Ibisikiti Harẹn Arimwamwa mẹ
“UVUẸN ọtonrhọ ẹgbukpe 2014, mẹmẹ ọrhẹ arimwamwa mẹ na nya kugbe uvuẹn erhẹrhẹ amwa rẹ ame e rhirhiẹ. Ọke ephian ya mẹrẹn Iseri Jehova re meviẹ kẹrẹ ophanphan aye je ẹbe rhọ uvuẹn erhẹrhẹ amwa na. Aye a dabu sẹ osẹme, ji mroma kohworho kohworho rọ nyavrẹn rhẹ echẹẹ, omaran Nick, ro rhirhiẹ Oregon, U.S.A ọ yare.
“Iseri Jehova na e dje uruemru esiri rẹn ihworho, omaran ji te arimwamwa mẹ. Ẹdẹ owu, Elaine, ro mevi kẹrẹ ophanphan yen ro je ẹbe rhọ, nọ ha ibisikiti rẹn arimwamwa mẹ eva. Nẹ ọke ọrana nyarhẹn, kọke kọke ame i rha nya te ekete ophanphan Iseri Jehova na, aye na guọlọ riẹ avwaye neneyo aye i sabu ya riẹ ‘ibisikiti.’
“Ibiamo ezẹko ni nyavrẹn. Erimwamwa mẹ a riamerhen ibisikiti aye, mẹmẹ na ji riamerhen uyono i Baibol rhẹ Iseri Jehova na. Ọrẹn, mia guọlọ lele aye tẹmro pha-an. Mi vrẹn ẹgbukpe 70 ne, mia ghwai vwo imwẹro kpahen iyono Iseri Jehova na-a. Fọkime ishọshi buebun i vwe ruẹ lele oborẹ i Baibol na ọ tare-e, ni mi brorhiẹn omẹmẹ ọvo ine yono i Baibol na.
“Uvwre ọke ọrana, ne mi mẹrẹn Iseri Jehova erọrọ ri ji mevi kẹrẹ ophanphan aye re je ẹbe rhọ uvuẹn ekete ọrọrọ uvuẹn amwa na. Aye e ji lele ihworho ruẹ kugbe. Aye a ha i Baibol na kpahenrhọ enọ ra nọren aye ọke ephian, omarana ne mi hẹroso aye rhọ.
“Ẹdẹ owu, Elaine nọ nọren mẹ, ‘Wu kwerhọ ye taghene eranmo ẹghẹlẹ ro nẹ obẹ Osolobrugwẹ rhe?’ Ni mi kpahenrhọ ye, ‘Ee, mi kwerhọ!’ Elaine no dje Isaiah 11:6-9 mẹ. Nẹ ọke ọrana rhe, ne mi guọlọ yono i Baibol na rhọ, dedevwo mie ji ruẹ sikẹnsikẹn mi na ha ẹbe.
“Uvuẹn ẹdẹ ri lelirie, ni mia riamerhen obọdẹn uyono kpeke rhẹ Elaine kugbe esa ye re se Brent. Aye ni ta mẹ taghene mi se ọbe Matthew fiẹ Acts, ne mi sabu vwẹruọ oborẹ o mevirhọ ra na hẹrokele i Kristi. Ni mi ru te omaran. O jiri-i, ni mi kwerhọ uyono i Baibol rhẹ Brent kugbe Elaine. Ọrana ọ phiare erhẹrhẹ ẹgbukpe 2016.
“Mia dabu riamerhen uyono i Baibol mẹ kọkprughwre kọkprughwre ọrhẹ uyono ukoko uvuẹn Aghwẹlẹ Uvie. Mi vwo ebrurhọ ọrhẹ obọdẹn aghọghọ fọkime mie yono oborẹ i Baibol na ọ ghini ta. Ibiesuọn ọ vrẹn ẹgbukpe owu, ni mi bromarhame rhiẹ Oseri Jehova. Vwana, mi ha ẹgbukpe 79, mi rheri taghene mi mẹrẹn ẹga urhomẹmro na ne. Jehova ọ ha ebrurhọ mẹ ne nyoma rọ ha mẹ ba usuẹn ekrun ra ga ye.