Mesoriẹ Iseri Jehova a Vwa Riorẹ Ẹdẹ re Vwiẹ Ohworho?
Iseri Jehova a vwa riorẹ ẹdẹ re vwiẹ ohworho-o, nime ame i vwo imwẹro taghene aruẹ erẹ erana i vwa merhen Osolobrugwẹ oma-a. Dedevwo Baibol na ọ ghwai hunute yi taghene ọ sọre na riorẹ ẹdẹ re vwiẹ ohworho-o, ọrẹn ọ yẹrẹ ọwan iruemru-urhi ri na ha userhumu rẹn ọwan rhẹ aruẹ ukẹro Osolobrugwẹ ọ ha ni aye. Jenẹ a ta kpahen ẹnẹ usuẹn iruemru-urhi Baibol enana.
Egehọ yi tuẹn orẹ ẹdẹ re vwiẹ ohworho rhọ. Lele oborẹ ọ ha uvuẹn Funk & Wagnalls Standard Dictionary of Folklore, Mythology, and Legend, a tuẹn irueruo enana rhọ nime ihworho buebun i vwo imwẹro taghene uvuẹn ẹdẹ re vwiẹ ohworho, “ikpodje ina sabu ha ẹkuọn rẹn ohworho re vwiẹre na,” omarana “igbehian i rha homaba ye riorẹ na, jeghwai tiobọnu ẹghẹlẹ riẹn, ọnọ sabu sẹrorẹ ohworho na.” Ọbe na The Lore of Birthdays ọ tare taghene ọke ahwanren, iyẹnrẹn kpahen ẹdẹ re vwiẹ ohworho ọ ghanranren omamọ, nime ana sabu haye ta oborẹ obaro na ono rhirhiẹ,” nyoma “ra ha ikereti ruiruo.” Ọbe na nọ ji ta taghene “arha torhẹ ikando ẹdẹ ọrana, ohworho na no no vwo i kemru kemru rọ guọlọre.”
Ọrẹn Baibol na ọ kparehasuẹ irueruo imajiki, ephẹbọ, eda, yanghene “ekwakwa ri họhọ enana.” (Deuteronomy 18:14; Galatians 5:19-21) Itiọrurhomẹmro, emru owu rọ lẹrhẹ Osolobrugwẹ ghwọghọ amwa i Babylon ọke ahwanren, yẹ uruemru ra ha ikereti bepha rẹ aye e vwobọrhọ, nime ọnana o surhobọmwu irueruo eda. (Isaiah 47:11-15) Rhẹ ọke ephian yẹ Iseri Jehova a guọlọ esiri irueruo ephia-an; ọrẹn Baibol na ọrhọ ta kpahiẹn, ame a ha ukẹro ọghoghanren nie.
Ilele Kristi erukaro a riorẹ ẹdẹ re vwiẹ ohworho-o. The World Book Encyclopedia ọ tare taghene “aye e ni orẹ ẹdẹ re vwiẹ ohworho taghene irueruo egehọ.” Baibol na o djephia taghene inyikọ na ọrhẹ awọrọ ri Jesu o yonorin, i dje udje rhotọre rẹ Ilele Kristi ephian ina nyalele.—2 Thessalonians 3:6.
Uhwu i Jesu ọvo ye jurhi rẹn Ilele Kristi taghene aye i riorẹ ye, ukperẹ ono rhiẹ orẹ ẹdẹ re vwiẹ ohworho. (Luke 22:17-20) O fo nẹ ọnana ọ gbo unu-u, nime Baibol na ọ tare taghene “ẹdẹ ohworho o hwu, o rhomu ghwẹ ẹdẹ re vwiẹ ye.” (Ecclesiastes 7:1) Ọke i Jesu o hwu, ọ ghwanriẹn vwo omamọ odẹ rhẹ Osolobrugwẹ ne, fọkiẹ ọnana ẹdẹ ro hwu nọ ghanren ghwẹ ẹdẹ re vwiẹ ye.—Hebrews 1:4.
Baibol na ọ hunute odibo Osolobrugwẹ owuorowu rọ riorẹ ẹdẹ re vwiẹ ye-e. Ọnana rhẹ orusọ-ọ, nime Baibol na ọ hunute awanva ri vwe rhiẹ Ilele Kristi ri riorẹ ẹdẹ re vwiẹ aye. Ọrẹn, omamọ emru o nerhumu erẹ eva na rhe-e.—Genesis 40:20-22; Mark 6:21-29.
Emọ Iseri Jehova e nie taghene emru o vruẹ nẹ akpenyerẹn aye, nime aye a vwa riorẹ ẹdẹ re vwiẹ aye-e?
Jerẹ oborẹ emiemọ ephian e ruẹ, emiemọ Iseri Jehova e dje ẹguọlọ phia rẹn emọ aye ọke ephian uvuẹn ẹgbukpe na, nyoma aye e tiobọnẹ ẹghẹlẹ rẹn emọ aye jeghwai lele aye riakpọ. Aye a damoma hẹrokele udje Osolobrugwẹ ro tiobọnẹ ghwologhwolo. (Matthew 7:11) Lele oborẹ emọ Iseri Jehova enana i ta rhẹ obotọre, o djephia taghene emru o vwo vruẹ nẹ akpenyerẹn aye-e:
“Arha yọ ẹghẹlẹ ọke wu vwe fiẹrorhọ yọ mai merhoma.”—Tammy, ẹgbukpe 12.
“Dedevwo a vwa yẹ mẹ ẹghẹlẹ uvuẹn ẹdẹ re vwiẹ mẹ-e, ọrẹn eri vwiẹre mẹ a yẹ mẹ ẹghẹlẹ ọke ephian. Ọ lẹrhẹ oma merhen mẹ, nime mi vwe fiẹrorhọ ye-e.”—Gregory, ẹgbukpe 11.
“Wu rorori taghene iminiti ikpe, cake ra na yọ, kugbe ijoro re ne kporo wẹn yẹ akpẹriọ? Rhiẹ oghwa ame, ne wu mẹrẹn oborẹ e se akpẹriọ!”—Eric, ẹgbukpe 6.