“Mie Roro Taghene Mi Vwo Kemru Kemru Mi Guọlọre”

AKPENYERẸN MẸ BI

E vwiẹre mẹ uvuẹn Montreal amwa rọ maido ro titiri uvuẹn i Quebec, uvuẹn ẹkwotọre i Canada. Eri vwiẹre mẹ i dabu hẹrote mẹ rhẹ imizu mẹ awansa uvuẹn udumu ọrẹ Rosemont. Ame i riamerhen akpenyerẹn ufuoma kugbe.

Ọke mia ji ha ọmọvwerhe, mi vwo ẹguọlọ kpahen i Baibol na. Mi karorhọ ọke mia ha ẹgbukpe 12, mi dabu riamerhen isese obọrẹ a ha edjadjẹ i Greek ya uvuẹn i Baibol na rọ ta kpahen akpenyerẹn i Jesu. Ẹguọlọ ọrhẹ arodọmẹ ro vwo kpahen awọrọ, ọ dabu te mẹ ẹhẹn, omarana ni mi guọlọ hẹrokelie. Ọrẹ omemwurhọ, ọdamẹ ọnana no nẹ ẹhẹn mẹ ọke mia dua ọrhẹ ọke mie kwomakugbe erharhere igbehian.

Ọsẹ mẹ ohworho ro kporo emru ra ha so ijoro, o tiobọnu oborẹ ọ ha kporo ikpekporo na mẹ, ji yoni mẹ ni mi vwo ẹguọlọ kpahen ijoro ẹsuọ, omarana ni mi bọn akpenyerẹn mẹ kpahiẹn. Mia riamerhen ikpekporo omamọ, omarana o jiri-i, ni mi yono oborẹ e kporo isorogu. O jiri-i, mẹmẹ rhẹ igbehian mẹ ni vwo ẹko ijoro, ame na so ijoro uvuẹn ipati sansan. Ihworho ezẹko re ruẹ ijoro uvuẹn ikọmpini ro titiri ra so ijoro, ni djokarhọ mẹ jeghwai yẹ mẹ ikọntrati. Ni mi fiobọrhọ ọbe mi na wian rhẹ ikọmpini ra dabu rhe. Ihworho ni vwo omamerhomẹ kpahen ijoro mẹ omamọ, e ji kporie ọke ephian uvuẹn ekpetagboro uvuẹn Quebec.

Mie roro taghene mi vwo kemru kemru mi guọlọre. Mẹmẹ idama ro titiri, mia ji mẹrẹn igho buebun ọke mie ruẹ oborẹ ọ yẹ mẹ omamerhomẹ. Urhiọke orho te ni me riẹ ekete ra sasoma ya sasoma, vwobọrhọ erhonmie, mie ye fiobọrhọ ọbẹ ihworho ri titiri e fiobọrhọ, a ji mẹren mẹ uvuẹn ekpetughe. Ọke orho se ne, ni mie ye kporo jeghwai riẹ ipati sansan. Neneyo oma ọ dabu merhen otu na, ni mia da inyo egbogbanhon ọke mia ji ha idama, habaye bibiesuọn bibiesuọn ni mia ji ha imwu egbogbanhon. Mie ji nyerẹn fanrhiẹn fanrhiẹn jeghwai fiomarhẹ irueruo ọfanrhiẹn.

Ihworho ezẹko a rioma kpahen akpenyerẹn mẹ nime ọ họhọre taghene oma ọ merhen mẹ. Ọrẹn ẹhẹn mẹ ọ taghare, iroro e kpe mẹ fughwẹ, maido ọke mẹmẹ ọvo a havwiẹ. Ẹhẹn mẹ no seriotọre jeghwai vwo ọfiamu. Ọrẹ omemwurhọ, uvwrọke mie fiẹkparobọ, yẹ emiamo AIDS o kpe awanva usuẹn ihworho ri hare mẹ owian. Ọrana o gberi mẹ unu omamọ! Dedevwo mi vwo ẹguọlọ kpahen ijoro ẹsuọ, ni mi vwo utuoma kpahen enyerakpọ ro lelie.

OBORẸ I BAIBOL NA O RU WENE AKPENYERẸN MẸ

Udabọ efikparobọ mẹ, mi rheri taghene ovwo oborẹ ọsọre uvuẹn akpọ na. Mesoriẹ ovwo osehiẹn omamọ? Ni mie roro kpahen oborẹ ọsoriẹ Osolobrugwẹ ọvwọ ji kpare udjoghwẹ kpahiẹn. Itiọrurhomẹmro, ọgbọ buebun yi mia nẹrhomo vwe Osolobrugwẹ, ni mi mẹrẹn ẹkpahenrhọ mi guọlọre. Ọke mie ronmoma uvuẹn ekete mie ye nughe, ni mi rharhumu tuẹn i Baibol na ese ọgbọrọrọ. Dedevwo mia dabu vwẹruọ oborẹ mie se-e, mi mẹrẹnvwrurhe taghene oba akpọ na o tikẹrẹ ne.

Ọke mie se i Baibol na, ni mi mẹrẹnvwrurhe taghene uvwrọke owu, Jesu o zirin orhọmo ẹdọke 40. (Matthew 4:​1, 2) Ni mie roro taghene mi rhe ji ruẹ omaran, ọkezẹko Osolobrugwẹ ọnọ lẹrhe mẹ rhe yi, omarana ni mi fi ọke rhọ ye. Ikprughwre eva mi na ki tuẹn orhọmo ezirin rhọ, Iseri Jehova awanva ni ha obọ kanren ighwe mẹ, ni mi ji dede aye kamẹriẹn mi rheri taghene aye a sa. Ni mi tẹnrovi owuọwan usuẹn Iseri Jehova na re se Jacques, jeghwai nọ yen, “Marhẹ ye ne ru rhe taghene e nyerẹn uvuẹn ẹdẹ eri koba uvuẹn akpọ ọnana?” Ọrẹ ẹkpahenrhọ, no rhie i Baibol jeghwai se 2 Timothy 3:1-5. Ni mi nọ aye awanva enọ buebun, oborẹ aye i kpahenrhọ enọ na lele jeghwai bọn yen kpahen i Baibol na, o ghini te mẹ ehẹn omamọ. Ọke aye a rharhumu rhe emrẹ ọgbọ emwa, ni mi mẹrẹnvwrurhe taghene ovwo oborẹ ọsoriẹ mi ne zinrin orhọmo-o.

Ni mi tuẹn uyono i Baibol rhọ rhẹ aye rọ dabu nya riaro. Ọke o ru, ni mi da ẹton iseseri mẹ jeghwai tuẹn uyono ẹnya rhọ uvuẹn Aghwẹlẹ Uvie. Oborẹ e dediri mẹ sasasa ọke mie riẹ iyono enana, nọ dabu mwu mẹ ẹro taghene mi ghini mẹrẹn urhomẹmro na ne.

Itiọrurhomẹmro, ni mi sabu ha oborẹ mie yono nẹ i Baibol na ruiruo, o fori ni mi ruẹ ewene kirighwo uvuẹn akpenyerẹn mẹ. Emru owu vwọye, o fori ni mi dobọ imwu egbogbanhon ẹha ji jeghwai fioba rhẹ akpenyerẹn ọfanrhiẹn mie nyerẹn. O ji fo ni mi wene uruemru mie vwo ọdamẹ kpahen omamẹ ọvo jeghwai rhe dje omamọ ọdamẹ harẹn awọrọ. Ri mie rhiẹ ọsẹ ọrhẹ izu na, ni mi yono oborẹ mi ne ru hẹrote edamẹ erẹ ẹhẹn ọrhẹ erẹ ugboma emọ mẹ awanva. Omarana, ni mi sẹrerhumuji owian ijoro ẹsuọ jeghwai ya wian uvuẹn ikọmpini ra kwa ibiẹ igho.

Ewene enana mi ruru na, ọ lọhọ-ọ. Ọke mia damoma ni mi sẹrerhumuji imwu egbogbanhon ẹha, ọ ghwai lọhọ-ọ, nime mi mẹrẹn ebẹnbẹn ezẹko. (Romans 7:​19, 21-​24) Oborẹ ọ mai rhiẹ egbobọse ha mẹ, yẹ ọrẹ mi na sẹrerhumuji akpenyerẹn ọfanrhiẹn mie nyerẹn bi. Habaye, owian mia wian ọ ghwọghọ oma, igho ra kwa mẹ ọ kamurun omamọ. Ọ ha ibiamo esa mia ki mẹrẹn igho mia mẹrẹn inọke eva ọke mia so ijoro bi.

Ẹrhomo ọ ha userhumu mẹ sabu ruẹ ewene egbogbanhon enana. Mi ji merẹnvwrurhe taghene isese i Baibol i kẹdẹkẹdẹ oborẹ ọghanranren. Ekete ezẹko kirighwo uvuẹn i Baibol na i dabu bọn mẹ gbanhon. Owu vwọye yẹ 2 Corinthians 7:1, rọ ha urhebro rẹn Ilele Kristi nẹ aye i “ru [oma aye] fon nẹ i kemru kemru ri rhiẹ aghwa rẹn ugboma ọrhẹ ẹhẹn na.” Ekete ọrọrọ uvuẹn i Baibol na rọ dabu ha urhebro mẹ taghene mi na sabu tiobọnu iruemru ibiobiomu mẹ yẹ Philippians 4:13, rọ tare: “Mi vwo omẹgbanhon mie ru ekwakwa ephian nyoma ohworho rọ yẹre mẹ omẹgbanhon.” Jehova Osolobrugwẹ ọ kpahenrhọ ẹrhomo mẹ jeghwai ha userhumu mẹ dabu vwẹruọ oborẹ mi na ha irhomẹmro ri ha uvuẹn i Baibol ruiruo lele. Ọnana nọ lẹrhere mẹ homakpahontọre riẹn. (1 Peter 4:​1, 2) Mi bromarhame jerẹ owuọwan usuẹn Iseri Jehova ẹgbukpe 1997.

ERERE MI MẸRẸN NE

Ọ dabu mwu mẹ ẹro taghene orhianẹ mie ji nyerẹn aruẹ akpọ ọrana bi, manẹ mi hwu ne. Ọrẹn vwana, mia mẹrẹn omamerhomẹ uvuẹn akpenyerẹn mẹ ne! Ane mẹ ọghoghanren re se Elvie, ghini obọdẹn ebrurhọ ha mẹ. Ame awanva a mẹrẹn omamerhomẹ ọke ame a ha i Baibol na yono awọrọ kugbe, rẹ ame e rhiẹ ekobaro ọke ephian. Ọnana ọ yẹ mẹ obọdẹn aghọghọ ọrhẹ evwan ẹvuọn. Mi ghini kpẹmẹ i Jehova omamọ rọ ha mẹ kẹrẹ oma.​—John 6:​44.