Jehova Ọ ‘Hẹrote Owẹwẹ’

MESORIẸ ono mwu owẹwẹ ẹro taghene ẹmro erana ghini urhomẹmro, taghene i Jehova ọ ghini hẹrote owẹwẹ? Nime omaran i Baibol na ọ tare. 1 Peter 5:7 ọrhọ ta: ‘Ha ọfiamu enọ ephian dọn yen, nime ọ hẹrote owẹwẹ.’ Me yo djerie phia taghene Jehova Osolobrugwẹ ọ damerhọ owẹwẹ?

OSOLOBRUGWẸ Ọ HA EKWAKWA UGBOMA RẸN IHWORHO

Itiọrurhomẹmro, Osolobrugwẹ o vwo iruemru re wu guọlọre nẹ igbehian enọ i vwo. Igbehian re dje uruemru esiri ọrhẹ ẹhẹn ghwologhwolo harẹn omomayen, ne rhiẹ igbehian ri kpẹnkpẹnrẹn omamọ. Jerẹ oborẹ e rheri, Jehova o dje uruemru esiri ọrhẹ uruemru ghwologhwolo phia harẹn ihworho ọke ephian. Roro kpahen udje owu: ‘O ruẹ uvo yi lo mwu evwọkon ọrhẹ evwata, ọ jeghwai tiobọnu oso harẹn evwata ọrhẹ eri vwe rhiẹ evwata.’ (Matt. 5:45) Me yẹ uvo ọrhẹ oso e ruẹ? Haba ekwakwa erọrọ, nyoma aye, ‘Osolobrugwẹ o tiobọnu emaren rẹn ihworho, rọ lẹrhẹ ọmudu aye ghọghọ.’ (Acts 14:17) Itiọrurhomẹmro, Jehova o ruie nẹ otọre na ọ sabu rhomu emaren, ọrhọ vrẹn omamọ emaren, ibiẹ ekwakwa yọ lẹrhẹ oma merhen ọwan.

Mesoriẹ orhọmo o kpe ihworho buebun? Nime ihworho re suẹn a tẹnroviẹ oborẹ aye ine ru sabu vwo omẹgbanhon usuon ọrhẹ igho, ukperẹ aye ine ruẹ akpenyerẹn ituakpọ rhomurhọ. Phẹrẹkpẹ, Jehova ọ samọ kwaphiẹ ebẹnbẹn ufiuvwele ọrana rhọ, nyoma ono wene isuensun ọnana rhẹ Uvie ọnẹyen rọ ha obẹ odjuwu, rẹ Ọmọyen ono rhiẹ Orodje uvie ọrana. Ọke ọrana, orho vwo ọrẹ orhọmo ono kpe-e. Ọrẹn ọke ọnana, Osolobrugwẹ ọ hẹrote idibo yi ri fuevwan. (Ps. 37:25) Ọrana o djephia taghene ọye o ghini hẹrote ọwan?

JEHOVA Ọ VWỌ TOKPẸN ỌKE ỌNẸYE-EN

Omamọ ugbehian o fi ọke ọnẹyen rhotọre wẹn. Ọnọ sabu ha unọke buebun gbikun kpahen oborẹ ọmerhen are awanva oma. Omamọ ugbehian ọ dabu kerhọ ọke wa ta ebẹnbẹn re kpokpo ẹhẹn ọnọ riẹn. Jehova ọ dabu kerhọ omaran? Ee! Ọ kerhọ ẹrhomo ọwan. Omarana, Baibol na no jiririe rẹn ọwan ne ‘fioma rhẹ ẹrhomo ẹnẹ,’ ji tobọ ‘nẹrhomo ọke na ephian.’—Rom. 12:12; 1 Thess. 5:17.

Jehova o vwo omwemẹ rọ nọ kerhọ ẹrhomo ọnọ ọke ephian? Udje owu uvuẹn i Baibol na ọ kpahenrhọ ye harẹn ọwan. Jesu ọ ki sanọ inyikọ ye, ‘ọye ọ ha ọsoso ason na nẹrhomo vwe Osolobrugwẹ.’ (Luke 6:12) Uvuẹn ẹrhomo ọrana, ọkezẹko Jesu ọ hunute odẹ idibo yi owuowu, o roro kpahen iruemru aye ọrhẹ ekete aye e seriotọre, jeghwai nekpẹn userhumu mie Ọsẹ ye nọ sabu sanọ aye. Ọke rẹ urhiọke o te, Jesu nọ mẹrẹnvwrurhe taghene ọye ọ sanọ ihworho ri vi mwuovwan ri ne rhiẹ inyikọ ye ne. Jehova ro rhiẹ ‘Ohworho ro rhon ẹrhomo na,’ o vwo omamerhomẹ rọ nọ kerhọ ẹrhomo ephian ri nẹ ọmudu rhe. (Ps. 65:2) Ọrhọ tobọ rhianẹ ohworho ọ ha ọke buebun nẹrhomo kpahen ọdamẹ ọgbogbanhon ọnẹyen, Jehova o vwo kele uchiọgbọ ye-e.

OSOLOBRUGWẸ O VWO OMWEMẸ RỌ NỌ HARHOMU

Arha tẹmro kpahen ẹharhomu, ọ tobọ bẹn rẹn omamọ igbehian rẹ aye ina harhomu owuowọnwan. Ọkezẹko, ihworho a fan ugbehian rọ kpẹnkpẹnren omamọ, nime orhiẹ oborẹ ọ bẹnren omamọ aye ina harhomu owuowọnwan. Jehova o vwo ruẹ omara-an. Baibol na ọ ta rẹn ihworho ri vwo omamọ ẹhẹn nẹ aye i nekpẹn ẹharhomu ọnẹyen, ‘nime ọye ọnọ harhomu izede ọduado.’ (Isa. 55:6, 7) Me yo mwu Osolobrugwẹ harhomẹ nẹ ẹhẹn sa?

Fọkiẹ ẹguọlọ okokodo ọrẹ Osolobrugwẹ. Ọye o vwo ẹguọlọ kpahen akpọ na omamọ, no tiobọnu Ọmọyen, Jesu, no simi ituakpọ nẹ abọ ọdandan ọrhẹ ẹkuọn rọ rhua vwe ituakpọ. (John 3:16) Itiọrurhomẹmro, otan na o ru vrẹn omaran. Nyoma izobo i Kristi, Osolobrugwẹ nọ sabu harhomu ihworho ro vwo ẹguọlọ kpahen. Ọnyikọ John ọrhọ ya: ‘Ọwan i rha rhian edandan ọwan, ọye ọ fuevwan jeghwai ọvwata, ọnọ ha edandan ọwan harhomu ọwan.’ (1 John 1:9) Fọkiẹ ẹharhomu ọrẹ i Jehova, ihworho na sabu rhiẹ igbehian yen, e rhe ọnana nọ yẹ ọwan omamerhomẹ.

Ọ HA USERHUMU WẸN ỌKE WA GUỌLIẸ

Omamọ ugbehian ọ sa awọrọ erhumu, aye i rha guọlọ userhumu ọnẹyen. Omaran i Jehova o ji ruẹ? Ẹmro ọnẹyen ọrhọ ta: ‘[Odibo Osolobrugwẹ owu] ọrhọ tobọ se, ọ vwọ samọ se totọre-e, nime i Jehova ọ hobọtua ye.’ (Ps. 37:24) Jehova ọ ‘hobọtua idibo yi’ izede sansan. Djokarhọ oborerhiẹromẹrẹn obẹ ẹkwotọre Caribbean ọrẹ St. Croix.

Ibiẹ ọgbọtọ owu ọ mẹrẹn ọhiẹn nẹ obẹ ihworho ọye rhẹ aye e gba ha iklasi, nime ọ mroma aphiala fọkiẹ esegburhomẹmro ọnẹye-en. Ọke rọ nẹrhomo vwe i Jehova nọ sa ye erhumu, no brorhiẹn rọ nọ dẹrughwaroghwu ọhiẹn na. Ọye nọ ta rẹn otu iklasi na kpahen aphiala ẹmroma. Ọye nọ ha ọbe My Book of Bible Stories dabu dje kpahen ikun i Shadrach, Meshach, ọrhẹ Abednego rọ lẹrheriẹ brorhiẹn ọrana. Ọye nọ tare, ‘Jehova ọ sa otu i Hebrew awansa na erhumu, nime aye a ha ẹga rẹn oma na-a.’ Ọke ro ru, nọ ha ọbe na rẹn emọ isukuru na re ha avwaye. Otu iklasi na awan ikperọvo ni ha ọbe na. Rọ mẹrẹnvwrurhe taghene i Jehova yọ yẹriẹ omẹgbanhon ọrhẹ ẹghwanren rọ sabu ghwoghwo kpahen urhomu-ẹmro na, oma nọ merhen ibiẹ ọgbọtọ na.

Orhianẹ wu vwo ẹhẹn eveva taghene i Jehova ọ vwọ hẹrote owẹwẹ-ẹ, roro kpahen ekete i Baibol enana; Psalm 34:17-19; 55:22; ọrhẹ 145:18, 19. Nọ ihworho ri ha ukoko na jiri ne, kpahen oborẹ i Jehova ọ hẹrote aye lele. Wu rha guọlọ userhumu Osolobrugwẹ, nẹrhomo vwe yi kpahen erhirhiẹ na. Ne wu na mẹrẹn oborẹ i Jehova ọnọ ‘hẹrote owẹwẹ.’