O NẸ OGHWA IYẸNRẸN ỌWAN RHE

“Ame i vwo Oruru Ọrhẹ Ẹguọlọ Vrẹn Oborẹ ame i Vwori bi”

UVUẸN urhiọke i Fraide September 1922, ihworho ri te 8,000 ni kokori uvuẹn omẹvwa re ruru uvuẹn Cedar Point, Ohio, fọkiẹ ọrana, ekete ephian nọ djẹrẹ. Osiyaga na no ru aghwoghwo taghene uvwre ọke ra na tẹmro ọghoghanren na, ohworho rọ guọlọre ọnọ sabu ruotafe ọrẹn ọ sabu ghwẹrioma ruẹ Aghwẹlẹ na-a.

Ọke a ha ijoro rhie esiyẹ na hin, Omizu Joseph F. Rutherford no mevi ekete ra tẹmro uvuẹn ubiukpe na. Ihworho buebun ri ha uvuẹn esiyẹ na, na hẹrhẹ oborẹ ọnọ phia. Ihworho ezẹko na nya sa nya rie fọkiẹ omẹdjan. Ọtẹmro na nọ ta rẹn aye taghene aye ina sabu siyẹ nẹ aye i kerhọ. Ọke rẹ ọtẹmro na ọ tẹmro ọnẹyen nyarhẹn, e rhe sẹ ihworho ri ha uvuẹn esiyẹ na i djokarhọ ewun ra dabu gba rhẹ oberun na-a.

Omizu Rutherford ọ tẹmro ro vwo urhomu-ẹmro “Ẹrhiọ Uvie na o ti kẹrẹ ne.” Uvwre unọke owu gbẹ uphrophro, uvwele ọtẹmro na rọ havwọ gorigori no kpogho esiyẹ na ọke rọ tẹmro kpahen oborẹ emẹraro ọke ahwanren i ru ghwoghwo kpahen ẹrhiọ Uvie na, ọrẹn aye a zofẹ-ẹn. Ọke ẹmro ọnẹyen ọ joma hiẹn ne, nọ nọren, “Are i vwo imwẹro taghene Orodje ro vwo odidi na ọ tuẹn usuon ọnẹyen rhọ ne?” Ihworho ri ha uvuẹn esiyẹ na ni kpahenrhọ “Ee!” rhẹ uvwele gorigori.

Omizu Rutherford nọ tare rhẹ uvwele gorigori: “Omarana, are i gbe ye ghwoghwo, are ri rhiẹ emọ Osolobrugwẹ rọ mai rierun na. Nughe, Orodje na o suẹn ne! Are yẹ ihworho re se oseri kpahiẹn. Omarana, are i gbe ghwoghwo, ghwoghwo, ghwoghwo kpahen Orodje na ọrhẹ Uvie na.”

Ogege, na rhan ewun ra gba rhẹ oberun na, ẹmro enana ni homaphia: “Ghwoghwo kpahen Orodje na ọrhẹ Uvie na.”

Ray Bopp ọ tare taghene oma ọ merhen otu na omamọ. Anna Gardner nọ tare taghene “oberun oghwa na no kpogho fọkiẹ abọ rẹ ihworho na a ghwiẹ.” Omizu ọrọrọ re se Fred Twarosh nọ tare taghene ihworho ephian ni vẹnrẹn mevi ukwọgbọ. Omizu ọrọrọ re se Evangelos Scouffas nọ tare taghene “ọ họhọre taghene omẹgbanhon ọduado yọ kpare rẹ aye vẹnrẹn nẹ aga aye, aye ni mevi rhẹ amioviẹ rọ ha uvuẹn ukẹro aye.”

Buebun imizu ri riẹ omẹvwa na e ghwoghwo iyẹnrẹn esiri na bi ne. Ọrẹn, aye ni vwo omẹgbanhon rẹ aye ine ru riaro. Ethel Bennecoff nọ tare taghene Emọ Uyono i Baibol na ni vwo oruru ọrhẹ ẹguọlọ vrẹn oborẹ aye i vwori bi. Omizu ọgbọtọ re se Odessa Tuck rọ ha uvwre ẹgbukpe 18 ọke ọrana, no nẹ omẹvwa na rhẹ imwẹro taghene ọye ono fioma rhọ owian Uvie na vuọnvuọn. Odessa Tuck nọ tare: “Mie rhe oborẹ mi ne ru ọke ọrana-a. Ọrẹn, mi rheri taghene mi guọlọ họhọ Isaiah rọ tare ‘Mẹmẹ na! Dje mẹ!’” (Isa. 6:8) Omizu ọrọrọ re se Ralph Leffler nọ tare taghene “ẹdẹ ọrana yi ghini ọtonrhọ aghwoghwo iyẹnrẹn esiri Uvie na re ghwoghwo lele akpọ na ephian inyenana.”

Ọnana yẹ ọsoriẹ omẹvwa ọduado ọnana re ruru uvuẹn ẹgbukpe 1922 uvuẹn Cedar Point, Ohio, orhiẹ emru ra karorhọ omamọ uvuẹn ukoko i Jehova. Omizu owu re se George Gangas nọ tare: “Omẹvwa ọrana ọ lẹrhere mẹ vwo omwemẹ mi ne riẹ emẹvwa ephian.” Omarana, nọ ghini damoma riẹ emẹvwa ephian. Omizu ọmase owu re se Julia Wilcox nọ yare taghene: “Itiọrurhomẹmro, oma ọ merhen mẹ ọke ephian arha hunute omẹvwa re ruru uvuẹn ẹgbukpe 1922 uvuẹn Cedar Point, Ohio uvuẹn ẹbe ukoko na. Mia kpẹmẹ i Jehova ọke ephian rọ lẹrhe mẹ riẹ omẹvwa ọrana.”

Ọkezẹko, buebun ọwan i ji riẹ amerhen omẹvwa rọ lẹrherẹ ọwan vwo oruru ọrhẹ ẹguọlọ kpahen Osolobrugwẹ ọrhẹ i Jesu ro rhiẹ Orodje na. Rẹ ọwan a karorhọ emẹvwa erana, ọ ji lẹrhẹ ọwan kpẹmẹ i Jehova rọ lẹrherẹ ọwan riẹ emẹvwa erana.

Jehova ọ Kpahenrhọ Ẹrhomo aye Izede Igbevwunu

Esa ọrhẹ ane owu re se Arthur ọrhẹ Nellie Claus i kiki te omẹvwa na nẹ aye i sabu mẹrẹn omamọ ega rẹ aye ine siyẹ. Arthur ọ dabu kerhọ ẹmro na ephian. Ọrẹn, ogege evwan yen nọ miamiẹ. No vẹnrẹnren sikẹnsikẹn nẹ Aghwẹlẹ na, nime o rheri taghene ọrhọ ruẹ otafe ọ sabu ghwẹrioma sa-a. Owuọwan usuẹn era hẹrote esiyẹ na nọ nọriẹn, “Mesoriẹ wa ruẹ otafe ọke ọnana?” Arthur o rheri taghene orho brokpakpa ruẹ otafe-e, ekwakwa ina sọ.

Ọke Arthur ọ ghwẹrioma sa, no rhon ihworho buebun re fomu abọ uvuẹn esiyẹ na. Ọye nọ guọlọ ekete rọ nọ sabu rhon oborẹ a ta uvuẹn esiyẹ na, nọ mẹrẹn ekete owu, ọrẹn ono rhenren riẹ oberun oghwa na, emrẹ isihin aghwẹ 16. Arthur no rhenren riẹ oberun na.

Avwaye Arthur nọ mẹrẹn imizu ehworhare ezẹko re ni ọtẹmro na. A ta rẹn aye taghene aye i bru ifi ezẹko ukwọgbọ neneyo ewun ra gba rhẹ oberun na ọ sabu rhan. Ọrẹn, nẹ aye i sabu bru ufi na ukwọgbọ, aye i guọlọ aphia ọrọrọ rọ nọ lẹrhẹ aphia aye i vwori gba. Arthur o vwo aphia? Ọrẹ omamerhomẹ o vwo aphia owu. Arthur ọrhẹ imizu ri hẹrhẹre na, ni mevi rẹ aye a hẹrhẹ ọke rẹ ọtẹmro na ọnọ yẹ aye oka nẹ aye i bru ifi na. Ọke Omizu Rutherford ọ ta “Ghwoghwo!” ọgbọreva ye, aye ni bru ifi na.

Ihworho ri riẹ omẹvwa na i tare taghene ewun ra gba rhẹ oberun na, ọ ghwai rhan ukwọgbọ, oborẹ a ya rhẹ uvuien nọ homaphia ukwọgbọ. Ifoto i Jesu ọ ha erhẹrhẹ ewun na.

Ọke oru, imizu na ni ta rẹn Arthur taghene ugbaghala yẹ aye i ha rhenren riẹ oberun oghwa na, imizu erọrọ ri ha obotọre ni kpare ugbaghala na nyarhẹn. Aye arha sabu ruotọre-e, omarana, aye ni nẹrhomo vwe i Jehova no dje omizu ọhworhare ro vwo aphia bru aye rhe. O ghini mwu imizu erana ẹro taghene i Jehova ọ ha izede igbevwunu kpahenrhọ ẹrhomo aye.