Me yẹ Ọdandan?

Ẹkpahenrhọ i Baibol na

Ọdandan uruemru yanghene iroro ephian ri kparahaso uruemru urhi Osolobrugwẹ. O sekpahen ọrẹ ohworho ọ kparahaso urhi Osolobrugwẹ, nyoma ro ruẹ oborẹ ọsọre, yanghene rọ vwọ gba uvuẹn ukẹro Osolobrugwẹ. (1 John 3:4; 5:17) Baibol na ọ ji ta kpahen ọdandan re gbobọhiẹn emru—nọyẹ re vwe ruẹ oborẹ ọgbare.—James 4:17.

Uvuẹn edjadjẹ ra ha ya i Baibol na, ẹmro na ọdandan o mevirhọ “re ruẹ oborẹ o vwo serhọ,” yanghene ọrẹ emru ọ sọ ọwan obọ. Jerẹ udje, isodja ọke emọ Israel ọke ahwanren i rhe oborẹ e fiẹ ukpokpo omamọ, te erhirhiẹ “aye i vwe fiẹ sọ.” Arha rhian ẹmro ọrana lele oborẹ ọ ghwai havwọ, o mevirhọ, “re vwe ruẹ ọdandan.” (Judges 20:16) Omarana, nẹ ohworho o ruẹ ọdandan, o mevirhọ ọrẹ ohworho ọnọ jọ sabu nyamwu irhi egbagba Osolobrugwẹ.

Rẹ Osolobrugwẹ o rhiẹ Ọmemama na, o vwo omẹgbanhon ro no jurhi harẹn ituakpọ. (Revelation 4:11) Owuowọnwan ọnọ nẹ iyẹnrẹn omayen harẹn Osolobrugwẹ—Romans 14:12.

Ana sabu kẹnoma rẹn ọdandan phẹlẹphẹlẹ?

Ẹjo. Baibol na ọ tare taghene “ọwan ephian iruedandan ọrhọ lẹrhẹ ọwan nyerẹnmwu odidi Osolobrugwẹ-ẹ.” (Romans 3:23; 1 Kings 8:46; Ecclesiastes 7:20; 1 John 1:8) Mesoriẹ orhiomaran?

Ihworho erukaro, Adam ọrhẹ Eve, e vwo ọdandan owuorowu uvuẹn oma aye ọke re tu ma aye-e. Nime Osolobrugwẹ ọ marẹn aye gbagba lele ohọhọme ọnẹyen. (Genesis 1:27) Ọrẹn, nẹ aye i kparẹ erhirhiẹ ọgbagba aye fughwẹ nyoma aye a tiẹn uvwele Osolobrugwẹ. (Genesis 3:5, 6, 17-19) Ọke aye e vwiẹ emọ, emọ na ni ha ọdandan ọrhẹ erhirhiẹ ijẹgba riuku mie aye. (Romans 5:12) Ọnana o serhọ rhẹ oborẹ Orodje David ro suẹn Israel ọ tare taghene, “e vwiẹre mẹ rhẹ orusọ.”—Psalm 51:5.

Edandan ezẹko i ghwa ghwẹ erọrọ?

Ee. Jerẹ udje, Baibol na ọ tare taghene ihworho ri ha Sodom ọke ahwanren e ruẹ “edandan eghwaghwa” rẹ edandan aye i “ghware omamọ.” (Genesis 13:13; 18:20) Jenẹ eroro kpahen ekwakwa esa rọ lẹrhẹ ọdandan sabu ghwa.

1. Oborẹ ọ ghwa te. Baibol na ọ ha orhetio rẹn ọwan na kẹnoma rẹn edandan eghwaghwa jerẹ ọfanrhiẹn, emẹgọ, uhi eso, inyo ẹda vrẹn oma, re kin emru awọrọ ha, re kpe ohworho, ọrhẹ irueruo eda. (1 Corinthians 6:9-11; Revelation 21:8) Baibol na o fiẹ ovẹnẹ rhẹ uvwre edandan enana ọrhẹ edandan ra vwa ha arudo ru, jerẹ udje, ra tẹmro yanghene ruẹ oborẹ ọnọ ha ẹkuọn rẹn awọrọ. (Proverbs 12:18; Ephesians 4:31, 32) Ọrẹn Baibol na ọ ha urhebro rẹn ọwan taghene, a vwa ha ukẹro ghemeghe ni ọdandan owuorowu-u, nime ọnọ sabu lẹrhẹ ọwan ru edandan eghwaghwa erọrọ ri kparehaso urhi Osolobrugwẹ.—Matthew 5:27, 28.

2. Ẹhẹn re ruẹ ọdandan na. Ihworho ezẹko e ruẹ ọdandan haso Osolobrugwẹ, nime aye e rhe te-e. (Acts 17:30; 1 Timothy 1:13) Dedevwo Baibol na ọ vwọ hobọtua aruẹ edandan enana-a, ọrẹn o djephia taghene ovẹnẹ ọ havwiẹ uvwre aye ọrhẹ edandan ri sekpahen ọrẹ ana ha arudo gbe urhi Osolobrugwẹ ghwu. (Numbers 15:30, 31) “Evwọkon ihworho” ya ha arudo ruẹ ọdandan.—Jeremiah 16:12.

3. Oborẹ e ruẹ ọdandan na bun te. Baibol na ọ ji ta kpahen ovẹnẹ rọ ha uvwre ọdandan re ruru ukwọgbọ, ọrhẹ ọdandan ra vwanriẹn ru ọgbọ buebun. (1 John 3:4-8) Ihworho ri ha “arudo ru ọdandan,” dedevwo aye i ru oborẹ ọgbare ne, ẹzenguon aye ọnọ gbanhon omamọ.—Hebrews 10:26, 27.

Ẹhẹn iborhin ọnọ sabu rhe kpokpo ihworho ri ruẹ ọdandan ọghwaghwa ne. Jerẹ udje, Orodje David ọrhọ ya: “Erusọ mẹ a djọn mẹ ba otọre; aye i họhọ ohwan ọghwaghwa ri ghwa phan ha mẹ.” (Psalm 38:4) Ọrẹn Baibol na ọ yẹrẹ ọwan ifiẹrorhọ: “Jenẹ ọvwọkon o tiobọnu izede ọnẹyen, jenẹ ohworho ro ruẹ ogbongbon nyajẹ iroro yi vwo; jenẹ ọ ghwẹrioma bru i Jehova, ro no dje arodọmẹ riẹn, bru Osolobrugwẹ ame, fọkime ọye ọnọ harhomu ọrẹ izede ọduado.”—Isaiah 55:7.