“Mi Vwo Ekwẹre Ọgbogbanhon Bi”

AKPENYERẸN MẸ BI

E vwiẹri mẹ uvuẹn San Juan Chancalaito, amwa ọkokamu uvuẹn Chiapas, Mexico. Ekrun mẹ i nẹ itu Chol rhe, ẹko ihworho ri nẹ uvwiẹ i Maya rhe. Eri vwiẹri mẹ i vwiẹ emọ awan 12, mẹmẹ yẹ ọmọ ọrẹ isionrin usuẹn aye. Ọke mia ji ha ọmọvwerhe, mẹmẹ rhẹ imizu mẹ e yono i Baibol na rhẹ Iseri Jehova. Ọrẹn, ọrẹ omemwurhọ mie kwe ha urhebro i Baibol na ruiruo ọke mia ji kamu-u.

Ọke mia ha ẹgbukpe 13, mia ha imwu egbogbanhon jeghwai so uhi ne. Ọke ọnana ọye mia zẹ nẹ oghwa jeghwai ghwọghọ riẹ ekete sansan. Ọke mia ha ẹgbukpe 16, ni mia wian uvuẹn okegbe ra wọ igbo. Mi ha avwaye te ẹgbukpe owu, ason owu ọke ame a kpare igbo na riẹ ekete ọrọrọ rhẹ owọ, ehworhare ezẹko ri ha ẹko ihworho ra ji wian owian ọnana, ni me gidi ame rhẹ ekpọghọ. Mi sabu vabọ ọke aye a sa ekpọghọ nyoma mie pho rhẹ urhie jeghwai rhẹnrhẹn riẹ obẹta urhie na. Ọke o ru, ni mi zẹ riẹ United States.

Ọke mie te oboran, ni mi ji wian owian ọrana ji se rhẹ okpetu buebun. Fọkiẹ uhieso ọrhẹ ohworho mi joma kpe hwu, ne ne firi mẹ rhẹ ekanron ọke mia ha ẹgbukpe 19. Uvuẹn ekanron na, ni mi kwomakugbe ẹko ilogbozighi jeghwai vwobọrhọ irueruo ozighi sansan. Omarana, igọmẹti ni hare mẹ riẹ ekanron ọrọrọ rọ gbanhonron omamọ uvuẹn Lewisburg, Pennsylvania ra ha oja riẹ ihworho ri suẹ urhi eduado.

Uvuẹn ekanron rọ ha uvuẹn Lewisburg, uruemru mẹ no biomurhọ. Ra mẹriẹn taghene mi siẹn ekwakwa ilogbozighi rhoma na, nọ phẹrẹre mie kwomakugbe ẹko ilogbozighi ri ha uvuẹn ekanron ọnana. Uruemru ozighi egbe mẹ no biomẹrhọ, ọke ephian nọ yi mia wọnrọn jeghwai suẹ edon. Ọke owu, ni mi kwomakugbe ẹko ilogbozighi na vwobọrhọ owọnren owu uvuẹn ogodo ekanron na. Ame a ha ekwakwa ra ha ruiruẹn ọrhẹ ekwakwa ra ha sasoma wọnrọn. Na sabu dobọ owọnren na ji, elọkpa ekanron na ni ha itiẹgasi ruiruo. Ọke o ru, ere suẹn ekanron na ni hare mẹ riẹ ekete owu uvuẹn ekanron na re fiẹ ilogbozighi ra djoma rhọ. Mi vwo ekwẹre ọgbogbanhon bi, mia jeghwai ta erharhere ẹmro. Ọ phẹrẹ mẹ ri mie kpe ihworho omamọ. Itiọrurhomẹmro, ọ merhen mẹ oma. Oborẹ mie ruẹ na ọ vwọ da mẹ-ẹ.

OBORẸ I BAIBOL NA O RU WENE AKPENYERẸN MẸ

Uvuẹn ekanron mi havwọ na, mi vwa ruẹ otafe ọgbọ buebu-un, omarana, ni mie se i Baibol na ọke ephian. Ọke o ru, ọlọkpa owu nọ yẹre mẹ ọbe na You Can Live Forever in Paradise on Earth.a Ọke mie se ọbe ọrana, ni mi karorhọ ekwakwa buebun mi yonorin ọke mia ha ọmọvwerhe, ọke mie yono i Baibol na rhẹ Iseri Jehova. Ọke o ru, ni mie roro kpahen oborẹ ekwẹre mẹ ọ hobọte mẹ te ne. Mi ji roro kpahen ekrun mẹ. Ra mẹriẹn taghene imizu mẹ egbọtọ awanva i rhiẹ Iseri Jehova ne na, ni mie roro, ‘Aye ine nyerẹn bẹmẹdẹ.’ Ni mi nọ omamẹ, ‘Mẹmẹ vwo?’ Ọke ọrana yi mie brorhiẹn mi ne wene akpenyerẹn mẹ.

Ọrẹn, mi rheri taghene mi guọlọ userhumu ni mi sabu ru ewene na. Omarana, ukukaro ni mi nẹrhomo vwe Jehova Osolobrugwẹ jeghwai rẹ ye nọ ha userhumu mẹ. Riobarorhọ, ni mi ya ileta vwe oghọn ukoko ọrẹ Iseri Jehova rọ ha uvuẹn United States jeghwai nekpẹn uyono i Baibol. Oghọn ukoko na no ruẹ ẹkwaphiẹrhotọre nẹ imizu ri ha uvuẹn ukoko rọ kẹrẹre mẹ i bru mẹ rhe. Ọke ọrana, ekrun mẹ ọvo yẹ elọkpa na i ha uphẹn riẹn ni bru mẹ rhe, omarana, omizu owu uvuẹn ukoko na nọ ya ileta ra yẹ mẹ uduẹharhaghwẹ jeghwai dje ẹbe ukoko na vwe mẹ, enana ephian ni yẹre mẹ omwemẹ mi ne wene.

Ni mi kpare udjoghwẹ kirighwo ọke mie brorhiẹn mi ne nẹ orharhere ẹko mi havwọ ẹgbukpe buebun ne na. E ji fi ọro suẹn ẹko na rhẹ ekanron re fiẹ ilogbozighi ra djoma rhọ, ni mi brurie nya ọke omeronmo ame jeghwai ta riẹn taghene mi guọlọ rhiẹ Oseri Jehova. O gberi mẹ unu ọke rọ ta mẹ: “Orho mwẹro, ruie. Mi sabu dobọ ẹga ra ha rẹn Osolobrugwẹ jẹ-ẹ. Ọrẹn orhianẹ wu gi guọlọ nẹ ẹko na, wu rhe oborẹ ọnọ phia wẹn.”

Ẹgbukpe eva a vrẹn hin, ọlọkpa rọ hẹrote ekanron na no vwo oniso kpahen ewene mẹ. Omarana, aye i vwa rha djoma kpahen mẹ-ẹ. Jerẹ udje, aye i vwe rhe fiẹ ejọrọ rhẹ obọ mẹ ọke aye i rhe sun mẹ ya wọ-ọ. Owu usuẹn elọkpa na no bruru mẹ rhe jeghwai jirie mẹ ni mi rhe ruẹ ewene mẹ riobarorhọ. Habaye, ihworho ra hẹrote ekanron na ni hare mẹ riẹ ekete rọ kẹrẹ ekanron ọduado na, ro vwo vwo elọkpa bun ni mi daji avwaye ẹgbukpe owu rọ hẹrhẹre usuẹn ẹgbukpe mi na daji ekanron. Uvuẹn ẹgbukpe 2004, ọke mia ga te ẹgbukpe ikpe ne, ne tiobọnu mẹ jeghwai kpare mẹ rhẹ ibọsu ekanron na riẹ Mexico.

Ọke mie te Mexico, ni mi guọlọ Aghwẹlẹ Uvie Iseri Jehova. Ni mi riẹ uyono rhẹ ewun ekanron na—ro rhiẹ omamọ ewun ọvo mi vwori. Udabọ omẹhaphia mẹ, imizu na i dabu dedi mẹ sasasa. Ọke mia mẹrẹn uruemru esiri aye vwrurhe, ni mi rheri taghene mi ha uvwre Ilele Kristi urhomẹmro. (John 13:35) Uvuẹn uyono na, ekpako na ni ruẹ ẹkwaphiẹrhotọre ni mi vwo uyono i Baibol. Mi bromarhame jerẹ owuọwan usuẹn Iseri Jehova uvuẹn ubiamo September 3, 2005.

Uvuẹn ubiamo January 2007, ni mia ga ẹrhẹ ọkobaro ọke ephian, ni mia ghwọghọ inọke 70 kibiamo kibiamo yono ihworho i Baibol na. Uvuẹn ẹgbukpe 2011, ni mi ruotọre nẹ isukuru harẹn imizu ehworhare ri vwa ji rọnmọ (re rhe rhẹ Isukuru Ighwoghwẹmro Uvie na vwana). Isukuru ọnana ọ dabu ha userhumu mẹ omamọ sabu kpare ohwan mi vwori uvuẹn ukoko na.

Uvuẹn ẹgbukpe 2013, ni mi rọnmọ ane mẹ ọghoghanren re se Pilar. Nọ ta mẹ rhẹ ibiẹ echẹẹ taghene ọ bẹn ha riẹn ro no vwo imwẹro kpahen oborẹ mia ta riẹn kpahen akpọ mẹ bi. Mia rharhumu ghwẹrioma riẹ akpenyerẹn mi nyajovwo na-a. Mẹmẹ rhẹ ane mẹ i vwo imwẹro taghene aruẹ ohworho mi havwọ vwana o djephia taghene i Baibol na o vwo omẹgbanhon ro wene ohworho.​—Romans 12:2.

ERERE MI MẸRẸN NE

Mie roro taghene ẹmro i Jesu rọ ha uvuẹn Luke 19:10 o sekpahen mẹ. Ọke rọ ta: “[Mi] rhe mọ guọlọ jeghwai simi oborẹ o vruru.” Mi vwe rhe roro taghene emru o vru nẹ akpọ mẹ-ẹ. Habaye, mi vwa rha ha ẹkuọn rẹn ihworho ghwomara-an. Fọkiẹ oborẹ mi yonorin nẹ i Baibol na rhe, mia riamerhẹn obọdẹn akpenyerẹn ne, mie ji lele awọrọ nyerẹnkugbe ọrẹ ufuoma, ọrọ mai ghanren, mi rhi me vwo omamọ onyerẹnkugbe rhẹ Ọmemama mẹ Jehova.