Vwo Imwẹro Taghene Jehova ọ Harhomuo ne

1-2. Marhẹ oma ono ruẹ ọwan arha karorhọ taghene a harhomu ọwan ne? (Ji ni ifoto ọbe na.)

ORODJE David o rhe oborẹ o mevirhọ rẹ ẹhẹn iborhin ono kpokpo ọwan fọkiẹ edandan re ru vrẹn ne. (Ps. 40:12; 51:3; ikerẹmro ri ha oberun) O ruẹ erusọ eghwaghwa ezẹko uvuẹn akpenyerẹn yen. Ọrẹn ọ ghwẹriẹ nẹ ẹhẹn rhe, Jehova nọ harhomie. (2 Sam. 12:13) Habaye, oma ọ merhẹn i David ọke Jehova ọ harhomie.—Ps. 32:1.

² Jerẹ i David, Jehova orho dje arodọmẹ rẹn ọwan, oma ọnọ ji merhen ọwan. O rhiẹ emru omamerhomẹ taghene Jehova o mwuegbe rọ nọ harhomu edandan ọwan—tobọ te ere eghwaghwa—orhianẹ a ghwẹriẹ nẹ ẹhẹn rhe, rhian edandan ọwan ji kẹnoma riẹn ọke ọrọrọ! (Prov. 28:13; Acts 26:20; 1 John 1:9) Ọ ji merhoma taghene Jehova ọrhọ harhomu ọdandan ọwan ne, ọ vwọ rhọ karorhọ ye ghwomara-an!—Ezek. 33:16.

3-4. Marhẹ oma o ruẹ omizu ọmase owu ọke ro bromarhame hin, me ye ne yono kpahen uvuẹn urhomu-ẹmro ọnana?

³ Ọkezẹko, ọ bẹn awọrọ ine vwo imwẹro taghene Jehova ọ harhomu aye ne. Roro kpahen udje i Jennifer ra mọren ghwanren uvuẹn urhomẹmro na. Ọke rọ ha uphuphẹn, no fiomarhọ irueruo esọsọ. Ọrẹn, ẹgbukpe buebun a vrẹn, nọ rharhumu bru i Jehova, ji mwuovwan omebrurhame. Nọ tare: “Vẹrhẹ bi mia hatua ekwakwa ugboma omamọ, gbọfanrhiẹn, da enyo vronma, ji tuekwẹre gbangbanhon. Uvuẹn ẹhẹn mẹ, mi rheri taghene fọkiẹ izobo otan i Jesu Kristi, Jehova ọnọ harhomi mẹ mi rha rẹ ye ji ghwẹriẹ nẹ edandan mẹ. Ọrẹn, ẹhẹn iborhin ọ ji lẹrhe mẹ roro taghene Jehova ọ ji harhomi mẹ-ẹ.”

⁴ Ọ bẹn ọkezẹko wu ne kwerhọ ye taghene Jehova ọ harhomuo fọkiẹ erusọ wu ru vrẹn ne? Jehova ọ gwọlọre nẹ oma ọ merhen ọwan jerẹ David, ọke i Jehova ọ harhomie hin. Uvuẹn urhomu-ẹmro ọnana, ene yono kpahen oborẹ ọsoriẹ o fo ne vwo imwẹro taghene Jehova ọ harhomu ọwan ne, ọrhẹ oborẹ ọnọ ha userhumu rẹn ọwan ru te omaran.

MESORIẸ Ọ GHANREN NE VWO IMWẸRO TAGHENE JEHOVA Ọ HARHOMU ỌWAN NE?

5. Me yẹ Echu ọ gwọlọre ne roro? Dje udje yi.

⁵ Erhe vwo imwẹro taghene Jehova ọ harhomu ọwan ne, ọnọ ha userhumu rẹn ọwan kẹnoma rẹn ena Echu. Karorhọ taghene Echu ọnọ damoma na dobọ ogame i Jehova ji. Izede owu ro ruẹ ọnana, yẹ ọrẹ ọ lẹrhẹ ọwan roro taghene Jehova ọ sabu harhomu edandan ọwa-an. Roro kpahen udje ọhworhare owu rọ ha i Corinth re ti nẹ ukoko na fọkiẹ irueruo ọfanrhiẹn. (1 Cor. 5:​1, 5, 13) Ọke rọ ghwẹriẹ, Echu no rurie nẹ imizu ukoko na i ja harhomie—aye arha gwọlọ rhiabọ dedie rhiẹ ukoko na-a. Habaye, Echu ọ ji gwọlọ nẹ ọhworhare na o roro taghene a sabu harhomie-e, “mwuomarhọ phan,” ji dobọ ogame i Jehova ji. Aruẹ ena enana yẹ Echu ọ ji ha ruiruo inyenana. Ọrẹn, “ọwan e rhiẹ igbori rẹn ena ye-en.”—2 Cor. 2:​5-11.

6. Imwẹro ọgo yo fori ne vwo ẹhẹn iborhin orho kpokpo ọwan fọkiẹ edandan re ru vrẹn ne?

⁶ Erhe vwo imwẹro taghene Jehova ọ harhomu ọwan ne, ọnọ lẹrhẹ ọwan vwo ẹhẹn ro totọre. Itiọrurhomẹmro, erhe ruẹ ọdandan ẹhẹn iborhin no kpokpọ ọwan. (Ps. 51:17) Ọrana o serhọ. Ọnọ ha userhumu rẹn ọwan ruẹ ewene ji ru ekwakwa serhọ. (2 Cor. 7:​10, 11) Ọrẹn, arha ha uphẹn rẹn ẹhẹn iborhin no kpokpo ọwan arha ghwẹriẹ ne, ọnọ sabu lẹrhẹ ẹhẹn ọwan seriotọre. Erhe vwo imwẹro taghene Jehova ọ harhomu ọwan ne, ẹhẹn iborhin orho kpokpo ọwan ghwomara-an. Ọke ọrana, na na sabu ga i Jehova rhẹ ẹhẹn obrorhiẹn rọ fonron ọrhẹ aghọghọ. (Col. 1:​10, 11; 2 Tim. 1:3) Ọrẹn, marhẹ ene ru vwo imwẹro taghene Jehova ọ harhomu ọwan ne?

ME YỌ NỌ HA USERHUMU RẸN ỌWAN VWO IMWẸRO TAGHENE JEHOVA Ọ HARHOMU ỌWAN NE?

7-8. Marhẹ i Jehova o dje omayen lele rẹn i Moses, imwẹro ọgo yẹ ọnana ọ yẹrẹ ọwan? (Exodus 34:​6, 7)

⁷ Roro kpahen oborẹ i Jehova o dje omayen rhọ. Djokarhọ oborẹ i Jehova ọ ta rẹn i Moses uvuẹn Ugbenu i Sinai.a (Se Exodus 34:​6, 7.) Manẹ i Jehova ọ sabu ha ẹmro erọrọ dje kpahen iruemru ro vwori, ọrẹn, no dje omayen rhẹ “Osolobrugwẹ arodọmẹ ọrhẹ aruẹdọn.” Osolobrugwẹ ro vwo arodọmẹ ọrhẹ aruẹdọn ono tirierhumu rọ nọ harhomu oruọdandan rọ ghwẹriẹre? Ẹjo! Ono rhiẹ emru ọkon orhianẹ Jehova ọ harhomu ọravwọ-ọ.

⁸ Omarana, ana sabu vwo imwẹro taghene Jehova ono ru te oborẹ o dje omayen rhọ, fọkime ọye Osolobrugwẹ rọ ta urhomẹmro. (Ps. 31:5) Omarana, ana sabu hẹrosuiẹ. Orhianẹ ẹhẹn iborhin o ji kpokpuo fọkiẹ edandan wu ru vrẹn ne, gba nọ oma: ‘Mi vwo imwẹro taghene Jehova o vwo arodọmẹ ọrhẹ aruẹdọn, ji harhomu kohworho kohworho rọ ghwẹriẹre? Omarana, orho fo no mwu mẹ ẹro taghene Jehova ọ harhomi mẹ ne?’

9. Me yẹ ẹharhomu i Jehova o mevirhọ? (Psalm 32:5)

⁹ Roro kodo kpahen oborẹ i Jehova o mwu eri ya i Baibol na ta kpahen ẹharhomu ọnẹyen. Roro kpahen oborẹ i David o dje ẹharhomu i Jehova lele. (Se Psalm 32:5.) David nọ tare “wu ha ọdandan mẹ harhomi mẹ” ne. Uvuẹn edjadjẹ Hebrew, ẹmro na “harhomu” ọnọ sabu mevirhọ oborẹ “a kpare nẹ otọre,” yanghene “kpare nyarhẹn.” Ọke i Jehova ọ harhomu edandan i David, nọ họhọre taghene Jehova ọ kpare edandan i David nẹ otọre ji kpare aye seseri. Ẹhẹn i David no totọre. (Ps. 32:​2-4) Ẹhẹn ọwan ọnọ ji sabu totọre. Arha ghwẹriẹ nẹ edandan ọwan ne, orho fo nẹ ẹhẹn ọwan o kpokpo ọwa-an, fọkime Jehova ọ harhomu ọwan phẹlẹphẹlẹ ne.

10-11. Me yẹ ẹmro na wu “mwuegbe wu na harhomu” o yonirin ọwan kpahen i Jehova? (Psalm 86:5)

¹⁰ Se Psalm 86:5. David ọ ta kpahen i Jehova taghene o ‘mwuegbe rọ nọ harhomu.’ Ọbe owu ri Baibol ọ rionbọrhọ nọ ta kpahen i Jehova omana: “[Ọye] ohworho rọ ‘harhomẹ’—aruẹ ohworho ọrana yọ ghwai havwọ.” Mesoriẹ a ta omaran? Oghwẹmro rọ ha kpahiẹn nọ tare: “Wu vuọnren rhẹ ẹgwọlọ atamwu harẹn ihworho re se owẹwẹ.” Jerẹ oborẹ e yonorin uvuẹn urhomu-ẹmro rọ vrẹnren, ẹgwọlọ atamwu yo mwuẹ i Jehova tiẹkẹrẹ idibo yi ri fuephan. Fọkiẹ ẹgwọlọ atamwu i Jehova, nọ “harhomẹ” iruedandan ephian ri ghwẹriẹre. (Isa. 55:7) Orhianẹ ọ bẹn wu ne vwo imwẹro taghene Jehova ọ harhomu ọwan ne, wu na sabu nọ oma: ‘O mwurun mẹ ẹro taghene Jehova Ohworho rọ ghini harhomẹ—ro mwuegbe rọ nọ harhomu iruedandan ephian ri ghwẹriẹre ri gwọlọ arodọmẹ yen? Orho fo no mwu mẹ ẹro taghene ọ harhomi mẹ ne, mi rha rẹ ye no gbe arodọmẹ mẹ?’

¹¹ Ẹhẹn ọwan ọnọ sabu totọre arha karorhọ taghene Jehova o rhe erhirhiẹ ijẹgba ọwan. (Ps. 139:​1, 2) Ọnana o fiotọre uvuẹn ekete ọrọrọ ri David ọ yare uvuẹn ọbe i psalms, rọ nọ ha userhumu rẹn ọwan vwo imwẹro taghene Jehova ọ harhomu ọwan ne.

WU VWE JẸ OBORẸ I JEHOVA Ọ KARORHỌ KPAHUỌN SẸRUỌ ẸRO-O

12-13. Lele oborẹ ọ ha uvuẹn Psalm 103:​14, me yi Jehova ọ karorhọ kpahen ọwan, me yẹ ọnana o mwu i Jehova ruẹ?

¹² Se Psalm 103:14. David nọ ta kpahen i Jehova taghene “ọ karorhọ taghene ọwan eyẹn.” David ọ ha ẹmro erana dje iroro owu phia, ro mwu i Jehova harhomẹ iruedandan ri ghwẹriẹre: O rheri taghene ọwan ihworho ri vwa gba. Na sabu vwẹruọ ye, jena dabu roro kpahen ẹmro i David.

¹³ David ọ tare taghene Jehova “ọ dabu rhe oborẹ a maren ọwan lele.” Jehova “nọ ha oghwurhie nẹ otọre na” ma Adam, ọ dabu rhe taghene ituakpọ ri gbare dede i ji vwo ovwiẹlẹme—jerẹ udje, aye i gwọlọ emaren, omerhẹn ọrhẹ ẹhẹn re mwuẹ. (Gen. 2:7) Ọrẹn, ọke Adam ọrhẹ Eve e ruẹ ọdandan hin, aye ni vwo ovwiẹlẹme ọrọrọ. Ọwan ri rhiẹ emọ aye, ni ha ijẹgba riuku mie aye, rọ lẹrhẹ ọwan ruẹ ọdandan. Jehova o rheri taghene ọwan ihworho ri vwa gba; habaye jerẹ oborẹ i David ọ tare, “ọ karorhọ” ye. Ẹmro i Hebrew ra ha ruiruo ekete ọnana, ọnọ sabu mevirhọ ra kpare udjoghwẹ ra na ha userhumu phia. Omarana, ana sabu ta taghene ẹmro i David o mevirhọ omana: Jehova o rheri taghene ana sabu rusọ ọkezẹko; arha ji ghwẹriẹ nẹ ẹhẹn rhe o mwuegbe ro no dje arodọmẹ phia ji harhomu ọwan.—Ps. 78:​38, 39.

14. (a) Marhẹ i David o dje ẹharhomu i Jehova lele? (Psalm 103:12) (b) Marhẹ udje i David o ru djephia taghene Jehova ọ harhomẹ phẹlẹphẹlẹ? (Se ekpeti na “Oborẹ i Jehova ọ Harhomu Ọwan Lele ji Kpariroro Vrẹn ye.”)

¹⁴ Marhẹ i Jehova ọ harhomẹ ọwan lele? (Se Psalm 103:12.) David ọ tare taghene Jehova ọrhọ harhomu ọwan, no tiẹ orusọ ọwan serẹ jerẹ oborẹ “ekete ọren na ọ va nẹ sa o sereri nẹ ekete ọren na orho se.” Ekete ọren na ọ va nẹ sa, o sereri omamọ nẹ ekete ọren na orho se; ekete eva na i sabu vwoma dẹ-ẹ. Me yẹ ọnana o yonirin ọwan kpahen edandan ri Jehova ọ harhomu ne? Ọbe owu no djerie omana: “Osolobrugwẹ orho ti ọdandan ọwan seseri omana, ana sabu vwo imwẹro taghene ọrhọ karorhọ ye ghwomara-an.” Jerẹ udje—ọrhen ọnọ sabu lẹrhẹ ọwan karorhọ emru rọ phiare. Ọrẹn, Jehova ọrhọ harhomu ọwan ne, ọ vwọ rhọ ha oja riẹ ọwan fọkiẹ ọdandan rọ harhomu ne-e.—Ezek. 18:​21, 22; Acts 3:19.

15. Me ya na sabu ru ẹhẹn iborhin orho kpokpo ọwan fọkiẹ edandan re ru vrẹn ne?

¹⁵ Marhẹ ẹmro i David rọ ha uvuẹn Psalm 103, ono ru ha userhumu rẹn ọwan vwo imwẹro taghene Jehova ọ harhomu ọwan ne? Ẹhẹn iborhin orho kpokpo ọwan fọkiẹ edandan re ru vrẹn ne, ana sabu nọ oma ọwan: ‘Oborẹ i Jehova ọ karorhọ kpahen mẹ ọ sẹrere mẹ ẹro—nọyẹ, ọ sẹrere mẹ ẹro taghene Jehova o rhe kpahen erhirhiẹ ijẹgba mẹ, o ji mwuegbe rọ nọ harhomi mẹ mi rha ghwẹriẹ? Mia ji karorhọ oborẹ i Jehova ọ kpariroro vrẹn ne—nọyẹ, mia karorhọ edandan rọ harhomu ne, rọ nọ jọ mọren ba mẹ obọ?’ Jehova ọ vwọ karorhọ edandan re ru vrẹn ne-e. Omarana, o fo na ji karorhọ ye-e. (Ps. 130:3) Erhe vwo imwẹro taghene Jehova ọ harhomu ọwan ne, ọnọ ha userhumu rẹn ọwan kpariroro vrẹn erusọ re ru vrẹn ne, ji fiomarhọ ogame i Jehova.

16. Dje kpahen imwofẹn ra na tẹnrovi edandan re ru vrẹn ne. (Ji ni ifoto na.)

¹⁶ Roro kpahen udje ọnana. Ẹhẹn orho kpokpo ọwan fọkiẹ edandan re ru vrẹn ne, na na họhọ ohworho rọ ghwa imoto ro ni ujegbe rọ lẹrhiẹ mẹrẹn oberhumu. Ọ sọ ne wu ni ujegbe na kpeke-e; fọkime ọnọ ha userhumu wẹn kẹnoma rẹn oborẹ ọnọ sabu suẹ ẹkuọn wẹn oberhumu. Ọrẹn, ne wu je rhe vwo asidẹti, wu na vi tẹnrovi obaro. Omaran ọ ji havwọ, o fori na karorhọ edandan re ru vrẹn ne ọkezẹko; fọkime ana sabu yono nie rhe, ji kẹnoma rẹn aye ọke ọrọrọ. Ọrẹn, arha tẹnrovi edandan re ru vrẹn ne, ọnọ sabu lẹrhẹ ẹhẹn ọwan seriotọre, ji lẹrhẹ ọwan je ruriaro uvuẹn ogame i Jehova. Ukpomaran, jena rha tẹnrovi obaro na. Ọwan a nya uvuẹn izede ro suẹn riẹ arhọ uvuẹn akpọ ọkpokpọ rọ sa na, ro rhiẹ ekete ra na ja ‘karorhọ ekwakwa ahwanren na ghwomaran.’—Isa. 65:17; Prov. 4:25.

RHE RUẸ IMWẸRO WU VWORI GBANHANRHỌ

17. Mesoriẹ o fo na rha bọn imwẹro re vwo kpahen ẹgwọlọ i Jehova ọrhẹ ẹharhomu ọnẹyen gbanhanrhọ?

¹⁷ Jena rha bọn imwẹro ọwan gbanhanrhọ taghene Jehova o vwo ẹgwọlọ kpahen ọwan, o ji mwuegbe rọ nọ harhomu ọwan. (1 John 3:19) Mesoriẹ? Fọkime Echu ọnọ rhọ damoma nọ sabu lẹrhẹ ọwan roro taghene Jehova o vwo ẹgwọlọ kpahen ọwa-an, yanghene ọ harhomu ọwa-an. Oborẹ ọ ghwai gwọlọ, yẹ ọrẹ ana dobọ ogame i Jehova ji. Omarana, o fori ne fiẹrorhọ taghene Echu ono rho ruẹ ena yen gbanhanrhọ, na sabu fiobọrhotọre uvuẹn ogame i Jehova, fọkime o rheri taghene ibiọke yo vwori. (Rev. 12:12) O fo na ha uphẹn riẹn no fikparobọ-ọ!

18. Me wu na sabu ru nẹ imwẹro wu vwo kpahen ẹgwọlọ i Jehova ọrhẹ ẹharhomu ọnẹyen ọ gbanhonrhọ?

¹⁸ Ne wu sabu bọn imwẹro wu vwori gbanhonrhọ taghene Jehova o vwo ẹgwọlọ kpahuọn, ha irorẹdjẹ re yonorin uvuẹn urhomu-ẹmro rọ vrẹnren ruiruo. Roro kpahen oborẹ i Jehova o dje omayen rhọ, nọ sabu mwuo ẹro taghene Jehova ọ harhomuo ne. Roro kodo kpahen oborẹ o mwu eri ya Baibol na ta kpahen ẹharhomu ọnẹyen. Karorhọ taghene Jehova o rhe kpahen erhirhiẹ ijẹgba ọwan, ono ji gbe arodọmẹ rẹn ọwan. Habaye, karorhọ taghene Jehova ọrhọ harhomu, o ruie phẹlẹphẹlẹ. Jerẹ oborẹ i David o vwo imwẹro kpahen arodọmẹ i Jehova, wu na sabu ta rhẹ imwẹro, “Wẹwẹ nobiruo Jehova, ru wa ‘ha edandan mẹ harhomi mẹ’!”—Ps. 32:5.