Ana Sabu Nyerẹn Bẹmẹdẹ

1. Marhẹ eroro kodo kpahen ive i Jehova kpahen arhọ i bẹmẹdẹ o ru hobọte ọwan?

JEHOVA o veri taghene ihworho ri huvwele yi ine vwo “arhọ i bẹmẹdẹ.” (Rom. 6:23) Ọke re roro kodo kpahen ive i Jehova ọrana, ẹguọlọ re vwo kpahiẹn nọ gbanhanrhọ. Roro kpahiẹn: Jehova o vwo ẹguọlọ kpahen ọwan omamọ, omarana o vwo oborẹ ọnọ hẹriẹ ọwan nẹ obọ ọnẹye-en.

2. Marhẹ ive arhọ i bẹmẹdẹ na o ru ha userhumu rẹn ọwan?

² Ive i Jehova kpahen arhọ i bẹmẹdẹ ọ ha userhumu rẹn ọwan diẹn ebẹnbẹn vwana. Evwreghrẹn ọwan i rha djofẹn uhwu mwu ọwan dede, a vwa zofẹ-ẹn. Mesoriẹ? Iroro owu yẹ, ọwan i rheri taghene arha fuevwan ga i Jehova te ẹdẹ uhwu, ọnọ rhọmọ ọwan rhẹ ifiẹrorhọ na taghene erhe hwuẹ-ẹ. (John 5:28, 29; 1 Cor. 15:55-58; Heb. 2:15) Mesoriẹ ọnọ sabu mwu ọwan ẹro taghene ene nyerien bẹmẹdẹ? Jena ta kpahen iroro ezẹko.

JEHOVA O NYERẸN BẸMẸDẸ

3. Mesoriẹ ana sabu vwo imwẹro taghene Jehova ọnọ sẹrorẹ ọwan bẹmẹdẹ? (Psalm 102:12, 24, 27)

³ Ọwan i rheri taghene Jehova ọnọ sabu sẹrorẹ ọwan bẹmẹdẹ fọkime ọye yẹ Esiri arhọ, ọye o ji nyerẹn bẹmẹdẹ. (Ps. 36:9) Djokarhọ eghwẹmro i Baibol ezẹko ri djerie phia taghene Jehova ọ havwiẹ ọke ephian, ono ji nyerẹn bẹmẹdẹ. Psalm 90:2 ọ tare taghene Jehova o nyerẹn “nẹ i bẹmẹdẹ ya ruẹ i bẹmẹdẹ.” Psalm 102 ọ ji tẹmro ri họhọ erana. (Se Psalm 102:12, 24, 27.) Ọmẹraro Habakkuk nọ ji ya kpahen Jehova: “O Jehova, orhiẹ i bẹmẹdẹ ye wu nurhe? O Osolobrugwẹ mẹ, Ọrọ Fonron na, wu vwe hwuẹ-ẹ.”​—Hab. 1:12.

4. Ofori ne brudu orhianẹ ọ bẹn re ne vwẹruọ ye taghene Jehova o nyerẹn bẹmẹdẹ? Dje yi fiotọre.

⁴ Ọ bẹn wẹn wu ne vwẹruọ ye taghene Jehova o nyerẹn “bẹmẹdẹ”? (Isa. 40:28) Ọ ji bẹn rẹn awọrọ. Elihu ọrhọ ta kpahen Jehova: “A sabu rhe kpahen uchunu ẹgbukpe yi-i.” (Job 36:26) Ọrẹn, fọkime ọwan e vwẹruọ oborẹ aruẹ emru owu ọ havwọ-ọ, o mevirhọ taghene emru ọrana rhẹ urhomẹmro-o. Jerẹ udje, dedevwo a vwa sabu vwẹruọ oborẹ ukpẹ ọ wian lele-e, no mevirhọ taghene ukpẹ ọ havwiẹ-ẹ? Ẹjo! Omaran ọ ji havwọ, ituakpọ i sabu vwẹruọ ọsoso oborẹ ọsoriẹ i Jehova ọ havwiẹ ọke ephia-an. Ọrẹn, ọrana o mevirhọ taghene Jehova o vwo nyerẹn bẹmẹdẹ-ẹ. Oborẹ e vwẹruọ ye, yanghene ra vwa sabu vwẹruọ ye, o vwo rhiẹ ọgbanrhọ rẹn Ọmemama na-a. (Rom. 11:33-36) Ọye ọ havwọ enyerẹn ne bọmọke ọ ki ma idjuwu na ọrhẹ otọrakpọ, kugbe ọren ọrhẹ ikereti na. E vwo imwẹro taghene Jehova yẹ “Ọmemama otọrakpọ na nyoma omẹgbanhuiẹn.” Habaye, ọ havwọ e nyerẹn bọmọke ọ ki “riẹn idjuwu na phia.” (Jer. 51:15; Acts 17:24) Me yẹ iroro ọrọrọ rọ soriẹ e vwo imwẹro taghene ana sabu nyerẹn bẹmẹdẹ?

A MAREN ỌWAN NE NYERẸN BẸMẸDẸ

5. Ifiẹrorhọ ọgo yẹ Adam ọrhẹ Eve i vwori?

⁵ Jehova ọ ma ekwakwa re nyerẹn uvuẹn otọrakpọ rhẹ ọke aye ine hwu, jokpanẹ ituakpọ ọvo. Ọ yẹ ituakpọ uphẹn oghẹnrensan rẹ aye ine je hwuo. Ọrẹn, Jehova nọ ha orhetio rẹn Adam: “Wu vwa re nẹ orhan irherhe oborẹ orhomurun ọrhẹ oborẹ obiomurun na-a, fọkime ẹdẹ wu re nẹ uvuien rhe, wu ne vi hwu.” (Gen. 2:17) Orhianẹ Adam ọrhẹ Eve i kerhọ i Jehova, manẹ aye i vwe hwu-u. Omarana, ana sabu ta taghene manẹ i Jehova ọ ha uphẹn rẹn aye riẹ omamọ nẹ “orhan arhọ na” orho ru. Ọnana no mevirhọ taghene aye i vwo imwẹro aye ine “nyerẹn bẹmẹdẹ.”b​—Gen. 3:22.

6-7. (a) Me yẹ emru ọrọrọ ro djerie phia taghene a ma ituakpọ nẹ aye i hwu-u? (b) Me yẹ ekwakwa wu guọlọ yono kpahen? (Ni ifoto na.)

⁶ Ọ merhoma re rhe taghene otu isayẹnsi ezẹko i mẹrẹn oborẹ o djerie phia taghene aphẹrhiẹn onyakpọ ọnọ sabu sẹrorẹ iyẹnrẹn buebun ghwẹ oborẹ ana sabu koko uvwre ọke re nyerẹn te. Uvuẹn ẹgbukpe 2010, urhomu-ẹmro owu uvuẹn ọbe na, Scientific American Mind ọ tare taghene aphẹrhiẹn ọwan ọnọ sabu sẹrorẹ iyẹnrẹn ri te emrẹ 2.5 million gigabytes, ana sabu haye dje iyẹnrẹn ro te inọke iduduru esa iruẹn ughe ra haphia uvuẹn ekpetughe (nọyẹ ọnọ vrẹn ẹgbukpe 300 ene ki nie hin). Ọnọ sabu rhirhiẹ taghene aphẹrhiẹn ọwan ọ sẹrorẹ iyẹnrẹn ri vrẹn omaran dede. Ọrana o djephia taghene Jehova ọ ma aphẹrhiẹn ọwan nọ sẹrorẹ iyẹnrẹn rọ vrẹn oborẹ e koko uvwre ẹgbukpe 70 yanghene 80.​—Ps. 90:10.

⁷ Jehova ọ ji ma ọwan rhẹ ojemẹ ọgbogbanhon re ne nyerẹn bẹmẹdẹ. Baibol na ọ tare taghene Jehova “o fi bẹmẹdẹ rhẹ uvuẹn ọmudu” onyakpọ. (Eccl. 3:11) Ọrana yẹ iroro owu rọ soriẹ uhwu o rhiẹ ọvwreghrẹn ọwan. (1 Cor. 15:26) Orhianẹ e kpomu emiamo ọgbogbanhon, ọwan e fiobọrhotọre nẹ uhwu ọ ghwai kpe ọwan? Ẹjo. Ọgbọ buebun, ọwan e bru idọkitọ, ji ha imwu ri ne simi emiamo na. Itiọrurhomẹmro, ọwan e ruẹ oborẹ ana sabu ru ephian ne je hwuo. Ọke ohworho re vwo ẹguọlọ kpahen orho hwu, sẹ uphuphẹn yanghene ọ ho ne, ọ ji miamo ọwan omamọ uvwre ọke jijiri. (John 11:32, 33) Ọrẹ imwẹro, ọhọre i Jehova taghene ituakpọ i vwo ojemẹ ọrhẹ oruru aye ine yono ji nyerẹn bẹmẹdẹ. Ọrẹn, o ji vwo iroro erọrọ ri na lẹrhẹ ọwan vwo imwẹro taghene ana sabu nyerẹn bẹmẹdẹ. Jene yono kpahen irueruo i Jehova ezẹko ri vrẹn ne, ọrhẹ erẹ ọye o ruẹ vwana ri djerie phia taghene ọhọriẹ nẹ ọtonrhọ rhe, o ji wene-e.

ỌHỌRE I JEHOVA O JI WENE-E

8. Imwẹro ọgo ye vwori sekpahen ọhọre i Jehova kpahen ọwan nẹ Isaiah 55:11?

⁸ Dedevwo Adam ọrhẹ Eve i ruẹ ọdandan ji suẹ uhwu rẹn emọ aye, Jehova o wene ẹhẹn yen kpahen egbemwuo yi-i. (Se Isaiah 55:11.) Ọhọriẹ yẹ ọrẹ ihworho ri fuevwan ga ye ine nyerẹn bẹmẹdẹ. Imwẹro ọrana ọgbare ọke re roro kpahen ekwakwa ri Jehova ọ tare, ji ru neneyo ọhọriẹ ọ sabu rugba.

9. Me yi Jehova o veri? (Daniel 12:2, 13)

⁹ Jehova o veri taghene ọnọ rhọmọ eri hwuru na, ji yẹ aye arhọ i bẹmẹdẹ. (Acts 24:15; Titus 1:1, 2) Job ro rhiẹ ohworho ro vwo atamwu, o vwo imwẹro taghene Jehova ọ ghini guọlọ rhọmọ eri hwuru na. (Job 14:14, 15) Ọmẹraro Daniel o rheri taghene ituakpọ i vwo ifiẹrorhọ ra na rhọmọ aye nuhwu, rhẹ uphẹn aye ine nyerẹn bẹmẹdẹ. (Ps. 37:29; se Daniel 12:2, 13.) Itu i Jew ri nyerẹnren uvuẹn ọke i Jesu, i ji rhe taghene Jehova ọnọ sabu yẹ odibo yi rọ fuevwan “arhọ i bẹmẹdẹ.” (Luke 10:25; 18:18) Ọgbọ buebun, Jesu ọ ta kpahen ive ọnana, habaye Ọsẹ ye yọ rhọmeriẹn nuhwu.​—Matt. 19:29; 22:31, 32; Luke 18:30; John 11:25.

10. Me yẹ ẹrhọmọnuhwu ri phia vrẹn ne i djephia? (Ni ifoto na.)

¹⁰ Jehova yọ yẹre ọwan arhọ, o ji vwo omẹgbanhon rọ nọ rhọmọ ihworho nuhwu. Ọ ha omẹgbanhon rẹn ọmẹraro Elijah nọ rhọmọ ọmọ ọmase uku owu ro rhirhiẹ i Zarephath nuhwu. (1 Ki. 17:21-23) Ọke oru, nyoma omẹgbanhon i Jehova, ọmẹraro Elisha nọ ji rhọmọ ọmọ ọhworhare ọmase owu ro rhirhiẹ Shunem nuhwu. (2 Ki. 4:18-20, 34-37) Iyẹnrẹn ẹrhọmọnuhwu erana ọrhẹ erọrọ, i djerie phia taghene Jehova o vwo omẹgbanhon rọ nọ rhọmọ ihworho nuhwu. Ọke rọ ha otọrakpọ na, Jesu o djerie phia taghene Jehova ọ yẹriẹ omẹgbanhon rọ nọ rhọmọ ihworho nuhwu. (John 11:23-25, 43, 44) Vwana ri Jesu ọ ha odjuwu na, a yẹriẹ “omẹgbanhon ephian obẹ odjuwu ọrhẹ uvuẹn otọrakpọ na ne.” Omarana, ọnọ sabu ha ive na te orugba taghene “ọsoso ihworho ri ha uvuẹn usin okarorhọ” na, ina rhọmọ rhiẹ akpọ rhẹ ifiẹrorhọ aye ine nyerẹn bẹmẹdẹ.​—Matt. 28:18; John 5:25-29.

11. Marhẹ otan na o ru lẹrhẹ ọwan vwo uphẹn re ne nyerẹn bẹmẹdẹ?

¹¹ Mesoriẹ i Jehova ọ ha uphẹn rẹn Ọmọyen ro vwo ẹguọlọ kpahen nọ rioja hwu? Jesu o dje oborẹ ọsoriẹ phia, ọke rọ ta: “Osolobrugwẹ o vwo ẹguọlọ kpahen akpọ na omamọ, no dje Ọmọyen owu ọvo rẹ ọye o vwori rhe, neneyo kohworho kohworho ro vwo esegburhomẹmro kpahiẹn arha ghwọghiẹ-ẹ, no no vwo arhọ i bẹmẹdẹ.” (John 3:16) Nyoma rọ ha i Jesu ruẹ otan fọkiẹ ọdandan ọwan, Jehova no rurie na sabu vwo arhọ i bẹmẹdẹ. (Matt. 20:28) Ọnyikọ Paul o dje oghọn ọghoghanren ọnana uvuẹn egbemwuo Osolobrugwẹ fiotọre ọke rọ ya: “Ra mẹriẹn taghene uhwu ọ nyoma onyakpọ rhe na, ẹrhọmọnuhwu ọrẹ ihworho ri hwuru ọ ji nyoma onyakpọ rhe. Jerẹ oborẹ ihworho ephian e hwuẹ fọkiẹ Adam, omaran ihworho ephian ine ji nyerẹn fọkiẹ Kristi.”​—1 Cor. 15:21, 22.

12. Marhẹ Uvie na ono ru ha ọhọre i Jehova te orugba?

¹² Jesu o yono idibo yi oborẹ aye ine ru nẹrhomo nẹ Uvie Osolobrugwẹ ọ rhe, ne ji rhe ruẹ ọhọriẹ uvuẹn otọrakpọ na. (Matt. 6:9, 10) Owu usuẹn ọhọre Osolobrugwẹ yẹ ọrẹ ituakpọ ine nyerẹn bẹmẹdẹ uvuẹn otọrakpọ na. Nẹ ọrana ọ sabu phia, Jehova ọ ha i Jesu mwu ẹrhẹ Orodje uvuẹn Uvie yi ne. Jehova o koko awan 144,000 nẹ uvuẹn otọrakpọ na ne, ri ne leli Jesu wian kugbe nẹ ọhọre i Jehova o te orugba.​—Rev. 5:9, 10.

13. Me yi Jehova o ruẹ vwana, marhẹ o ru sekpahuọn?

¹³ Vwana, Jehova o koko “otu gbidigbidi” ihworho, ji yono aye oborẹ aye ine ru rhiẹ emotọre Uvie yi. (Rev. 7:9, 10; Jas. 2:8) Dedevwo aye e nyerẹn uvuẹn akpọ rẹ ofẹn ọrhẹ uvweri ọ ghalẹre, ihworho ri rhiẹ otu gbidigbidi na, a damoma aye ine fiẹ aruẹ eghrẹn ephian kparobọ. Aye e djephia nyoma irueruo aye taghene aye e ruẹ edan ọlọkọ aye rhie ekwakwa ra wian owian ikebi. (Mic. 4:3) Ukperẹ aye ine vwobọrhọ ivweri ra suẹ uhwu, aye a ha userhumu rẹn ihworho guọlọ “obọdẹn arhọ na” nyoma aye yono aye kpahen Jehova ọrhẹ egbemwuo yi. (1 Tim. 6:19) Ihworho ekrun ina sabu kparehaso aye, yanghene aye ina sabu vwo ọkanronmẹ igho fọkime aye a hobọtua Uvie Osolobrugwẹ, ọrẹn Jehova ọ yẹ aye oborẹ aye i ghini guọlọ. (Matt. 6:25, 30-33; Luke 18:29, 30) Imwẹro erana a yẹ ọwan uduefigbere taghene Uvie Osolobrugwẹ o ghini suẹn ne, habaye ono rho ji ruẹ ọhọre i Jehova gba.

OBỌDẸN AKPỌ Ọ HA OBARO

14-15. Marhẹ ive i Jehova ro no tiẹ uhwu nie bẹmẹdẹ ono rugba lele?

¹⁴ Jesu yẹ Orodje Uvie Osolobrugwẹ obẹ odjuwu, ono ji ruẹ ọsoso ive ri Jehova o veri gba. (2 Cor. 1:20) Nẹ ẹgbukpe 1914 rhe, Jesu o fiẹ evwreghrẹn yen kparobọ ne. (Ps. 110:1, 2) Phẹrẹkpẹ, Jesu ọrhẹ eri ne lelie sun, ine vwo efikparobọ ji ghwọghọ evwọkon na.​—Rev. 6:2.

¹⁵ Uvwre ọke Usun Ẹgbukpe Uriusionrin Jesu, ihworho ri hwuru na ina rhọmọnuhwu, eri huvwele ine rhiẹ ihworho ri gbare. Ọke ọdamuni ro kẹta na ọrhọ vrẹn hin, eri Jehova o seri evwata “ina ha otọrakpọ na riuku, aye ine nyerẹn uvuien bẹmẹdẹ.” (Ps. 37:10, 11, 29) Ọrẹ omamerhomẹ, ene “ti uhwu ro rhiẹ ọvwreghrẹn rọ kẹta na nie.”​—1 Cor. 15:26.

16. Me yẹ emru ọrukaro ro no mwu ọwan ga i Jehova?

¹⁶ Jerẹ oborẹ e yono ne, a bọn ifiẹrorhọ ọwan re ne nyerẹn bẹmẹdẹ kpahen i Baibol na. Ifiẹrorhọ ọrana ọ sabu ha userhumu rẹn ọwan vwo atamwu uvwre ọke oba egbogbanhon enana. Ọrẹn, na sabu ruẹ oborẹ ọ merhen i Jehova oma, ene vi vwo vrẹn omwemẹ re ne nyerẹn bẹmẹdẹ. Emru ọrukaro rọ lẹrhẹ ọwan sẹrorẹ atamwu kpahen Jehova ọrhẹ Jesu, yẹ ẹguọlọ okokodo re vwori kpahen aye. (2 Cor. 5:14, 15) Ẹguọlọ ọrana o mwu ọwan hẹrokele aye ta rẹn awọrọ kpahen ifiẹrorhọ re vwori. (Rom. 10:13-15) Ọke re yono oborẹ ene ru dje ẹguọlọ phia ji tiobọnu ghwologhwolo, ọwan ne rhiẹ aruẹ ihworho ri Jehova ọ guọlọre ni rhiẹ igbehian yen bẹmẹdẹ.​—Heb. 13:16.

17. Owian ọgo yẹ owuowọnwan o vwori? (Matthew 7:13, 14)

¹⁷ Ọwan i guọlọ rhiẹ aruẹ ihworho ri ne vwo arhọ i bẹmẹdẹ? Jehova ọ yẹre ọwan uphẹn ọrana ne. Vwana, ọwan yi vwo owian ra na daji izede ro suẹn riẹ arhọ na. (Se Matthew 7:13, 14.) Marhẹ akpọ ono rhirhiẹ ọke re ne nyerẹn bẹmẹdẹ? Ene yono kpahen onọ ọrana uvuẹn urhomu-ẹmro rọ ha kpahen ọnana.