Wu Rheri?

Mesoriẹ odibo Stephen ọ sabu sẹrorẹ omerhesun ọke ra kparahasuiẹ?

STEPHEN ọ dẹrughwaroghwu ihworho ra tuekwẹre gbangbanhon. Iguẹnzọn awan 71 ri ha uvuẹn oghwa ẹghware rọ maido uvuẹn Israel re se Sanhedrin, yẹ ihworho ri mai vwo omẹgbanhon uvuẹn agbamwa na. Orherẹn rọ mai rierun re se Caiaphas ro rhiẹ osiyaga uvuẹn ẹghware re guẹnzọn re kpe i Jesu, yo se ẹghware ọnana. (Matt. 26:57, 59; Acts 6:8-12) Ọke iseri efian sansan a mọrenfian banren Stephen, aye ni mẹrẹnvwrurhe taghene ughwaro Stephen ọ ‘họhọ ughwaro ọmakashe,’ ọnana no gberẹ aye unu.—Acts 6:13-15.

Mesoriẹ odibo Stephen ọ sabu sẹrorẹ omerhesun uvuẹn erhirhiẹ ofẹn ọnana? Fọkime, e ki mwuie riẹ i Sanhedrin na, Stephen ọ dabu fiomarhọ owian aghwoghwo na nyoma userhumu ẹhẹn ọfuanfon Osolobrugwẹ. (Acts 6:3-7) Ọke rọ ha oghwa ẹghware na, ẹhẹn ọfuanfon na ọ ji wian uvuẹn omayen nyoma rọ ha urhebro riẹn jeghwai lẹrhiẹ karorhọ ekwakwa. (John 14:16, ekete ra djokarhọ) Ọke i Stephen o fiudugbere chochọn urhomẹmro na sekpahen oborẹ ọ ha Acts urhomu-ẹmro 7, ẹhẹn ọfuanfon na nọ ha userhumu riẹn karorhọ ekete 20 yanghene vrẹn omaran uvuẹn eyaya ọfuanfon na ra ha edjadjẹ Hebrew ya. (John 14:26) Ọrẹn, esegburhomẹmro i Stephen nọ gbanhonrhọ ọke ọ mẹrẹn i Jesu ro mevi obọrhe Osolobrugwẹ uvuẹn emena arudo.—Acts 7:54-56, 59, 60.

Ọwan ina ji sabu dẹrughwaroghwu edamuni yanghene ẹkparehaso. (John 15:20) Omarana, erhe yono i Baibol na jeghwai vwobọrhọ owian aghwoghwo na, na ha uphẹn rẹn ẹhẹn ọfuanfon Osolobrugwẹ no sun ọwan. Ana ji mẹrẹn omẹgbanhon re ne fiudugbere dẹrughwaroghwẹ ẹkparehaso na, jeghwai sẹrorẹ ufuoma re vwori.—1 Pet. 4:12-14