UYONO 4

Izede ro Serhọ ra na nya ha Ekete i Baibol Phia

Matthew 22:41-45

OBORẸ ENE RUO: Mwuegbe ẹhẹn otu na wu ki se ekete i Baibol.

Roro kpahen oborẹ ọsoriẹ we se ekete i Baibol na. Hunute ekete i Baibol owuowu izede rọ nọ lẹrhẹ otu na kpomavi rẹn ihwẹnmro ri ha ekete wu seri na.

Dabu ni ekete wu seri na fiotọre. Wu rhe se ekete i Baibol jeghwai hunute ohworho rọ tẹmro na, jenẹ o mwuo ẹro taghene ekete wu hunute na ọ gbare.
Jenẹ ihworho na rhe ọrẹ o vwo i Baibol na. Wa rha tẹmro rẹn ihworho ri vwo esegburhomẹmro kpahen Osolobrugwẹ, jenẹ aye i rhe taghene i Baibol na Ẹmro Osolobrugwẹ, omarana aye ni na sabu rhe taghene i Baibol na ọ vuọnren rhẹ ẹghwanren Osolobrugwẹ.
Jenẹ aye i vwo omamerhomẹ kpahen ekete i Baibol wu se me se na. Nọ onọ ri Baibol na ọnọ kpahenrhọ, hunute ọbẹnbẹn ri Baibol na ọnọ sa aye erhumu fikparobọ, yanghene tẹmro kpahen uruemru-urhi ri Baibol na ọnọ dabu dje fiotọre.

Roro kpahen oborẹ otu na i rhe kpahen oghwẹmro ọrana ọrhẹ i Baibol na ne. Se ekete otu na i rheri lele izede rọ nọ merhen aye oma, rọ nọ ji sabu lẹrhẹ aye yono emru ọkpokpọ.