Enọ Rẹ Otu Re Se Ẹbe Ọwan I Nọren

Ẹmro ọnyikọ Paul rọ ha 1 Corinthians 15:29, o mevirhọ taghene Ilele Kristi ezẹko ọke ahwanren i bromarhame fọkiẹ ihworho ri hwuru?

Ẹjo, o vwo iyẹnrẹn i Baibol yanghene iyẹnrẹn ri vrẹn ne ri dje ọnana phia-a.

Oborẹ i Baibol buebun i rhian ekete arana lele, ọ lẹrhẹ ihworho ezẹko roro taghene e bru ihworho rhẹ ame fọkiẹ ihworho ri hwu ne uvuẹn ẹdẹ i Paul. Jerẹ udje, erhianrhian ezẹko i rha ta: “Vwana orhianẹ o vwo ẹrhọmọnuhwu-u, me yẹ ere brurhame fọkiẹ ihworho ri hwuru na ine ruo?”—New International Version.

Ọrẹn, djokarhọ oborẹ egba irherhe i Baibol awanva i tare. Dr. Gregory Lockwood, ọ tare taghene o vwo iseri owuorowu uvuẹn i Baibol yanghene iyẹnrẹn ri vrẹn ne, ri djephia taghene e bru ihworho rhẹ ame fọkiẹ ihworho ri hwuru-u. Ọrẹ ohọhọme, Professor Gordon D. Fee nọ yare: “O vwo iyẹnrẹn ri vrẹn ne yanghene ikuegbe i Baibol ro dje aruẹ omebrurhame ọnana phia-a. Obọrẹ a ha edjadjẹ i Greek ya uvuẹn i Baibol na ọ tẹmro kpahiẹn; o vwo irueruo owuorowu re rhe kpahen uvuẹn ishọshi yanghene uvwre Ilele Kristi erọrọ ri ha amwa ogame orthodox ọ havwọ uvuẹn ẹgbukpe uzusionrin ri ha kpahen ọke inyikọ na-a.”

Baibol ọ tare taghene idibo i Kristi ine ‘ruẹ idibo ihworho uvuẹn egbamwa na ephian, aye i bru aye rhẹ ame . . . , yono aye nẹ aye i ru lele ọsoso oborẹ’ o je ekama ye. (Matt. 28:19, 20) Bọmọke ohworho ono ki rhiẹ odibo ro bromarhame, ono vi yono, vwo esegburhomẹmro jeghwai huvwele i Jehova ọrhẹ Ọmọyen. Ohworho ro hwu ne rọ ha uvuẹn usin ọ sabu ruẹ ọrana-a; yanghene o vwo Olele Kristi ro nyerẹn rọ nọ sabu ruẹ ọrana ha riẹ-ẹn.—Eccl. 9:5, 10; John 4:1; 1 Cor. 1:14-16.

Omarana, me yi Paul ọ ta?

Ilele Kristi ezẹko e vwo esegburhomẹmro taghene ana rhọmọ ihworho ri hwuru-u. (1 Cor. 15:12) Paul o djerie phia taghene iroro ọnana ọ sọre. Paul nọ rionbọrhọ ye taghene ọye ‘ọ dẹrughwaroghwu uhwu kẹdẹkẹdẹ.’ Itiọrurhomẹmro, ọye o ji nyerẹn. Ọrẹn, udabọ erhirhiẹ imwofẹn rọ dẹrughwaroghwu, o vwo imwẹro taghene ọye ọrhọ hwu, ana rhọmiẹ nuhwu rhiẹ ohworho ẹhẹn ro vwo omẹgbanhon jerẹ Jesu.—1 Cor. 15:30-32, 42-44.

O fori nẹ Ilele Kristi ri ha Corinth i rhe taghene, rẹ aye e rhiẹ Ilele Kristi ra djẹha na, o mevirhọ taghene aye ina rha dẹrughwaroghwu edamuni kẹdẹkẹdẹ, aye ni ne ji hwu bọmọke ana ki rhọmọ aye nuhwu. Re ne “bromarhame uvuẹn Kristi Jesu,” ọ haba ọrẹ ene “bromarhame uvuẹn uhwu ọnẹyen.” (Rom. 6:3) Omebrurhame aye ra ha dje udje, ọnọ lẹrhẹ aye nya izede ro no lele fiẹ uhwu aye ọrẹ ugboma, na na ji rhọmọ aye nuhwu riẹ odjuwu.

Ẹgbukpe eva ọke ro bromarhame hin, Jesu nọ ta rẹn inyikọ yi awanva taghene: “Aruẹ omebrurhame ọnẹmẹ, ọyẹ ene ji bru are rhẹ ame.” (Mark 10:38, 39) E vwe bru i Jesu rhẹ ame ọke ọrana-a. Jesu ọ haye ta taghene emevigbanhon ọnẹyen, ono lele fiẹ uhwu ọnẹyen. Paul ọ yare taghene Ilele Kristi ra djẹha ina “rioja kugbe neneyo [aye i] ji vwo odidi kugbe.” (Rom. 8:16, 17; 2 Cor. 4:17) Omarana, aye ine ji hwu na ki rhọmọ aye riẹ odjuwu.

Omarana, ana sabu se ẹmro Paul izede omana: “Orhiomara-an, me yẹ aye ine ruo, ri rhiẹ ere bromarhame ọrẹ uhwu? Orhianẹ a rhọmọ eri hwuru na-a, mesoriẹ aye e bromarhame izede omaran?”