhiẹromẹrẹn ebẹnbẹn, osehiẹn, yanghene ohworho re vwo ẹgwọlọ kpahen orho hwu, ne roro taghene Jehova o kpọke phan. (Hab. 1:​2, 3) Uvuẹn aruẹ erhirhiẹ ọrana, o fori ne roro kpahen oborẹ ọsoriẹ i Jehova ọ ha uphẹn rẹn evwata nẹ aye i dẹrughwaroghwu ebẹnbẹn.a (Ps. 34:19) O ji fo ne roro kpahen ọhọre Osolobrugwẹ kpahen ọke ro no fiobarhọ ojẹriọ bẹmẹdẹ.

10. Me yọ ha userhumu rẹn Anne sabu vwo edirin ọke izie o hwu?

¹⁰ Fọkime e rhe oborẹ ọsoriẹ i Jehova ọ ha uphẹn rẹn ojẹriọ, ọrana ọnọ ha userhumu rẹn ọwan sabu din ebẹnbẹn. Anne, ro rhirhiẹ otọre rẹ ame o kinhariẹ ọrẹ Mayotte, uvuẹn Indian Ocean, nọ tare: “Ọke izu mẹ o hwu ẹgbukpe ezẹko ri vrẹnren, ọ lẹrhere mẹ mwuomarhọ omamọ. Ọrẹn, ni mia karorhọ taghene rhẹ i Jehova yọ suẹ ojẹriọ-ọ. Ọye o vi mwuegbe ro no fiobarhọ ojẹriọ ji rhọmọ ihworho re vwo ẹgwọlọ kpahen ri hwuru. Ọke mie roro kodo kpahen iyono erana, nọ ha userhumu mẹ sabu vwo ẹhẹn ro totọre, ọnana o gbe mẹ unu ọkezẹko.”

11. Fọkime e rhe oborẹ ọsoriẹ i Jehova ọ ha uphẹn rẹn ojẹriọ, marhẹ ono ru mwu ọwan rhe ghwoghwo iyẹnrẹn esiri na?

¹¹ Fọkime e rhe oborẹ ọsoriẹ i Jehova ọ ha uphẹn rẹn ojẹriọ, ọrana no mwu ọwan ghwoghwo iyẹnrẹn esiri na. Ọke i Peter ọ ta taghene erhionrin i Jehova o mevirhọ usimirhọ rẹn ọwan, nọ habaye: “Are i gbe roro kpahen aruẹ ohworho ro fori nẹ are i rhirhiẹ uvuẹn irueruo efuanfon ọrhẹ iruemru ọ ga Osolobrugwẹ.” (2 Pet. 3:11) Usuẹn “iruemru ọ ga Osolobrugwẹ” ri Peter ọ ta kpahen na, yẹ owian aghwoghwo na. Ọwan i ji vwo ẹgwọlọ kpahen ihworho jerẹ Ọsẹ ọwan. A gwọlọre nẹ aye i ruẹ akpọ ọkpokpọ na. Fọkiẹ erhionrin i Jehova, nọ yẹ ihworho ri ha okogho ọnọ uphẹn nẹ aye i ma ga ye. E vwo uphẹn re lele Osolobrugwẹ wian, ji ha userhumu rẹn ihworho buebun nẹ aye i yono urhomẹmro na kpahiẹn bọmọke ẹdẹ oba na ono ki te!—1 Cor. 3:9.

ỌWAN E NYERẸN UVUẸN “ẸDẸ RI KOBA NA”

12. Erere ọgo ya mẹrẹn ne re rhe taghene ọwan e nyerẹn uvuẹn “ẹdẹ ri koba na”?

¹² Baibol na ọ ta kpahen oborẹ ihworho ine nyerakpọ aye lele uvwre “ẹdẹ ri koba na.” (2 Tim. 3:​1-5) Vwana, oborẹ a mẹrẹn o djephia taghene oborẹ i Baibol na ọ tare urhomẹmro. Arha mẹrẹn iruemru ituakpọ inyenana re biomẹrhọ biomẹrhọ, no vi mwu ọwan ẹro taghene ana sabu hẹroso ive Osolobrugwẹ.—2 Tim. 3:​13-15.

13. Lele udje i Jesu rọ ha uvuẹn Luke 12:​15-21, enọ ego ya na sabu nọ oma ọwan?

¹³ Fọkime e nyerẹn uvuẹn ẹdẹ ri koba na, ọnana nọ ha userhumu rẹn ọwan sabu ruẹ ekete omẹgbanhon ọwan o teri rhẹ okpakpa. Djokarhọ oborẹ ana sabu yono nẹ udje i Jesu kpahen okpakpa rọ ha owian na uvuẹn Luke 12:​15-21. (Seyi.) Mesoriẹ e se ọdafe owu “ọvwidjigbo”? Orhiẹ fọkiẹ efe ro vwori-i, ọrẹn fọkime ọ ha efe na karo uvuẹn akpenyerẹn yen. Ọhworhare na, “o koko efe rẹn omayen, ọrẹn o fe obaro Osolobrugwẹ-ẹ.” Mesoriẹ erhirhiẹ ọhworhare na o rhiẹ emru imwofẹn? Osolobrugwẹ nọ ta riẹn: “Ana ha arhọ mio ason ọnana.” Ra mẹriẹn taghene enyerakpọ ọnana o riẹ ehion ne na, o fori na nọ oma ọwan: ‘Ẹkẹ mi bruru o djephia taghene mia ha ekwakwa ri mai ghanren karo? Aruẹ ẹkẹ ego yi mia ha userhumu rẹn emọ mẹ bruẹ te oma? Mia ha omẹgbanhon mẹ, ọke mẹ, ọrhẹ igho mi vwori koko efe rẹn oma mẹ gbinẹ mie koko efe rhẹ obẹ odjuwu?’

14. Jerẹ oborẹ a mẹrẹnren uvuẹn udje i Miki, mesoriẹ o fo na karorhọ taghene e nyerẹn uvuẹn ẹdẹ ri koba na?

¹⁴ Erhe roro kpahen imwẹro ro djephia taghene e nyerẹn uvuẹn ẹdẹ ri koba na, ọnọ hobọte oborẹ e nyerakpọ ọwan lele. Ọnana yẹ oborẹ ọ phia rẹn omizu ọmase owu re se Miki. Nọ tare: “Ọke mia ruotọre nẹ isukuru ọduado hin, ni mia gwọlọ iruo rọ nọ yẹ mẹ uphẹn mi ne yono kpahen eranmo. Mi ji gwọlọ rhiẹ ọkobaro ọke ephian, ji ya ga uvuẹn ekete ra mai gwọlọ userhumu. Imizu ezẹko ri te edje ne uvuẹn ukoko mẹ, ni ha urhebro mẹ taghene mi dabu ni iroro mẹ so sẹ ẹkẹ erana mi bruru, ina ha uphẹn mẹ ruriaro uvuẹn ukoko na. Aye i karorhọ mẹ taghene enyerakpọ ọnana ono toba phẹrẹkpẹ. Aye i ji karorhọ mẹ taghene uvuẹn akpọ ọkpokpọ na, mi ne vwo uphẹn mi ne yono kpahen aruẹ eranmo sansan bẹmẹdẹ. Omarana, ni mi brorhiẹn mi na wian owian ibiọke. Ọnana ọ ha userhumu mẹ mẹrẹn igho hẹrote oma mẹ uvuẹn owian ọkobaro na, ọke oru ni mi riẹ Ecuador ya ga, ro rhiẹ ekete ra mai gwọlọ userhumu.” Vwana, esa i Miki ọ ga ẹrhẹ oniruo okinhariẹ uvuẹn ẹkwotọre ọrana.

15. Marhẹ ihworho ina sabu kpahenrhọ iyẹnrẹn esiri na lele? Dje udje yi. (Ji ni ifoto na.)

¹⁵ O fo nẹ ẹhẹn ọwan o seriotọre orhianẹ ihworho a kerhọ iyẹnrẹn esiri na ọke ukaro-o. Ihworho ina sabu ghwẹriẹ. Roro kpahen udje i James ro rhiẹ omizu i Jesu. Ọ mẹrẹn i Jesu ọke rọ ghwanran, ro rhiẹ i Messiah, ji mẹrẹn oborẹ i Jesu o yono awọrọ lele. Udabọ ọrana, James orhiẹ odibo i Jesu-u. Ọrẹn, ọke ra rhọmọ i Jesu nuhwu, no rhiẹ odibo yi—ji vwo oruru kpahen iyẹnrẹn esiri na!b (John 7:5; Gal. 2:9) Omarana, o fo nẹ ẹhẹn ọwan o seriotọre kpahen ihworho ekrun ọwan ri vwe ji rhiabọ dede iyẹnrẹn esiri na-a, o ji fo na damoma ghwoghwo rẹn ihworho ri vwa gwọlọ kerhọ bi. Karorhọ taghene e nyerẹn uvuẹn ẹdẹ ri koba na, omarana, iyẹnrẹn esiri na emru okpakpa. Oborẹ wu ta rẹn aye vwana, ọnọ sabu hobọte aye obaro na, ọkezẹko ukpokpogho rode na ọrhọ tobọ tonrhọ ne.c

RHE DJE EKPẸMẸ PHIA FỌKIẸ OKARORHỌ I JEHOVA

16. Marhẹ wu ru mẹrẹn erere nẹ okarorhọ i Jehova ne? (Ji se ekpeti na “Ha Iyono i Baibol na ha Userhumu Rẹn Awọrọ.”)

¹⁶ Iyono ezẹko ri ha uvuẹn i Baibol na, e tiobọnu aye fọkiẹ ihworho ri vwe ji rhon kpahen irhomẹmro i Baibol na dẹ. Jerẹ udje, a ha ẹmro otu phia kọkprughwre kọkprughwre, e tiobọnẹ irhomu-ẹmro ọrhẹ ividio sansan uvuẹn jw.org fọkiẹ ihworho ri vwe rhiẹ Iseri Jehova. Udabọ ọrana, ọwan a ji mẹrẹn erere nie sa. Ọ bọn ẹgwọlọ ọrhẹ esegburhomẹmro re vwo kpahen i Jehova gbanhanrhọ, ji ha userhumu rẹn ọwan dabu rhiẹ emamọ oyono.—Ps. 19:7.

17. Uvuẹn erhirhiẹ ego yo fo ne wu roro kpahen iyono erukaro wu tu yono?

¹⁷ Oma ọ merhen ọwan ri rhiẹ Iseri Jehova, erhe ruẹ ewene rhẹ ekete i Baibol re vwẹruọ ye bi. Ọrẹn, oma ọ ji merhen ọwan kpahen iyono erukaro re tu yono ri ha userhumu rẹn ọwan tikẹrẹ i Jehova. Orhianẹ ọ bẹn ọkezẹko re ne rhiabọ dede ewene rẹ ukoko i Jehova o tiobọnu, o fori na karorhọ ohworho ro sun ukoko na—nọyẹ Ọrọmaigbanhon ọrhẹ Ọmemama ọwan rọ ji mai vwo ẹghwanren. Ọwan yanghene ohworho re vwo ẹgwọlọ kpahen ọrhọ dẹrughwaroghwẹ ebẹnbẹn, o fori ne vwo erhionrin ji roro kpahen oborẹ ọsoriẹ i Jehova ọ ha uphẹn rẹn ojẹriọ. O fori na karorhọ taghene e nyerẹn uvuẹn ẹdẹ ri koba, omarana no ji fo ne brorhiẹn kpahen oborẹ ana ha ọke ọrhẹ igho ọwan ruiruo lele. Jene okarorhọ i Jehova o ruẹ ọwan gbanhon, mwu ọwan vwo ẹghwanren, ji vwo atamwu kpahiẹn ọke ephian.