UYONO 2

Izede Ikuegbe

2 Corinthians 2:17

OBORẸ ENE RUO: Tẹmro lele izede rọ serhọ, rọ ji dabu dje aruẹ ukẹro wu ha ni oghwẹmro na ọrhẹ ihworho ra kerhọ na.

Jomarhotọre mwuegbe jeghwai nẹrhomo. Nẹrhomo vwe i Jehova nọ ha userhumu wẹn tẹnrovi urhomu we ghwoghwo na ukperẹ ono rhiẹ oma ọnọ. Fiẹ ihwẹnmro wu na ta kpahen na rhẹ ẹhẹn. Tẹmro na lele izede ikuegbe, ukperẹ wu ne se kẹmro kẹmro rọ homaphia uvuẹn ọbe ẹmro na.

Orho rhiẹ i Baibol na yanghene ọbe ukoko na ọrọrọ ye wu bọn ẹmro na kpahen, dabu rienrian oma rhẹ ekete na neneyo isese na ọ sabu fiotọre. Wa rha guọlọ se oborẹ ihworho i tare, se ẹmro aye rhẹ aruẹ uvwele ro serhọ, ọrẹn wu vwe ruie pha-an.
Tẹmro nẹ uvuẹn ọmudu ọnọ. Roro kpahen oborẹ ọsoriẹ otu na a guọlọ kerhọ urhomu na. Tẹnrovi ihworho na. Wu rhe ru ọnana, oborẹ wu mevi lele, ughwaruọ, ọrhẹ oborẹ wa ha abọ ruiruo lele, no no djephia taghene wu rhe ọdamẹ aye.

Rhe ovẹnẹ rọ ha uvwre ẹmro ro serhọ ọrhẹ ọrẹ o vwo serhọ. Sẹrorẹ ọghanromẹ urhomu na nyoma wu na ha ẹmro ri fiotọre ọrhẹ eghwẹmro ri serhọ ruiruo.
Ni otu na. Rha kpare ughwaro ni otu na ọke ro serhọ. Wa rha ha ẹmro phia, o fori ne wu ni owọnwan ọvo uvwre ọke, ukperẹ wu ne ni yanghene tẹnrovi ọsoso ihworho uvuẹn otu na.