Mesoriẹ Osolobrugwẹ O Vwo Ukoko?

1. Mesoriẹ Osolobrugwẹ o koko emọ lsrael ahwanren?

Osolobrugwẹ o koko unuoghwa Abraham rhiẹ agbamwa, nọ ji yẹ aye irhi ri ne sun ayẹ. O se agbamwa na ‘Israel,’ aye yi ton ẹga ọrẹ urhomẹmro rhọ, ji ru lele ẹmro Osolobrugwẹ. (Psalm 147:19, 20) Omaran na, ituakpọ ephian ena sabu mẹrẹn erere mie itu Israel.—Se Genesis 22:18.

Osolobrugwẹ ọ djẹ itu Israel nẹ aye rhirhiẹ iseri enẹyen. Ikun ahwanren kpahen itu Israel o dje oborẹ ituakpọ e mẹrẹn erere ọke rẹ aye e ru lele irhi Osolobrugwẹ. (Deuteronomy 4:6) Omaran na, nyoma Israel rhe, awọrọ ena sabu rhe Osolobrugwẹ urhomẹmro na.—Se Isaiah 43:10, 12.

2. Mesoriẹ Ilelikristi ọrẹ urhomẹmro e koko?

Ọkẹ oru, itu Israel ne kpare onyerẹnkugbe aye rhẹ Osolobrugwẹ fughwẹ, omaran na, Jehova nọ ha ukoko Ilelikristi wene aye. (Matthew 21:43; 23:37, 38) Ukpe ro no rhiẹ itu lsrael, Ilelikristi erẹ urhomẹmro nọ yẹ Iseri Jehova.—Se Acts 15:14, 17.

Jesu o dje idibo yi nẹ aye ye ghwoghwo harẹn ihworho uvuẹn egbamwa na ephian, nẹ aye ji yono aye kpahen oborẹ aye ine ru sabu rhiẹ idibo i Jesu. (Matthew 10:7, 11; 24:14; 28:19, 20) Uvuẹn ehion enyerẹn akpọ ọnana, owian aghwoghwo na o riẹ ehion ne. Ọnana ọyẹ ọke ukukaro uvuẹn ikuegbe ituakpọ i Jehova okoko iduduru ihworho nẹ egbamwa ephian rhiẹ ẹga urhomẹmro. (Revelation 7:9, 10) Ilelikristi urhomẹmro eha uvuẹn onyerẹnkugbe owu, nọ ye soriẹ aye a sabu ha userhumu rhẹ uduẹharhaghwẹ rẹn owuowọnwan. Ekete akpọ na okeri te uyono urhomẹmro owu ọvo ro nẹ i Baibol na rhe ọyẹ aye e yono.—Se Hebrews 10:24, 25.

3. Marhẹ ukoko Iseri Jehova ọtonrhọ lele ọke ọwan na?

Uvwre ẹgbukpe 1870, ibiẹ otu krẹn re yono i Baibol, ni mẹrẹn urhomẹmro i Baibol na vwrurhe. Aye rheri taghene i Jesu ọ ta harẹn ukoko Ilelikristi nẹ aye ghwoghwo, omaran na, aye ni ton owian aghwoghwo akpọ ephian rhọ. Uvuẹn ẹgbukpe 1931, aye ni ha odẹ na, Iseri Jehova.—Se Acts 1:8; 2:1, 4; 5:42.

4. Ẹkwaphiẹrhotọre ego yẹ Iseri Jehova i vwori?

Ilelikristi erẹ ẹgbukpe uzusiorin ọrẹ ukaro uvuẹn ẹkwotọre sansan, e mẹrẹn erere nẹ ẹkwaphiẹrhotọre ọrẹ ẹko ugboma usuon ri vwrurhe i Jesu taghene ọye yẹ Urhomu ro sun ukoko na. (Acts 16:4, 5) Omaran ọ ji havwọ ẹdọkẹ ọrẹ inyenana, Iseri Jehova uvuẹn ekete akpọ na okeri te, aye a mẹrẹn erere miẹ Ugboma suon rhẹ ekpako ukoko na. Aye a hẹrote eghọn ukoko, kugbe owian erhianrhian, ẹbe efomu, aye je ghalẹ ẹbe re yono i Baibol edjadjẹ ri vrẹn 600. Omaran na, Ugboma Usuon na ọ ha urhebro kugbe ọkpọvi rẹn ikoko ri vrẹn 100,000 ekete akpọ na okeri te. Uvuẹn ukoko owuowu, ihworhare ri mwovwan a ga uvuẹn ẹrhẹ ekpako ukoko, yanghene iniruo. Ehworhare enana a herọte igegede Osolobrugwẹ rhẹ ẹguọlọ.—Se 1 Peter 5:2, 3.

Iseri Jehova i vwo ẹkwaphiẹrhotọre rẹ aye eghwoghwo iyẹnrẹn esiri na, aye ji yono ihworho nẹ aye rhiẹ idibo i Jesu. Jerẹ inyikọ na, ame eghwoghwo nẹ oghwa riẹ oghwa. (Acts 20:20) Ame e ji yono ihworho ri vwo ẹhẹn esiri kpahen urhomẹmro ro ha uvuẹn i Baibol na. Jọrẹn, ukoko Iseri Jehova rhẹ ukoko ghemeghe-e. Ame ephian imizu ri vwo ẹguọlọ rhẹ ọdamẹ kpahen owuowọnwan. (2 Thessalonians 1:3) Ihworho i Jehova i vwo ẹkwaphiẹrhotọre rẹ aye ine ru ọhọre Osolobrugwẹ, ọrhẹ aye ena ha userhumu rẹn awọrọ, nọ ye soriẹ aye rhiẹ ihworho oma ọmai merhan uvuẹn otọrakpọ na.—Se Psalm 33:12; Acts 20:35.