Kiki Ya Kwaphiẹrhọ Rhẹ Omizu Ọnọ—Izede ọgo?

Gbe rororie taghene we nyerẹn uvuẹn i Galilee uvwre ọke i Jesu. Wu riẹ i Jerusalem ya riorẹ ọrẹ Oghwọgbọ na. Amwa na ọ vuọnren rhẹ ihworho ri ma ha ogame phia, aye i nẹ ekete ri sereri yanghene eri kẹrẹre rhe. Wa guọlọ ze izobo harẹn i Jehova. Omarana, rhẹ ẹvwe wu kpare lele oma, ne wu tuẹn ugbonya rhọ uvwre ihworho buebun riẹ oghwa ẹga na. Ọke we te avwaye, oghwa ẹga na ọ vuọnren rhẹ ihworho ri ji guọlọ ze izobo. Vwana, o te ọke wu na ha ẹvwe ọnọ rẹn orherẹn na ne. Ọke ọrana, ne wu karorhọ taghene omizu ọnọ rọ nọ sabu ha uvwre otu na yanghene rọ ha uvuẹn amwa na, o ru ruo sọ. Jesu nọ ta kpahen oborẹ wu sabu ru. (Se Matthew 5:24.) Marhẹ owẹwẹ ọrhẹ omizuo ro ru ruo sọ na, ine ru sabu guọlọ ufuoma jerẹ oborẹ i Jesu ọ tare? Uvuẹn ẹmro ri ha obotọre na, djokarhọ ẹkpahenrhọ rọ gbare.

O FORI NE WU . . .

• tẹmro rẹn omizu ọnọ orhianẹ wu rorori taghene o vwo obọdẹn iroro rọ soriẹ evwan e biomie

• damoma kpọ iroro omizu ọnọ vi, orhianẹ wu rorori taghene evwan e kiki biomie phan yanghene ọye ọ ji suẹ ẹghwọ na

• Dabu kerhọ ọke omizu ọnọ ọ ta oborẹ ọ ha ẹhẹn yen wẹn, ọrhọ tobọ rhianẹ wa dabu vwẹruọ oborẹ ọ ta-a, rhomunu nẹ ẹhẹn rhe fọkiẹ emiamiamo wu so hariẹn yanghene oborẹ re vwe roro rhọ ro nerhumu oborẹ wu ruru na

O FORI NẸ OMIZU ỌNỌ . . .

• ọ guọlọ userhumu awọrọ ri ha uvuẹn ukoko na nyoma rọ nọ ta rẹn aye kpahen orusọ na

• ọ ta orharhere ẹmro kpahuọn, hunute ọsoso orusọ na, jeghwai guọlọ taghene wu rhomunu riẹn

• ọ djokarhọ omeriotọre ọrhẹ uduefigbere re wa nya bre, nọ jeghwai harhomu nẹ ẹhẹn rhe

Dedevwo ọwan i vwa rha ha izobo eranmo ba ogame ọwan inyenana-a, me yi Jesu ọ ta kpahen onyerẹnkugbe rọ havwiẹ uvwre ufuoma rhẹ omizu ọwan uvuẹn ukoko na ọrhẹ ogame Osolobrugwẹ o kwerhọ?