Oborẹ ọ Tan Emru Kugbe rọ ha Uvuẹn Aranmo re se Barnacle

Ihworho re yono kpahen eranmo i djokarhọ omẹgbanhon rẹ aranmo re se barnacle o vwori rọ ha tamwu itita, erhan ri ha uvuẹn ame ọrhẹ ugboma ikuna. Barnacle na o vwo oborẹ ọ tan emru kugbe rọ gbanhon ghwẹ ekwakwa erọrọ ra ha tan ekwakwa kugbe. Ọrẹn o vwo jijiri na, yẹ ihworho buebun i rhe oborẹ i barnacle o ru tamwu ekwakwa ri kpọtọre.

Roro kpahen ọnana: Iyono i djerie phia taghene barnacle ọkokamu rọ họhọ ukolowọre, o ni ekete sansan sua bọmọke ọ ki djẹ ekete rọ nọ tamwu. Ogege ọrhọ mẹrẹn ekete na ne, no won ekwakwa eva. Ọrukaro, oborẹ ọ họhọ imrin ro tiẹ ame nẹ oberun ekete rọ guọlọ tamwu na. Imrin na ọ ji lẹrhiẹ phẹrẹ rẹ ekwakwa ọreva ro wonrin na, ọnọ tamwu ekete rọ djẹre na, ro vwo oborẹ e se phosphoproteins.

Ekwakwa eva enana ne ruẹ oborẹ ọ tamwuẹ rẹ oborẹ e se bacteria ọnọ jọ sabu ghwọghọ. Ọghanranren omamọ nẹ oborẹ ọ tamwuẹ na ọ dabu gbanhon fọkime avwaye yi barnacle na ono rhirhiẹ ọsoso akpenyerẹn yen.

Oborẹ i barnacle o ru ruẹ oborẹ ọ tan emru kugbe lele, okodo ghwẹ oborẹ otu isaiyẹnsi i roririe rhọ bi. Owuọwan usuẹn eri mẹrẹn ona ọnana vwrurhe nọ tare: “Ọnana ghwai oborẹ ana kwaphiẹ obẹnbẹn lele ọke arha mẹrẹn ebẹnbẹn oberun ame.” Oborẹ a mẹrẹnren na, ọnọ ha userhumu rẹn otu isaiyẹnsi ruẹ oborẹ ọ tan emru kugbe ra na sabu ha ruiruo uvuẹn ame, oborẹ ana sabu ha tan ekwakwa ẹlẹtriki kugbe ọrhẹ ọke re simi oma.

Me wu rorori? Oborẹ ọ tan emru kugbe ri barnacle o vwori na, ọ varhe? Gbinẹ a ma riẹn?