Oborẹ Ene Ru Dje Ẹguọlọ Phia

Ẹgbukpe ezẹko i rha nyavrẹn ne, ẹguọlọ nọ kanren erọnmọ buebun. Orhianẹ we rhiẹromẹrẹn obẹnben ọnana uvuẹn orọnmo ọnọ, me wu ne ruo?

• Oborẹ o fori ne wu rhe

• Oborẹ wu na sabu ru

Oborẹ o fori ne wu rhe

Ẹguọlọ ọghanranren nẹ orọnmo ọ sabu gbanhon. Jerẹ oborẹ emaren ọrhẹ ame ọghanranren nẹ ugboma na ọ sabu gbanhon ji kpokpọ, omaran yẹ ẹguọlọ re djephia ọke ephian, ọ lẹrhẹ orọnmo gbanhan. Ẹgbukpe buebun i rha vrẹn dede, o fori nẹ esa ọrhẹ ane i rhe djephia taghene aye i ghini vwo ẹguọlọ kpahen omoma aye.

Obọdẹn ẹguọlọ ọvwọ guọlọ ọdamẹ omobọ ye-e. O ruẹ oborẹ ọnọ lẹrhẹ oma merhen ọreva ye. Omarana, ukperẹ aye ine dje ẹguọlọ phia ọke ro jerẹ aye ọvo, esa yanghene ane ro roro rẹn ọreva ye ọ mẹrẹn ọdamẹ ọreva ye vwrurhe, nọ jeghwai damoma ro no djephia taghene o vwo ọdamẹ kpahiẹn.

Ene yi mai guọlọ ẹguọlọ rẹ esa aye ono dje rẹn aye. Esa ọnọ sabu vwo ẹguọlọ kpahen aniẹ omamọ. Ọrẹn orho dje ẹguọlọ na phia urhiọke ọrhẹ owuọnwọn yanghene ọke aye a guọlọ bru ehware ọvo, orho mwu aniẹ ẹro taghene esa ye o vwo ẹguọlọ kpahiẹ-ẹn. Orhomurun omamọ ne rhe dje ẹguọlọ phia ọke ephian.

Oborẹ wu na sabu ru

Rhe dje ẹguọlọ phia nyoma ẹmro. Ẹmro jerẹ “Mi vwo ẹguọlọ kpahuọn” yanghene “Wẹwẹ ohworho ọghoghanren ha mẹ,” ọnọ lẹrhẹ ohworho wu rọnmọren rhe taghene wu vwo ẹguọlọ kpahiẹn.

Iruemru-urhi Baibol: “Ekwakwa buebun ri ha ọmudu na, yẹ ugbunu na ọ ta.”—Matthew 12:34.

Urhebro: Orhiẹ nyoma ẹmro ẹta ọvo ye wu ne dje ẹguọlọ rẹn ọrẹ wu rọnmọre-en. Ya aye—rhẹ ọbe riẹn, ọke we dje urhomu vwe yi uvuẹn itanẹti, yanghene nyoma ifonu.

Rhe dje ẹguọlọ phia nyoma irueruo. Wu na sabu rha gbaliẹ, fiọfiẹn unu, yanghene mọren obọ ye, no ghini rhe taghene urhomẹmro wa ta ọke wa ta riẹn taghene, “Mi vwo ẹguọlọ kpahuọn.” Wu na sabu dje ọdamẹ okokodo phia nyoma wu na hobọte yi, rha yẹ ye ẹghẹlẹ ọke ephian yanghene rha tẹnrovie ọrẹ ẹguọlọ. Wu na sabu ha userhumu rẹn anuọ—ọkezẹko nyoma wu ne lelie kpare ẹkpa ye, je ighwe ha riẹn, lelie ghwe imize, lelie fọrhọn ewẹn, yanghene lelie sere emaren? Harẹn ihworho buebun, ekwakwa enana i ghwẹ userhumu kpekpa—aye ẹguọlọ re djephia nyoma irueruo!

Iruemru-urhi Baibol: “O fori ne dje ẹguọlọ phia, [orhiẹ ọrẹ] ẹmro yanghene ugbunu ọvo-o, ọrẹn ọrẹ irueruo.”—1 John 3:18.

Urhebro: Rhe dje ẹguọlọ rẹn ohworho wu rọnmọren jerẹ oborẹ wu ruru ọke are a kọnrhẹ owuowọnwan.

Are i rha ghwọghọ ọke kugbe. Are arha ghwọghọ ọke kugbe, ọnọ lẹrhẹ orọnmo are gbanhon, ọnọ ji lẹrhẹ ọrẹ wu rọnmọren rhe taghene wa riamerhen okugbe yi. Itiọrurhomẹmro, ọnọ sabu bẹn rẹ are ina sabu ghwọghọ ọke kugbe orhianẹ are i vwiẹ emọ ne, yanghene are i vwo ewian are a wian kẹdẹ kẹdẹ. Ọkezẹko wu na sabu djiroro nẹ are awanva ọvo i rhe riẹ ada ọke ephian.

Iruemru-urhi Baibol: “Dabu gbẹro rhẹ ekwakwa ri mai ghanren.”—Philippians 1:10.

Urhebro: Ihworho ri rọnmọ ne ra wian owian ọke ephian ina sabu kwaphiẹ ọke rhotọre rẹ aye ine “riẹ ada ason” yanghene “ehion ọkprughwre” ọke ephian.

Dabu rhe ohworho wu rọnmọren. Ihworho ephian i vwo ovẹnẹ sekpahen ọke aye a mai guọlọ ẹguọlọ re ne dje rẹn aye. Are awanva i ta kpahen oborẹ are ine ru dje ẹguọlọ phia ọrhẹ ọke are a mai guọliẹ. Omarana, dabu rhe ruẹ edamẹ ọrẹ ohworho wu rọnmọren riẹn. Karorhọ taghene ẹguọlọ ọghanranren nẹ orọnmo ọ sabu gbanhon.

Iruemru-urhi Baibol: “Ẹguọlọ . . . ọ vwọ guọlọ ọdamẹ ọnẹyen ọvo-o.”—1 Corinthians 13:4, 5.

Urhebro: Ukperẹ wu na nekpẹn ẹguọlọ mie ohworho wu rọnmọren, nọ oma, ‘Me mi ne ru nẹ ohworho mi rọnmọren ọ sabu dje ẹguọlọ ha mẹ?’