Wu ji Karorhọ?
Wu sabu se Oghwa Odẹrẹ erẹ ẹgbukpe ọnana ne? Omarana, nie sẹ wu na sabu kpahenrhọ enọ enana:
Me yo mevirhọ re ne “wene iroro ọwan”? (Rom. 12:2)
Ọ vrẹn ọrẹ wu ne ruẹ ekwakwa irhorhomu uvuẹn akpenyerẹn ọnọ. O surhobọmwu ọrẹ ene ni aruẹ ohworho ra havwọ uvuien so, ji ruẹ ewene na sabu nyerẹnmwu irhi egbagba i Jehova.—w23.01, pp. 8-9.
Marhẹ ene ru vwo iroro ro serhọ ọke ra djokarhọ ekwakwa ra phia uvuẹn akpọ na?
E vwo ọdamẹ kpahen ekwakwa ra phia ra ha aruẹmẹrẹn i Baibol te orugba. Ukperẹ ene bru ọke kpahen aye, rọ nọ sabu suẹ oghalẹ, ofori na bọn ikuegbe ọwan kpahen ẹbe sansan rẹ ukoko i Jehova o fomu phia. (1 Cor. 1:10)—w23.02, p. 16.
Marhẹ omebrurhame i Jesu o ru vẹnẹ ọrẹ idibo yi?
Fọkime e vwiẹ i Jesu uvuẹn agbamwa ra ha kpahontọre rẹn Jehova ne, orho vwo oborẹ ọnọ lẹrhiẹ homakpahontọre rẹn Jehova, jerẹ oborẹ ọwan e ruẹ-ẹ. Jesu ohworho rọ gbare, ro vwo ruẹ ọdandan. Omarana, o vwo edandan rọ nọ ghwẹriẹ nu-u.—w23.03, p. 5.
Marhẹ ene ru ha userhumu rẹn awọrọ kpahenrhọ onọ uvuẹn uyono ukoko?
Ana sabu ruẹ ẹkpahenrhọ ọwan kpeke, neneyo awọrọ i sabu kpahenrhọ. Ono ji rhomu orhianẹ a kpahenrhọ ihwẹnmro buebu-un. Omarana, no vwo eghọn erọrọ awọrọ ina sabu kpahenrhọ.—w23.04, p. 23.
Me yẹ “Izede Ọfuanfon” ra hunute uvuẹn Isaiah 35:8 o mevirhọ?
Ọke ukaro, izede ọnana ra ha dje udje na o mevirhọ izede itu i Jew na i nya nẹ Babylon riẹ ẹkwotọre aye. Uvuẹn ọke ọwan na vwo? Ẹgbukpe buebun o ki te ẹgbukpe 1919, ne ruẹ egbemwuo buebun rhotọre—ọrẹ a rhian ji fomu i Baibol na, ọrhẹ ẹbe erọrọ. Idibo i Jehova a nya uvuẹn “Izede Ọfuanfon na” riẹ paradais ọrẹ ẹhẹn na, ro no lele fiẹ ebrurhọ Uvie na.—w23.05, pp. 15-19.
Urhebro ọgo yi Proverbs urhomu-ẹmriẹn 9 ọ haphia sekpahen emẹse awanva ra ha dje udje?
Proverbs ọ ta kpahen “ọmase ro ghẹnren” rẹ use yi o suẹn riẹ “Usin na,” ọrhẹ “obọdẹn ẹghwanren,” ra ha dje ọmase rẹ use yi o suẹn riẹ “izede ọmẹrẹnvwrurhe” ọrhẹ arhọ. (Prov. 9:1, 6, 13, 18)—w23.06, pp. 22-24.
Marhẹ i Jehova o ru dje omeriotọre ọrhẹ uruemru re roro te phia ọke ro lele i Lot ru kugbe?
Jehova ọ ta rẹn Lot nọ zẹ nẹ Sodom riẹ obọrẹ ugbenu na. Ọrẹn, ọke i Lot ọ rẹ ye nọ ha uphẹn riẹn zẹ riẹ Zoar, Jehova no kwe riẹn.—w23.07, p. 21.
Me yẹ ane ọnọ sabu ru orhianẹ esa ye o ni ifoto yanghene ughe ihworho ri banfirhọ?
Ofori nọ karorhọ taghene o vwo kperi omaye-en. Ukpomaran, ọ tẹnrovi onyerẹnkugbe ọnẹyen rhẹ Jehova, ji roro kodo kpahen iyẹnrẹn i Baibol na kpahen emẹse ri vwo ebẹnbẹn ri mẹrẹn urhebro mie Jehova. Ọnọ ji sabu ha userhumu rẹn esa ye kẹnoma rẹn erhirhiẹ ri na lẹrhiẹ vwobọrhọ irueruo na.—w23.08, pp. 14-17.
Marhẹ ọmẹrẹnvwrurhe ono ru ha userhumu rẹn ọwan ru dẹndẹn ọke awọrọ erhe titietio kpahen imwẹro ọwan?
Ana sabu ni onọ na yanghene itietio na rhiẹ uphẹn re ne vwẹruọ oborẹ ohworho na o roro, yanghene ro vwo ọdamẹ kpahen. Nyoma ọrana, ne rhe oborẹ ene ru kpahenrhọ ye dẹndẹn.—w23.09, p. 17.
Me ya na sabu yono mie Mary sekpahen ọrẹ ene vwo omẹgbanhon?
Ọke ro rhon taghene ono rhiẹ izu Messiah na, Mary no vwo omẹgbanhon mie awọrọ. Gabriel ọrhẹ Elizabeth ni tiobọnu urhebro rẹn Mary. Ana ji sabu vwo omẹgbanhon mie imizu ukoko na.—w23.10, p. 15.
Marhẹ i Jehova ono ru kpahenrhọ ẹrhomo ọwan?
O veri taghene ono rhon ẹrhomo ọwan ji roro kpahen oborẹ o ru sekpahen ọhọriẹ. (Jer. 29:12) Jehova ọnọ sabu kpahenrhọ aruẹ ẹrhomo owu uvuẹn izede sansan, ọrẹn ọnọ ha userhumu rẹn ọwan ọke ephian.—w23.11, pp. 21-22.
Romans 5:2 ọ hunute “ifiẹrorhọ,” mesoriẹ a rharhumu ta kpahiẹn uvuẹn oghwẹmro 4?
Ọke ohworho orho rhon iyẹnrẹn esiri na, ọnọ sabu vwo ifiẹrorhọ rọ nọ riamerhen akpọ i paradais. Ọrẹn, orho rhiẹromẹrẹn edamuni, vwo edirin aye, ji mẹrẹn ekwerhọ i Jehova vwrurhe, ifiẹrorhọ ye nọ gbanhanrhọ, ji lẹrhiẹ vwo aghọghọ.—w23.12, pp. 12-13.