Hulda ọ Nyamwu Ẹkẹ ye

ORHIANẸ wu te ibiẹ ọko i Sangir Besar rẹ ame o kinhariẹ obẹ Indonesia uvwre ẹgbukpe ezẹko ri vrẹnren, manẹ wa sabu mẹrẹn imizu emẹse awansa uvuẹn okokọ urhie na. E rheri aye rhẹ ihworho re vwobọrhọ owian aghwoghwo na uvuẹn ọko ọrana—ọrẹ aye a ha userhumu rẹn ihworho vwẹruọ i Baibol na. Ọrẹn, uvuẹn erhirhiẹ ọrana, aye a wian aruẹ owian ọrọrọ.

Ọrukaro, aye a nya ruẹ uvuẹn urhie na, guọlọ atita eduado, ji kpare aye riẹ okokọ urhie na. Ezẹko usuẹn atita na, e doro jerẹ ibọru. Orho ru, emẹse na ne siyẹ ibiẹ akaba, ji ha ihama ghwọghọ atita na nẹ aye i kamu ghwẹ iyẹn ọrilele. Ọrana orho nie, aye ne fiẹ aye rhẹ ukoroba, ji kpare aye rhenren riẹ ekete aye rhirhiẹ. Orho ru, aye ne fiẹ atita na rhẹ ẹkpa ọduado ra na sabu kpare rhẹ imoto rọ kpare ekwakwa re ruẹ izede.

Owu usuẹn imizu enana yẹ Hulda. Erhirhiẹ ye ọ ha uphẹn riẹn rọ nọ wian bun vrẹn awọrọ ra wian owian ọnana. Vẹrhẹ bi, ọ ha igho rọ mẹrẹn uvuẹn owian na hẹrote edamẹ ekruien. Ọrẹn vwana, o vwo emru ọrọrọ rọ lẹrhiẹ wian owian ọnana. Ọye ọ guọlọ ifonu ọduado neneyo ọ sabu vwo JW Library^® app. Hulda o rheri taghene ividio ọrhẹ ekwakwa erọrọ ri ha app na, ọnọ lẹrhẹ owian aghwoghwo na ọrhẹ irherhe yi kpahen Baibol na kodorhọ.

Hulda ọ wian inọke eva uvwre ubiamo owu gburhuorhuo, rọ ghwọghọ atita ri na vuọn oberhumu imoto ọkokamu rọ kpare ekwakwa. Obẹtaye, no vwo igho ro te ha dẹ ifonu na.

Hulda nọ tare: “Dedevwo owian na ọ ghwọghọ oma, atita na a ji ha ẹkuọn rẹn ohworho, ọrẹn omiamiamo ọrhẹ ẹkuọn erana ni sẹre mẹ ẹro ọke mia ha ifonu ọkpokpọ na ruiruo, rọ ha userhumu mẹ ruẹ riaro uvuẹn aghwoghwo na ji dabu mwuegbe rhẹ uyono ukoko na phẹphẹrẹ.” Hulda ọ ji ta taghene ifonu na ọ ha userhumu riẹn uvwrọke emiamo akpọ ephian, ra mẹriẹn taghene e ruẹ ọsoso irueruo ukoko na nyoma itanẹti. Ọwan i leli Hulda ghọghọ fọkime ọ sabu nyamwu ẹkẹ ye.