UYONO 45
Oborẹ o Mevirhọ Ra Na Ja Hobọtua Akpọ Na
Jesu o yono idibo yi taghene aye “a ha usuẹn akpọ na-a.” (John 15:19) Ọnana o sekpahen ọrẹ ana ja hobọtua usuon oseghe ọrhẹ ivweri ọrẹ akpọ na. Itiọrurhomẹmro, ọ ghwai lọhọ ra na ja hobọtua akpọ na-a. Ana sabu ha ọwan djechẹẹ fọkiẹ ọnana. Marhẹ ana ja hobọtua akpọ na, jeghwai sẹrorẹ atamwu ọwan kpahen i Jehova Osolobrugwẹ?
1. Ukẹro ọgo yẹ Ilele Kristi urhomẹmro a ha ni igọmẹti ituakpọ?
Ilele Kristi e mwuọghọ rẹn igọmẹti. Ọwan e ruẹ lele ẹmro i Jesu ọ tare, jeghwai “kwa ekwakwa i Caesar rẹn i Caesar,” nọyẹ, ọra huvwele irhi ẹkwotọre ọwan, jerẹ eri sekpahen osurhomu ra na kwa. (Mark 12:17) Baibol na o yonirin ọwan taghene igọmẹti ituakpọ e suẹn, fọkime i Jehova ọ ha uphẹn rẹn aye nẹ aye i sun. (Romans 13:1) Omarana, ọwan i dabu rhe taghene o vwo ekete omẹgbanhon igọmẹti ituakpọ ọ bare. Ọwan a hẹroso Osolobrugwẹ ọrhẹ Uvie ọnẹyen obẹ odjuwu, no ti ebẹnbẹn ituakpọ nie.
2. Marhẹ ene ru djephia taghene avwa hobọtua akpọ na-a?
Jerẹ i Jesu, ọwan i vwe vwobọrhọ usuon oseghe-e. Ọke ihworho a mẹrẹn igbevwunu owu ri Jesu o ruru, ji damoma rẹ aye ina ha ye mwu ẹrhẹ orodje, ọ ten riẹn. (John 6:15) Mesoriẹ? Fọkime, nọ tare ọke o ru, “Uvie mẹ ọ ha usuẹn akpọ ọnana-a.” (John 18:36) Rẹ ọwan e rhiẹ idibo i Jesu na, e djephia uvuẹn izede sansan taghene avwa hobọtua akpọ na-a. Jerẹ udje, ọwan i vwe fiuvweri-i. (Se Micah 4:3.) Ọwan e mwuọghọ rẹn ekwakwa ri sekpahen ẹkwotọre ọwan jerẹ aphiala, ọrẹn, a vwa ga aye-e. (1 John 5:21) Habaye, ọwan i vwa hobọtua ẹko usuon oseghe, yanghene ohworho ro simi ẹrhẹ usuo-on, a vwa ji kparahaso aye-e. Uvuẹn izede enana ọrhẹ erọrọ, ọwan ne djephia taghene e vwo obọdẹn atamwu kpahen igọmẹti Osolobrugwẹ, nọyẹ, Uvie yi.
YONO KODO RHỌ
Yono kpahen erhirhiẹ ri na sabu lẹrhiẹ bẹn ra na ja hobọtua akpọ na, ji mẹrẹn oborẹ wu ne ru brorhiẹn ri na lẹrhẹ oma merhen i Jehova.
3. Ilele Kristi urhomẹmro i vwa hobọtua akpọ na-a
Jesu ọrhẹ idibo yi i dje udje na rhotọre rẹn ọwan. Se Romans 13:1, 5-7 ọrhẹ 1 Peter 2:13, 14. Kporo IVIDIO na, orho ru, are i gba kpahenrhọ enọ enana.
Mesoriẹ o fo ne mwuọghọ rẹn igọmẹti ituakpọ?
Izede ego ye ne ru djephia taghene a huvwele aye?
Uvuẹn ọke uvweri, egbamwa ezẹko a ta taghene aye i vwa hobọtua akpọ na-a, ọrẹn, aye a hobọtua egbamwa re fiuvweri na. Me yo ghini mevirhọ ra na ja hobọtua akpọ na? Se John 17:16. Kporo IVIDIO na, orho ru, are i gba kpahenrhọ enọ enana.
Me yo mevirhọ ra na ja hobọtua usuon ọrẹ akpọ na?
Me ye ne ruo, orhianẹ ere suẹn i tare taghene e ru oborẹ ọ haso urhi Osolobrugwẹ? Se Acts 5:28, 29. Kporo IVIDIO na, orho ru, are i gba kpahenrhọ enọ enana.
Orhianẹ urhi ọrẹ ituakpọ ọ haso urhi ọrẹ Osolobrugwẹ, ọgo ya na huvwele yi?
Wu na sabu roro kpahen erhirhiẹ ezẹko rẹ Ilele Kristi ina ja huvwele ere suẹn?
4. Djephia uvuẹn iroro ọrhẹ irueruo ọnọ taghene wa ha usuẹn akpọ na-a
Se 1 John 5:21. Kporo IVIDIO na, orho ru, are i gba kpahenrhọ enọ enana.
Uvuẹn ividio na, mesoriẹ Ayenge o brorhiẹn rọ nọ jọ homaba ẹko usuon oseghe, yanghene vwobọrhọ erẹ ẹkwotọre, jerẹ ọra mroma aphiala?
Wu rorori taghene orhienbro yi o dje ẹghwanren phia?
Erhirhiẹ erọrọ ego yi na sabu lẹrhiẹ bẹn na ja hobọtua usuon ọrẹ akpọ na? Kporo IVIDIO na, orho ru, are i gba kpahenrhọ enọ enana.
Marhẹ ene ru djephia taghene a ha usuẹn akpọ na-a, orho sekpahen iruẹn sansan rẹ akpọ ephian e vwobọrhọ?
Marhẹ ene ru djephia taghene a ha usuẹn akpọ na-a, ọrhọ tobọ rhianẹ orhienbro ere suẹn ọ hobọte ọwan?
Marhẹ iyẹnrẹn re rhon, ọrhẹ igbehian ọwan ine ru lẹrhẹ ọwan hobọtua akpọ na?
Erhirhiẹ ego yẹ Olele Kristi ọnọ jọ nyoma iroro ọrhẹ irueruo yi hobọtua akpọ na?
OHWORHO ỌNỌ SABU NỌ: “Mesoriẹ wu vwa mroma aphiala, yanghene so ijoro ra ha mroma aphiala?”
Marhẹ wu na kpahenrhọ ye lele?
ME WU YONORIN?
Ilele Kristi a damoma nẹ aye i ja rha hobọtua usuon oseghe nyoma iroro aye, ẹmro aye, ọrhẹ irueruo aye.
Ẹzẹkoko
Me ye ne vi ru rẹn igọmẹti ituakpọ?
Mesoriẹ ọwan i vwa hobọtua usuon oseghe?
Erhirhiẹ ego yi na sabu lẹrhiẹ bẹn rẹn ọwan na ja hobọtua akpọ na?
GUỌLỌ IYẸNRẸN ERỌRỌ
Ekwakwa ego ye ne tiobọnu na ja rha hobọtua akpọ na?
Me yẹ ekrun sansan ina sabu ru nẹ aye i mwuegbe hẹrhẹ ọdamuni ro sekpahen emevigbanhon aye?
Mesoriẹ uruemru ra na chochọn ẹkwotọre ọwan o vwo rhiẹ oborẹ ọ mai ghanren ro no brọghọ rhẹ ọwan oma?
Yono kpahen oborẹ wu ne ru djephia taghene wa ha usuẹn akpọ na-a, ọke we rhe brorhiẹn kpahen iruo ọnọ.
“Owuowọnwan yọ nọ Kpare Ohwan Ọnẹyen” (Oghwa Odẹrẹ, March 15, 2006)