Mẹmẹ Ọrhẹ Ọsẹ mẹ i Rharhumu kwaphiẹrhọ ne

AKPENYERẸN MẸ BI

Ihworho buebun a sa me nughe ame rọ zẹ nẹ ugbenu rọ ha uvuẹn amwa re se Pagsanjan uvuẹn i Philippines. Avwaye yẹ ọsẹ mẹ ro rhiẹ Nardo Leron ọ ghwanren uvuẹn erhirhiẹ ogbere. Ọke rọ mẹrẹn oborẹ isuesuon igọmẹti, elọkpa, ọrhẹ oborẹ iruemru ihworho uvuẹn ekete ro ruiruo i biomu te, oma ọ vwọ rhọ mẹrhiẹ-ẹn, ọnana nọ lẹrhiẹ tuekwẹre ọgbogbanhon.

Eri vwiẹre mẹ i damoma mọrọn emọ awan ẹrẹnren rẹ aye i vwiẹre. Ọgbọ buebun, aye e riẹ ekete oseseri ya guọlọ emaren ọrhẹ emamọ uvuẹn igbenu na. Ọkezẹko mẹmẹ rhẹ omizu mẹ ọkpako ro rhiẹ Rodelio ya hẹrote oma ame, ọnana nọ lẹrhẹ orhomo kpe ame omamọ. Ibiẹ ọke ọvo yẹ me i vwori ame ine ruiruẹn jerẹ emọvwerhe. Ghwai nẹ ẹgbukpe irhiruẹ, yẹ ame a tuẹn owian rhọ uvuẹn ikebi, rẹ ame a kpare ikokodia eghwaghwa rheren igbenu ri rienrun. Ohwan na ọrhọ ghwa phan, ame na lọriẹ lele otọre.

Ame e vwo edirin ọke ọsẹ ame ọrhọ fa ame, ọrẹn ọ da ame omamọ ọke ro kpe izu ame. Ame i damoma ame ina da ye ji, ọrẹn ame a sabu ruie-e. Mẹmẹ rhẹ Rodelio ni djiroro rẹ ame ine kpe ọsẹ ame, ame i rha ghwanren ne. Mi ghini guọlọ ọsẹ ro no vwo ẹguọlọ kpahen ame!

Fọkiẹ ozighi egbe ọsẹ mẹ, ẹhẹn mẹ nọ taghare, ni mia ji tuekwẹre, omarana ni mi zẹ nẹ oghwa ọke mia ha ẹgbukpe 14. Mi rhirhiẹ uvuẹn idumu jiri ibiesuọn, ni mie ji phopho igbo. O jiri-i, ni mia ghwa owọ, ri mia kpare ihworho riẹ ekete ame o zẹ nẹ ugbenu na.

Ẹgbukpe ezẹko a vrẹn, ni mi riẹ uvuẹn isukuru ọduado rọ ha uvuẹn i Manila. Ọrẹn, fọkime mie riẹ Pagsanjan ya wian uvuẹn ehion ikprughwre na, mi vwa rha mẹrẹn omamọ ọke mi ne yono obẹ isukuru na-a. Akpenyerẹn mẹ ni fanrhiẹn fanrhiẹn, imwu egbogbanhon ẹha ọ vwọ rhọ lẹrhẹ ẹhẹn mẹ totọre-e. Ni mia ha imwu ri na lẹrhẹ iroro mẹ riotọre jerẹ cocaine ọrhẹ heroin. Ni mie gbọfanrhiẹn fọkiẹ imwu egbogbanhon mia ha. Ogbere, osehiẹn ọrhẹ ojẹriọ ọye mi dẹrughwaroghwu ọke ephian. Ni mi vwo utuoma kpahen igọmẹti, nime mie roro taghene aye ya suẹ ekwakwa enana. Omaran, ni mi nọ Osolobrugwẹ, “Mesoriẹ akpọ o rhirhiẹ omana?” Ọrẹn mia sabu mẹrẹn ẹkpahenrhọ enana uvuẹn ẹga buebun mi nyare-en. Ni mia ha imwu egbogbanhon buebun neneyo ẹhẹn mẹ ọ sabu totọre.

Uvuẹn ẹgbukpe 1972, emọ isukuru ri ha uvuẹn i Philippines ni ludje fọkiẹ oborẹ igọmẹti e ruẹ. Ni mi homaba aye ọke owu, ọnana nọ suẹ ozighi. Ne mwu ihworho buebun rhẹ ekanron, ibiamo ezẹko a vrẹn, na ha urhi mwu lele ọsoso ẹkwotọre na taghene isodja yi na hẹrote erhirhiẹ rọ ha otọre na.

Mie rhe vwo ekete mie rhirhiẹ ghwomara-an, ni mia ji zẹ nẹ elọkpa i je rhe mwu mẹ fọkiẹ ozighi egbe mẹ. Ni mi sabu mẹrẹn igho dẹ imwu egbogbanhon, ni mie so uhi, mia ji kpare igberadja vwe edafe ọrhẹ epha. Mia damerhọ sẹ mi nẹ hwuo yanghene mi hwuẹ-ẹ.

Uvwre ọke ọrana, Iseri Jehova a ha i Baibol na yono izu mẹ ọrhẹ omizu mẹ ọmọvwerhe ne. Ọsẹ mẹ ọ tuekwẹre kpahiẹn, omarana nọ torhẹ ẹbe ukoko na rẹ aye i vwori. Ọrẹn aye awanva i vwo erhionrin ji fiomarhọ uyono na, aye ni bromarhame.

Ẹdẹ owu, Oseri Jehova owu nọ ta rẹn ọsẹ mẹ kpahen ive rọ ha uvuẹn i Baibol na sekpahen obaro akpọ rẹ orhienbro ọsoso ono rhirhiẹ. (Psalm 72:12-​14) Ive ọnana ọ lẹrhẹ oma merhen ọsẹ mẹ omamọ, nọ lẹrherẹ brorhiẹn ro no yono rhọ. No yonorin uvuẹn i Baibol na kpahen ive Osolobrugwẹ kpahen obọdẹn igọmẹti ọrhẹ oborẹ ọ guọlọre miẹ esa ọrhẹ esẹ. (Ephesians 5:​28; 6:4) O jiri-i, ọye ọrhẹ imizu mẹ ephian ni rhiẹ Iseri Jehova. Nime mi ha ekete ro sereri, mie rhe kpahen ewene enana-a.

OBORẸ I BAIBOL NA O WENE AKPENYERẸN MẸ LELE

Uvuẹn ẹgbukpe 1978, ni mi kwa riẹ Australia. Ẹhẹn mẹ o totọre-e, dedevwo amwa na o vwo ufuoma, akpenyerẹn ọ ji lọhọ uvuien. Mie ji tiobọnu imwu egbogbanhon ẹha ọrhẹ inyo ẹda vrẹn oma-a. Uvuẹn ẹgbukpe ọrana, Iseri Jehova ni bruru mẹ rhe. Mi vwo ẹguọlọ kpahen oborẹ aye i dje mẹ kpahen akpọ ufuoma uvuẹn i Baibol na, ọrẹn ofẹn o mwu mẹ mi na homaba aye.

O jiri-i, ni mi rharhumu ghwẹrioma riẹ Philippines ya daji ikprughwre ezẹko. Imizu mẹ ni ta mẹ taghene ọsẹ ame o wene rhiẹ omamọ ohworho ne, ọrẹn mia ji tuekwẹre kpahiẹn, ni mia damoma ni mi sabu kẹnoma riẹn.

Omizu mẹ ọmọvwerhe ọgbọtọ nọ dabu dje mẹ nẹ uvuẹn i Baibol na oborẹ ọsoriẹ ojẹriọ ọrhẹ osehiẹn a vuọn akpọ na. O gberi mẹ una taghene ibiẹ ọgbọtọ rọ vwọ ji do te edje ọ sabu kpahenrhọ enọ mẹ. Mi ki ghwẹrioma rie, ọsẹ mẹ nọ yẹre mẹ obẹ na You Can Live Forever in Paradise on Earth.a Nọ tare: “Wu vwa guọlọ ẹkpahenrhọ enọ enọ uvuẹn izede rọ sọre-e. Ọbe ọnana ọnọ ha userhumu wẹn mẹrẹn ẹkpahenrhọ wa guọlọ.” No jiririe mẹ ni mi guọlọ Iseri Jehova mi rhe te Australia.

Mi nyalele urhebro ọsẹ mẹ, ni mi guọlọ Aghwẹlẹ Uvie Iseri Jehova rọ kẹrẹ oghwa mẹ uvuẹn i Brisbane. Ni mi tuẹn uyono i Baibol rhọ. Aruẹmẹrẹn i Baibol jerẹ eri ha uvuẹn i Daniel urhomu-ẹmro 7 ọrhẹ Isaiah urhomu-ẹmro 9, i dje mẹ taghene igọmẹti Osolobrugwẹ ro vwo vwo obiobiomu owurowu yo no suẹn ọwan obaro na. Mi yonorin taghene ana riamerhen i Paradais uvuẹn akpọ na. Mi guọlọre taghene Osolobrugwẹ o vwo ekwerhọ mẹ, ọrẹn mi rheri taghene o fori mi suẹn iroro mẹ, kẹnoma rẹn imwu egbogbanhon ẹha ọrhẹ inyo ẹda vrẹn oma jeghwai wene orharherẹ akpenyerẹn mẹ. Ni mi nyaji ọse ro lele mẹ rhirhiẹ vwo, jeghwai tiobọnu erharhere iruemru mẹ. Rẹ ẹruẹhaso mi vwo kpahen i Jehova ọ gbanhanrhọ, ni mia nẹrhomo nọ sa mẹ erhumu ruẹ ewene erọrọ.

Bibiesuon bibiesuon, ni mi mẹrẹnvwrurhẹ taghene oborẹ mie yono ọ ghini sabu wene ohworho. Baibol na ọ tare taghene arha damoma, ana sabu “ku uruemru ọkpokpọ na rhọ.” (Colossians 3:​9, 10) Ọke mia damoma ruẹ ewene enana, ni mi mẹrẹnvwrurhe taghene oborẹ a ta mẹ kpahen ọsẹ mẹ taghene o wene uruemrie ne, ọnọ sabu rhiẹ urhomẹmro. Ukperẹ mi na tuekwẹre kpahiẹn jeghwai kẹnoma riẹn, o fori ni mi lelie nyerẹn ọrẹ ufuoma. Obẹtaye, ni mi harhomu ọsẹ mẹ jeghwai sẹrerhumuji ẹhẹn utuoma ri mi vwori kpahiẹn nẹ ọke emọvwerhe rhẹ..

ERERE MI MẸRẸN NE

Jerẹ idama, ọ phẹrẹ ri mie kuomakugbe awọrọ ru oborẹ ọsọre. Orhetio i Baibol na ọ haphia ọgbare uvuẹn erhirhiẹ mẹ​—orharhere okugbe o sunrun mẹ vru. (1 Corinthians 15:33) Ọrẹn vwana, mi vwo obọdẹn igbehian ri rhiẹ Iseri Jehova, aye i ha userhumu mẹ rhiẹ omamọ ohworho ne. Usuẹn aye yi mia mẹrẹn ane mẹ, Loretta. Ame awanva e yono ihworho oborẹ i Baibol na ono ru ha usehumu rẹn aye.

Mi kpẹmẹ i Jehova fọkiẹ i Baibol na ro tiobọnu, ọsẹ mẹ o wene rhiẹ ohworho rọ nọ jọ sabu rhirhiẹ dẹ, nọyẹ esa ro vwo ẹguọlọ kpahen aniẹ, ọrhẹ Olele Kristi ro vwo ẹguọlọ kpahen ufuoma ro ji vwo omeriotọre. Ọke mia mẹrẹn ọsẹ mẹ ọke mie bromarhame hin uvuẹn ẹgbukpe 1987, nọ gbalere mẹ ọke ukaro uvuẹn ọsoso akpọ mẹ!

Ọ vrẹn ẹgbukpe 35 rẹ ọsẹ mẹ o kuomakugbe izu mẹ vwobọrhọ owian ra ha i Baibol na yono ihworho. No mo rhiẹ ọhworhare ro vwo ọdamẹ awọrọ, re ji rhe rhẹ ohworho rọ ha userhumu rẹn awọrọ. Uvwre ẹgbukpe erana, ni mi yono oborẹ mi ne ru họghọ rẹn ọsẹ mẹ jeghwai vwo ẹguọlọ kpahiẹn. Oma ọ merhen mẹ taghene mẹmẹ ọmọyen! O hwuru uvuẹn ẹgbukpe 2016, ọrẹn mie roro kpahiẹn ọke ephian, nime ame awanva i ru ewene eduado fọkime ame i ha iyono i Baibol ruiruo. Mie vwo utuoma kpahen ohworho owuorowu ghwomara-an. Oma ọ merhenren mẹ omamọ taghene mi yono kpahen Ọsẹ mẹ rọ ha obẹ idjuwu, Jehova Osolobrugwẹ, ro veri taghene ono fioba rhẹ ekwakwa ephian ra suẹ omemwurhọ rẹn ekrun uvuẹn ekete sansan.