“Ihworho ri Vwo Omamọ Ẹhẹn” Ina Kpahenrhọ Iyẹnrẹn Esiri na

1. Marhẹ ihworho ina sabu kpahenrhọ ye lele aye i rhe rhon iyẹnrẹn esiri na? (Acts 13:​47, 48; 16:​14, 15)

IHWORHO buebun ọke ahwanren, i rhiabọ dede urhomẹmro na ogege aye e rhon urhomedje i Baibol na. (Se Acts 13:​47, 48; 16:​14, 15.) Omaran ọ ji havwọ inyenana, ihworho buebun i ji ghọghọ ọke aye e tu rhon iyẹnrẹn esiri na. Ihworho ri vwa tobọ dje omamerhomẹ phia ọke ukaro ina sabu rhiabọ dede iyẹnrẹn esiri Uvie na ọke oru. Me ye ne ruo arha mẹrẹn ihworho ri vwo “omamọ ẹhẹn” uvuẹn aghwoghwo?

2. Marhẹ owian re ruẹ idibo o ru họhọ owian ra hẹrote ogba ra wọ emamọ sansan rhọ?

² Roro kpahen udje ọnana. Owian re ruẹ idibo ọ họhọ owian ra hẹrote ogba ra wọ emamọ sansan rhọ. Emamọ orhan owu i rha bare, ọrọ hẹrote ogba na nọ kọrọ aye, ọke owu ọvo na, no ji voro otọre na yanghene wọ ewawọ rhẹ ekete erọrọ uvuẹn ogba na. Omaran ọ ji havwọ, arha mẹrẹn ohworho ro vwo omwemẹ ro no rhiabọ dede iyẹnrẹn esiri na, na damoma sa ye erhumu no kiki rhiẹ odibo i Kristi. Ọke owu ọvo na, ne ji yono awọrọ nẹ aye i sabu vwo ọdaremẹro kpahen oborẹ aye e yono uvuẹn i Baibol na. (John 4:​35, 36) Ọmẹrẹnvwrurhe ọnọ ha userhumu rẹn ọwan ha ena sansan yono aye lele edamẹ aye. Vwana, jene kiki yono kpahen oborẹ ene ru ha userhumu rẹn ihworho ri vwo omamerhomẹ kpahen iyẹnrẹn esiri na, ra mẹrẹnren ọke ukaro. Ene ji yono kpahen oborẹ ene ru ha userhumu rẹn aruẹ ihworho enana rhe ruẹ riaro.

IHWORHO BUEBUN I VWO OMWEMẸ AYE INA KPAHENRHỌ IYẸNRẸN ESIRI NA

3. Me ye ne ruo arha mẹrẹn ihworho ri dje omamerhomẹ phia uvuẹn aghwoghwo? (1 Corinthians 9:26)

³ Arha mẹrẹn ihworho ri dje omamerhomẹ phia uvuẹn owian aghwoghwo na, na damoma sa aye erhumu nẹ aye i yono kpahen i Jehova ji tikẹriẹ. Uvuẹn aruẹ erhirhiẹ ọnana, o fo ne tirierhumu ra na ha uyono i Baibol mwu rẹn aye ji ha use rẹn aye rhiẹ uyono ukoko ogege-e.—Se 1 Corinthians 9:26.

4. Dje udje kpahen ohworho ro vwo omwemẹ rọ nọ tuẹn uyono i Baibol rhọ ogege.

⁴ Ha uyono i Baibol mwu. Ihworho ezẹko re lele tuẹn ikuegbe rhọ obọ, ine rhiabọ dede uyono i Baibol ogege. Jerẹ udje, i Tọsde owu, ọmase owu ọbe i Canada nọ nya riẹ ekete owu rẹ ophanphan re je ẹbe rhọ ọ havwọ ji rhọrọ ibroshọ na Riamerhen Akpenyerẹn Bẹmẹdẹ!. Omizu ọmase rọ ha avwaye nọ ta riẹn taghene ọrhọ gwọlọ, ana sabu ha ibroshọ na tuẹn uyono i Baibol ọphẹ rhọ riẹn. Ọmase na no dje omamerhomẹ phia ji ha inọmba ifonuie rẹn omizu ọmase na. Ẹdẹ owu ọvo na, no dje urhomu vwe omizu ọmase na nyoma ifonu ji karorhọ ye kpahen uyono na. Omizu ọmase na nọ ta riẹn taghene ọnọ rhiọ uvuẹn ehion ọkprughwre na, ọrẹn ọmase na nọ nọriẹn: “Odẹrọsa vwo? Mi riẹ ekete owuorowu-u.” Aye ni tuẹn uyono na rhọ i Fraide ọrana. Ọmase na no riẹ uyono ukoko yi ọrukaro ehion ọkprughwre ọrana, ji rhe ruẹ riaro.

5. Marhẹ ene ru dje ọmẹrẹnvwrurhe phia ọke arha gwọlọ ha uyono i Baibol mwuẹ rẹn ohworho? (Ji ni ifoto na.)

⁵ Itiọrurhomẹmro, ọwan i rheri taghene ihworho ephian ra vware i sabu vwo omwemẹ jerẹ ọmase ọrana-a. Ihworho ezẹko i gwọlọ ọke. O fori ne kiki lele ọravwọ ta kpahen urhomu-ẹmro ro jerie vwẹre. Udabọ ọrana, erhe dje omamọ uruemru phia ji vwo ọdamẹ kpahiẹn, o jirẹ-ẹ, na na sabu ha uyono i Baibol mwu riẹn. Me ya na sabu ta ọke arha gwọlọ ha uyono i Baibol mwuẹ rẹn ohworho? Onọ ọnana ya nọ imizu sansan ri tona oborẹ a ha uyono i Baibol mwuẹ rẹn awọrọ.

6. Ohworho orho dje omamerhomẹ phia, marhẹ ene ru ha ikuegbe na riarorhọ?

⁶ Ighwoghwẹmro ọrhẹ ekobaro ezẹko ra nọren kpahen oborẹ aye i ru tuẹn uyono i Baibol rhọ, ni tare taghene uvuẹn ẹkwotọre ezẹko, ono rhomu na kẹnoma rẹn ẹmro jerẹ “uyono,” “uyono i Baibol,” yanghene “yonuo.” Aye i mẹrẹnvwrurhe ne taghene ona rọ mai wian, yẹ ọrẹ aye a ha ẹmro enana ruiruo, jerẹ “ikuegbe,” “gbikun,” ọrhẹ “dabu rhe oborẹ ọ ha uvuẹn i Baibol.” Wu na sabu ha ona ọnana ta riẹn taghene wu gwọlọre nẹ ikuegbe na o riobarorhọ, “O rhiẹ oborẹ o gbunu omamọ taghene Baibol na ọ kpahenrhọ enọ eghoghanren ri sekpahen akpenyerẹn” yanghene “Baibol na ghwai rhẹ ọbe ẹga ọvo-o; o vwo izede erọrọ sansan rọ ha userhumu rẹn ọwan.” Wu na sabu habaye: “O vwo kpọke-e; wu na sabu yono emru ọghoghanren emrẹ iminiti 10 riẹ 15 ọvo.” Wu rha ha ona ọnana ruiruo, wu na sabu kẹnoma rẹn ẹmro jerẹ “bru ọke mẹ” yanghene “kọkprughwre kọkprughwre,” nọ jọ rhọ lẹrhẹ ofẹn mwu aye taghene aye i sabu nyamwuie-e.

7. Ọkiọgo yẹ ihworho ezẹko e tu mẹrẹn urhomẹmro na vwrurhe? (1 Corinthians 14:​23-25)

⁷ Ha use rẹn aye rhiẹ uyono ukoko. Ọ họhọre taghene uvuẹn ọke ọnyikọ Paul, uvuẹn uyono ukoko yẹ ihworho ezẹko e tu mẹrẹn urhomẹmro na vwrurhe. (Se 1 Corinthians 14:​23-25.) Omaran ọ ji havwọ inyenana. Ihworho ezẹko e kiki ruẹ riaro orhianẹ aye i tuẹn uyono ukoko ẹnya rhọ ne. Ọkiọgo ya na ha use rẹn aye? Uyono 10 uvuẹn ọbe na Riamerhen Akpenyerẹn Bẹmẹdẹ! ọ ha use rẹn ihworho rhiẹ uyono ukoko, ọrẹn, wu vwa hẹrhẹ te uyono ọrana vwẹre bọmọke wu na ki ha use rẹn ihworho-o. Ghwai nẹ ọke we lele ohworho tuẹn ikuegbe rhọ, wu na sabu ha use riẹn nọ rhiẹ uyono re ruẹ uvuẹn ehion ọkprughwre na, wu na sabu hunute urhomu-ẹmro ẹmro otu na yanghene ekete ezẹko uvuẹn Uyono Oghwa Odẹrẹ ọkprughwre ọrana.

8. Me ya na sabu ta rẹn ohworho kpahen uyono ọwan orhianẹ a gwọlọ ha use riẹn rhiẹ Aghwẹlẹ Uvie? (Isaiah 54:13)

⁸ Wa rha ha use rẹn ohworho ro dje omamerhomẹ phia, dabu dje ovẹnẹ rọ ha uvwre uyono ukoko ọwan ọrhẹ irueruo ẹga erọrọ ro rheri. Ọke owuọwan ra ha i Baibol yono o tu lele Iseri Jehova ruẹ Uyono Oghwa Odẹrẹ, nọ nọ ọro yonie, “Ọrọ ha uyono na phia o rhe edẹ ihworho ephian?” Omizu ọmase na nọ ta riẹn taghene ame ephian a damoma rhe edẹ owuowọnwan, jerẹ oborẹ ọ havwọ uvuẹn ekrun. Ọnana o gberie unu, fọkime ọ vẹnẹ oborẹ e ruẹ uvuẹn ishọshi ọnẹyen. Omaran ọ ji havwọ, wu na sabu dje riẹn izede erọrọ rẹ uyono ọwan ọ vẹnẹ ẹga erọrọ. (Se Isaiah 54:13.) Ọwan a vwoma na sabu ga i Jehova, yono mie yi, ji ha urhebro rẹn owuowọnwan. (Heb. 2:12; 10:​24, 25) Fọkiẹ ọnana, ne ruẹ uyono ọwan lele ẹkwaphiẹrhotọre, ji kẹnoma rẹn irueruo ri vwe serhọ rhẹ i Baibol na. (1 Cor. 14:40) Aghwẹlẹ Uvie na ọ dabu lo ji fọ, ọnana nọ lẹrhẹ ihworho ephian riamerhen uyono na. Habaye, ọwan i vwa hobọtua ẹko usun oseghe owuorowu-u; ọwan i vwe ji ludje lele amwa yanghene frẹfro kpahen ẹmro omobọ-ọ. Bọmọke wu na ki ha use riẹn, ọnọ merhoma omamọ wu rha sabu dje ividio na Me Ọye Ruẹ Uvuẹn Aghwẹlẹ Uvie? riẹn. Ọnana ọnọ ha userhumu riẹn rhe oborẹ ọnọ mẹrẹn oboran.

9-10. Arha ha use rẹn ohworho nọ rhiẹ uyono ukoko, me ya na sabu ru no mwuien ẹro taghene a gba ye no rhiẹ usuẹn ọwan yanghene vwobọrhọ uyono na-a? (Ji ni ifoto na.)

⁹ Ihworho ezẹko e ruẹ sikẹnsikẹn aye ina rhiẹ uyono ukoko fọkime aye e roro taghene ana ta rẹn aye nẹ aye i “rhiẹ Iseri Jehova.” Yẹ ọravwọ imwẹro taghene oma ọ merhen ọwan re ne rhiabọ dede epha, habaye ọrhọ rhe, ọnọ sabu ghwai kerhọ ọvo. Ekrun ina sabu rhe, tobọ te eri vwo emọvwerhe. Uvuẹn uyono ọwan, e vwe tiobọnẹ uyono san harẹn emọ-ọ. Ukpomaran, emiemọ ọrhẹ emọ aye ye siyẹ kugbe ji yono. Nyoma izede ọnana, emiemọ na sabu rhe ekete emọ aye i havwọ ọrhẹ oborẹ e yono aye. (Deut. 31:12) Ọwan i vwa kpare ọsete yanghene tiobọnẹ ẹvẹlopu rẹn ihworho-o. Ukpomaran, ọwan a nyalele urhi Jesu taghene: “E tiobọnu rẹn are ọphẹ, are i ji tiobọnu rẹn awọrọ ọphẹ.” (Matt. 10:8) Wu na ji sabu ta rẹn ọravwọ taghene ọnọ sabu kuẹ ewun ro vwori rhọ rhe, takpu ọ fonron ji dabu fẹro. Ọmudu na yẹ Osolobrugwẹ o nẹ, orhiẹ omẹhaphia ọwa-an.—1 Sam. 16:7.

¹⁰ Ohworho na ọrhọ rhe, damoma lẹrhẹ ẹhẹn yen totọre. Dje yi rẹn ekpako ukoko na ọrhẹ ighwoghwẹmro erọrọ. Ẹhẹn yen orho totọre, ọnana ọnọ lẹrhiẹ rhe ọke ọrọrọ. Uvwrọke re ruẹ uyono na, orhianẹ o vwo i Baibo-ol, wẹwẹ ọrhẹ ọye i gba ha ọnọ ruiruo ji ha userhumu riẹn kpomavi rẹn ọtẹmro na ọrhẹ ẹmro ra haphia uvuẹn uyono na.

OBORẸ WU NE RUO WU RHA HA UYONO I BAIBOL MWU RẸN OHWORHO

11. Marhẹ wu ne ru djephia taghene wu roro rẹn ohworho rọ yẹruọ ọke?

¹¹ Me yo fori na karorhọ arha ha i Baibol yono ohworho? Roro rẹn ohworho rọ yẹruọ ọke. Jerẹ udje, orho bru ọke wẹn damoma nyamwuie, ọrhọ tobọ rhianẹ ihworho ri ha uvwrakpọ ọrana i vwa nyamwu ọke-e. Habaye, ono rhomu ne wu ruẹ uyono ọrukaro na kpẹtẹ omamọ. Ighwoghwẹmro ezẹko ri tona i tiobọnẹ irorẹdjẹ na taghene kiki fuen uyono na ọrhọ tobọ rhianẹ ọravwọ ọ gwọlọre ne wu rha ta nyarhẹn. Habaye, wu vwa tẹmro bun pha-an. Ha uphẹn rẹn ọrovwoghwa na nọ ta oborẹ ọ ha ẹhẹn yen.—Prov. 10:19.

12. Me yo fori na damoma ru ghwai nẹ ọke ra ha uyono i Baibol mwu rẹn ohworho?

¹² Ghwai nẹ ọtonrhọ uyono na, damoma ha userhumu rẹn ọravwọ rhe i Jehova ọrhẹ Jesu, ji vwo ẹgwọlọ kpahen aye. Wu na sabu ruẹ ọnana nyoma wu na kpọ ẹhẹn yen vi Ẹmro Osolobrugwẹ, ukperẹ ono rhiẹ oma yanghene irherhe i Baibol wu vwori. (Acts 10:​25, 26) Ọgbọ buebun, ọnyikọ Paul ọ bọn uyono yi kpahen Jesu Kristi, ri Jehova o dje rhe mọ ha userhumu rẹn ọwan rhe yi, ji vwo ẹgwọlọ kpahiẹn. (1 Cor. 2:​1, 2) Paul o dje oborẹ ọ ghanren te na ha userhumu rẹn ihworho ekpokpọ vwo obọdẹn iruemru ra na sabu ha dje oro, idọlọ efuanfon ọrhẹ itita eghoghanren. (1 Cor. 3:​11-15) Usuẹn iruemru eghoghanren enana yẹ esegburhomẹmro, ẹghwanren, ọmẹrẹnvwrurhe, ọrhẹ ofẹnzẹ i Jehova. (Ps. 19:​9, 10; Prov. 3:​13-15; 1 Pet. 1:7) Hẹrokele ona uyono ri Paul ọ ha ruiruo nyoma wu na ha userhumu rẹn ihworho we yono vwo esegburhomẹmro ọgbogbanhon ọrhẹ obọdẹn onyerẹnkugbe rhẹ Ọsẹ ẹgwọlọ ọwan ọbe odjuwu.—2 Cor. 1:24.

13. Marhẹ ene ru dje erhionrin ọrhẹ uruemru re roro phia ọke arha ha userhumu rẹn eri dje omamerhomẹ phia? (2 Corinthians 10:​4, 5) (Ji ni ifoto na.)

¹³ Hẹrokele udje i Jesu nyoma wu ne dje erhionrin ọrhẹ uruemru re roro phia. Kẹnoma rẹn enọ ri na lẹrhẹ ofa ruẹ ọravwọ. Erhirhiẹ na ọrhọ gwọliẹ, pho vrẹn irhomu-ẹmro ra bẹn riẹn vwana, ji lelie yono aye orho ru. Ukperẹ wu na damoma gba ye rhiabọ dede uyono owuorowu, yẹ ye ọke nẹ ọye ọvo o roro kpahiẹn ji ruẹ ewene ro fori. (John 16:12; Col. 2:​6, 7) Baibol na ọ ha uyono efian re kpokpo ọwan dje ọkponghwa. (Se 2 Corinthians 10:​4, 5; se ẹmro re dje fiotọre ro sekpahen “overturning strongly entrenched things.”) Ukperẹ wu na ghwọghọ ọkponghwa ohworho we yono no se bruie, ha userhumu riẹn nọ ha i Jehova ruẹ Ekete rọ nọ zẹ ro.—Ps. 91:9.

OBORẸ ENE RU HA USERHUMU RẸN ERI RHIẸ UYONO UKOKO OBỌ

14. Uruemru ọgo yo fori ne dje rẹn ihworho ri rhiẹ uyono ukoko obọ?

¹⁴ Jehova o fiẹrorhọ ye taghene ene dje uruemru esiri ọrhẹ ẹgwọlọ rẹn ihworho ri rhiẹ uyono ukoko obọ, o toro ekete aye i nurhe, irueruo amwa aye, ẹrhẹ aye i vwori ọrhẹ edjadjẹ aye-e. (Jas. 2:​1-4, 9) Omarana, marhẹ ene ru dje ẹgwọlọ phia rẹn ihworho ri rhiẹ uyono ukoko?

15-16. Marhẹ ene ru lẹrhẹ ẹhẹn ihworho ri rhiẹ uyono ukoko obọ totọre?

¹⁵ Ihworho ezẹko ina sabu rhiẹ uyono ukoko ọwan fọkime aye i gwọlọ rhe oborẹ e ruẹ avwaye, yanghene ọkezẹko ohworho ro rhirhiẹ ekete ọrọrọ yọ ta riẹn nọ rhe. Omarana, o fori ne bru aruẹ ihworho enana ri rhiẹ uyono ukoko ọwan nya. Dabu rhiabọ dede aye izede rọ nọ jọ lẹrhẹ ofa ruẹ aye. Ta rẹn aye nẹ aye i siyẹ kẹruọ. Wẹwẹ ọrhẹ aye ina sabu ha i Baibol ọnọ ọrhẹ ẹbe re yono na ruiruo, yanghene yẹ aye ọrẹ aye ina ha ruiruo. Habaye, fiomarhọ erhirhiẹ aye. Ọhworhare owu ro riẹ Aghwẹlẹ Uvie, nọ ta rẹn omizu ọhworhare ro rhiabọ dedie taghene ofa ọ ruiẹ fọkiẹ ewun ro kurhọ. Omizu ọhworhare na nọ lẹrhẹ ẹhẹn yen totọre ji dje riẹn taghene Iseri Jehova jẹ ituakpọ jerẹ ọye. Dedevwo ọhworhare na o bromarhame vwana ne, ọrẹn ẹkpahenrhọ omizu na ọ vwọ sẹriẹ ẹro-o. Ọrẹn, o fori na kpomavi rẹn urhebro ọnana: We rhe lele epha ri rhiẹ Aghwẹlẹ Uvie tẹmro, dje ọdamẹ phia rẹn aye ọrẹn wu wa nọ aye enọ odjahen ri na lẹrhẹ ofa ruẹ aye-e.—1 Pet. 4:15.

¹⁶ Ana ji sabu lẹrhẹ ẹhẹn aye totọre nyoma ra na họghọ rẹn aye ọke erhe lele aye tẹmro, ọke arha kpahanrhọ enọ ọrhẹ ọke arha ha ẹmro phia, maido oghwẹmro na orho sekpahen eri vwe rhiẹ Iseri Jehova yanghene imwẹro aye i vwori. Kẹnoma rẹn ẹmro ri na sabu lẹrhẹ aye biomevwan yanghene rhiẹ ukọ rẹn aye. (Titus 2:8; 3:2) Jerẹ udje, o fo na ta erharhere ẹmro kpahen imwẹro aye-e. (2 Cor. 6:3) O fori nẹ imizu ehworhare ra ha ẹmro otu phia i djokarhọ ọnana. Aye i rha dabu dje ẹmro eghwaghwa fiotọre, aye ne djephia rẹn otu na taghene ihworho ri vwe rhiẹ Iseri Jehova ri ha uvwre ọwan i ghanren rẹn ọwan.

17. Me yo fori ne ru arha mẹrẹn ihworho ri “vwo omamọ ẹhẹn” uvuẹn owian aghwoghwo na?

¹⁷ Kẹdẹkẹdẹ rọ nyavrẹn nọ lẹrhẹ owian aghwoghwo na rhiẹ owian okpakpa, habaye, ọwan na ji mẹrẹn ihworho ri “vwo omamọ ẹhẹn rẹ aye ine vwo arhọ i bẹmẹdẹ.” (Acts 13:48) Arha mẹrẹn aye, e vwe ru sikẹnsikẹn ra na ha uyono i Baibol mwu rẹn aye yanghene ha use rẹn aye rhiẹ uyono ukoko-o. Erhe ruẹ omaran, ana sabu ha userhumu rẹn aye kpare idjaghwẹ ọrukaro uvuẹn ‘izede ro suẹn riẹ arhọ.’—Matt. 7:14.