ENỌ IPHUPHẸN A NỌ
Marhẹ Mi Ne Ru Sabu Kwaphiẹ Erusọ Mẹ Rhọ?
Me ọyẹ wu ne ru?
Se oborẹ ọ phia rẹn Karina, ne wu ji roro taghene ọ phia ha wẹn. Me wu ne ru orhianẹ wu ha erhirhiẹ ọnẹyen?
Karina: “Mia ghwa imoto phẹphẹrẹ riẹ isukuru, ọlọkpa nọ ta mẹ ne mi ghwa ruẹ okokọ, nọ yẹre mẹ itikẹti. Oma ọ merhen mẹ-ẹ! Ne mi ta rẹn izu mẹ, nọ ta mẹ taghene mi ta rẹn Ọsẹ mẹ—re mi vwa guọlọ ru.”
Me ọyẹ wu ne ru?
Odjẹ A: Fọ du, jeghwai fiẹrorhọ taghene Ọsẹ mẹ o vwo rhe kpahiẹ-ẹn.
Odjẹ B: Ta rẹn ọsẹ ọnọ oborẹ ọ ghini phia.
Wu na sabu guọlọ djẹ odjẹ A. Ọkezẹko, izuo o roro taghene wu ya ta rẹn ọsẹ ọnọ ne. Ọrẹn o vwo iroro irhorhomu rọ nọ lẹrhuọ kwerhọ erusọ enọ jeghwai kwaphiẹ aye rhọ—sẹ aye i sekpahen itikẹti yanghene emru ọrọrọ.
Iroro esa rọ soriẹ wu na ta erusọ enọ
1. Ọyẹ oborẹ o fori ne ru. Rọ ta kpahen enyerẹn Ilele Kristi, Baibol na ọrhọ ta: “Ọwan i guọlọ rha ta urhomẹmro ọrẹ i kemru kemru.”—Hebrews 13:18.
“Mia ghini damoma ne mi sabu rhiẹ ohworho rọ ta urhomẹmro jeghwai kpare ehwan erusọ mẹ—nọyẹ damoma kwaphiẹ erusọ mẹ rhọ mi rhe ruẹ owuorowu.”—Alexis.
2. Fọkime ihworho a harhomẹ erẹ a ta orusọ rẹ aye i ruru. Baibol na ọrhọ ta: “Ọrẹ o rhurhu ọdandan ọnẹyen o vwo efikparobọ-ọ, ọrẹn ọrẹ ọ ta ọdandan ye phia jeghwai nya je aye vwo, ene dje arodọmẹ riẹn.”—Proverbs 28:13.
“A guọlọ uduefigbere na sabu kwerhọ orusọ ọwan, ọrẹn ọrana yọ lẹrhẹ ihworho hẹroso ọwan. Aye na mẹriẹn taghene wẹwẹ ohworho rọ ta urhomẹmro. Nyoma we kwerhọ orusọ ọnọ, nu we wene oborẹ obiomurun rhiẹ oborẹ orhomurun.”—Richard.
3. Mai ghanren kparobọ, ọ merhen Jehova Osolobrugwẹ oma. Baibol na ọrhọ ta: “Jehovah o vwo utuoma kpahen ọrẹ ọ ta efian, ọrẹn o vwo omamọ onyerẹnkugbe rhẹ ohworho ọsoso.”—Proverbs 3:32.
“Mi rhe rusọ hin, ni mia mẹrẹnvwrurhe taghene o fori ne mi kwerhọ ye. O vwo izede owuorowu ri Jehova ọnọ ha ebrurhọ mẹ orhianẹ mi vwe ruẹ lele izede ọnẹye-en.”—Rachel.
Omarana, marhẹ i Karina ọ kwaphiẹ orusọ ọnẹyen lele? Ọ guọlọ ti itikẹti ra ha bru eho riẹn nu rẹn ọsẹ ye fọkiẹ imoto rọ ghwa gbanhon. Ọrẹn ọ sabu tie nu bẹmẹdẹ-ẹ. “Emru ẹgbukpe owu ọ vrẹn,’ Karina nọ tare, ‘ọsẹ mẹ nọ mẹrẹn itikẹti na ra ya odẹ mẹ rhọ. Ọnana no firi mẹ rhẹ okpetu—izu mẹ dede ọ tuekwẹre fọkime mie ru oborẹ ọ ta mẹ-ẹ!”
Me ye yonorin: Karina ọrhọ ta: “We rhe ti erusọ nuẹ, ọ lẹrhẹ ekwakwa biomẹ rhọ. Wu na djẹ rhọ ye orhoru!”
Oborẹ wu ne ru sabu yono nẹ erusọ enọ
Ọwan ephian e ruẹ sọ. (Romans 3:23; 1 John 1:8) Jerẹ oborẹ ọ havwọ, ọrana oka omeriotọre ọrhẹ ẹ do te edje a rha ta erusọ re ruru—omarana ruie ogege.
Udjoghwẹ rọ ha kpahiẹn, ọyẹ yono nẹ erusọ ọnọ. Ọrẹ omemwurhọ, iphuphẹn ezẹko a ha uphẹn ọnana ruiruo-o! Aye ina sabu họhọ uphuphẹn ọgbọtọ owu re se Priscilla. Ọrhọ ta: “Ẹhẹn mẹ ọ tagha omamọ fọkiẹ erusọ mẹ. Mie ni oma mẹ sakamu, omarana, erusọ mẹ na họhọ ohwan ọghwaghwa re mi vwa sabu kpara. Ẹhẹn mẹ o seriotọre omamọ ni mia jeghwai roro taghene mie vwo ifiẹrorhọ-ọ.”
We roro omaran ọkezẹko? Orhiomaran, karorhọ ọnana: We rhe roro kpahen esọre wu ruru ọke ephian, ọ họhọ ohworho rọ ghwa imoto ni ujegbe rọ ha uvuẹn imoto na, ọrẹn o vwo ni obaro-o. Ra tẹnrovi oborẹ e ru vrẹn ne ọ lẹrhẹ ọwan ni oma ọwan sakamu jeghwai lẹrhẹ ọwan vwiẹlẹ re ne fi ebẹnbẹn obaro na kparobọ.
Ukpomaran, orho fo na ha ukẹro ro serhọ nie?
“Ni erusọ enọ, ne wu jeghwai yono nẹ uvuẹn aye rhe, neneyo wu ja rha rharhumu vwariẹn aye. Ọrẹn wu vwe roro kpahen aye pha-an, nẹ aye i ja rha tagha ẹhẹn ọnọ.”—Elliot.
“Mia damoma mi ne yono emru nẹ orusọ owuowu mi ruru, rọ nọ sa mẹ erhumu rhiẹ omamọ ohworho jeghwai rhe oborẹ mi na hẹrote erhirhiẹ na lele ọke ọrọrọ. Ọrana yẹ erhirhiẹ ro serhọ, fọkime ọ ha userhumu wẹn dua riaro.”—Vera.