Me yẹ Ugboma Usuon Ọrẹ Iseri Jehova?

Ugboma Usuon na ibiẹ ẹko Ilele Kristi ri te edje ne, re tiobọnẹ ọkpọvi rẹn Iseri Jehova ri ha akpọ na ephian. A ghalẹ owian aye rhẹ akwava:

• Aye ye mwuegbe iyono i Baibol ra haphia uvuẹn ẹbe ukoko na, iyono ukoko, ọrhẹ isukuru Iseri Jehova.​—Luke 12:42.

• Aye e ni owian aghwoghwo ọrẹ Iseri Jehova ri ha uvuẹn akpọ na ephian sua, omaran ji te oborẹ a ha igho re torori ruiruo lele.

Ugboma Usuon na ọ hẹrokele udje “inyikọ na ọrhẹ ekpako ri ha uvuẹn i Jerusalem” ọke ahwanren, ri brorhiẹn eghoghanren fọkiẹ erhumu ọsoso Ilele Kristi ri havwiẹ ọke ọrana. (Acts 15:2) Jerẹ inyikọ na, Ugboma Usuon na i vwe ni oma aye taghene aye ye suẹn ukoko na-a. Ukpomaran, aye na guọlọ ọkpọvi Baibol na ọke ephian, nime aye i rheri taghene Jehova ọ ha i Jesu mwu no rhiẹ urhomu rẹn ukoko na.​—1 Corinthians 11:3; Ephesians 5:​23.

Ayọmo yi ha Usuẹn Ugboma Usuon na?

Imizu ri ha usuẹn Ugboma Usuon na yẹ Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane ọrhẹ Jeffrey Winder. Aye a ga uvuẹn esiri ukoko ame rọ ha obẹ Warwick, New York, U.S.A.

Marhẹ Ugboma Usuon na ọ wian owian yen lele?

Ugboma Usuon na ọ ha umẹ erhan mwu ra hẹrote eghọn sansan uvuẹn owian na, omizu owuowu usuẹn Ugboma Usuon na ọ ha uvuẹn umẹ owu yanghene ghwẹ omaran.

• Umẹ rọ Hẹrote Ẹmro Irhi Ọrhẹ Ebẹnbẹn Sansan: Aye a hẹrote ẹmro irhi ọrhẹ ebẹnbẹn sansan, aye ya ji hẹrote ẹmro ri sekpahen Iseri Jehova ra kparahasua fọkiẹ imwẹro ẹga aye, omaran ji te ẹmro erọrọ ri homaphia kpregede kpahen Iseri Jehova.

• Umẹ rọ Hẹrote Edamẹ Eghọn Ukoko Sansan: Aye ya hẹrote edamẹ imizu ra wian uvuẹn Eghọn Ukoko ri ha akpọ na ephian.

• Umẹ rọ Hẹrote Ẹbe Efomu Ọrhẹ Ekwakwa Ukoko na: Aye ya hẹrote owian ẹbe efomu ji ruẹ ẹkwaphiẹrhotọre na sabu kpare ẹbe enana vwe imizu ri ha ekete sansan, habaye, aye ya ji hẹrote owian ebanbọn ekete re ruẹ uyono, ekete ra rhian erhianrhian ọrhẹ eghọn ukoko.

• Umẹ Ẹga: Aye ya hẹrote owian re ne ghwoghwo “iyẹnrẹn esiri Uvie na.”​—Matthew 24:14.

• Umẹ Uyono: Nyoma aye yẹ Ugboma Usuon na e tiobọnẹ ọkpọvi ra ha ruiruo uvuẹn iyono, ọrhẹ isukuru ukoko na, omaran ji te ikpekporo ọrhẹ ividio sansan re tiobọnẹ.

• Umẹ Eyaya: Nyoma aye yẹ Ugboma Usuon na e mwuegbe ọkpọvi ra haphia uvuẹn ẹbe re fomẹ phia ọrhẹ uvuẹn iwẹbsaiti ukoko na, aye ya ji hẹrote owian erhianrhian.

Haba ewian rẹ Ugboma Usuon na a wian nyoma umẹ enana, Ugboma Usuon na a ji ruẹ ẹghware kọkprughwre kọkprughwre nẹ aye i sabu ta kpahen edamẹ ukoko na. Uvuẹn ẹghware enana, imizu ri ha uvuẹn Ugboma Usuon na, ne roro kpahen oborẹ i Baibol na ọ tare, ji ha uphẹn rẹn ẹhẹn ọfuanfon Osolobrugwẹ nọ kpọ aye vi, neneyo orhienbro aye ọ sabu rhiẹ owu.​—Acts 15:25.

Ayọmo yẹ era ha userhumu rẹn Ugboma Usuon na?

Enana Ilele Kristi ra hẹrosua ra ha userhumu rẹn umẹ Ugboma Usuon na. (1 Corinthians 4:2) Aye a ha omẹgbanhon ọrhẹ ona aye ha userhumu rẹn umẹ rẹ aye i havwọ, aye e ji lele imizu ri ha uvuẹn umẹ na ruẹ ẹghware kọkprughwre kọkprughwre. Dedevwo aye i vwe lele Ugboma Usuon na brorhiẹ-ẹn, ọrẹn aye e tiobọnẹ ọkpọvi ọrhẹ iyẹnrẹn eghoghanren, aye e nie sua taghene a nyalele orhienbro umẹ na sansan, jeghwai ni ekete owian na o riaro te ne. Ugboma Usuon na o ji dje aye ya ha urhebro rẹn imizu ri ha ekete sansan uvuẹn akpọ na, ha ẹmro phia uvuẹn ẹghware re ruẹ kukpe kukpe yanghene ọke imizu arha guọlọ ruotọre nẹ isukuru i Gilead.