Teknoolojiin Dhiibbaa Akkamii Qaba? Dandeettii Yaaduu Kee Irratti
Namoonni barnoota isaaniitiif, hojii isaaniitiif ykn wantoota kan birootiif wanta hedduu barachuun isaan barbaachisa. Teknoolojiin gama kanaan faayidaa qaba. Seenaa ilmaan namootaa keessatti yeroon akka ammaatti odeeffannoo argachuun baayʼee itti salphate hin jiru; manaa gad baʼuun, teessoo kee irraa illee kaʼuun utuu si hin barbaachisin odeeffannoo barbaaddu argachuu dandeessa.
Haa taʼu malee, namoonni teknoolojii gar malee fayyadaman hedduun . . .
yeroo dubbisan yaada isaanii sassaabbachuun isaan rakkisa.
hojii tokko irratti qofa xiyyeeffachuun isaan rakkisa.
yeroo kophaa taʼanitti dafanii nuffu.
WANTA BEEKUU QABDU
DUBBISUU
Namoonni yeroo baayʼee meeshaalee elektiroonikii fayyadaman, yeroo tokko tokko mata duree tokko dubbisanii xumuruuf obsa waan hin qabneef, waa yeroo dubbisan yaada ijoo isaa argachuuf irra fiigu.
Dubbisni akkasii yeroo gaaffii tokkoof hatattamaan deebii argachuun si barbaachisutti si fayyaduu dandaʼa. Haa taʼu malee, akkas gochuun dhimma tokko gad fageenyaan hubachuuf si hin gargaaru.
MEE YAADI: Mata duree dheeraa dubbisuun si rakkisaa? Wanta tokko xiyyeeffannaadhaan dubbisuun kee caalaatti barachuuf kan si gargaaru akkamitti?—FAKKEENYA 18:15.
XIYYEEFFACHUU
Namoonni tokko tokko teknoolojiin takkaatti hojii lama hojjechuuf, fakkeenyaaf, utuma qoʼatanii hiriyaa isaaniitiif ergaa barreeffamaa erguuf akka isaan dandeessisu dubbatu. Haa taʼu malee, xiyyeeffannaan isaanii yeroo hihiramutti, keessumaa hojiin lamaanuu xiyyeeffannaa kan gaafatu taanaan, tokkoo isaa illee akka gaariitti hojjechuu hin dandaʼan.
Wanta tokko irratti xiyyeeffachuun of toʼachuu kan gaafatu taʼus faayidaa guddaa qaba. Shamarreen Girees jedhamtu, “Dogoggorri uumtu ni xiqqaata, dhiphinni kees siif hirʼata. Al takkaatti wanta tokko irratti xiyyeeffachuu fi wantoota yaada hihiran irraa fagaachuun faayidaa akka qabu baradheera” jetteetti.
MEE YAADI: Teknoolojiin wanta tokko irratti xiyyeeffachuu fi wanta qoʼatte yaadachuun akka sitti ulfaatu godheeraa?—FAKKEENYA 17:24.
KOPHAA TAʼUU
Namoonni tokko tokko kophaa taʼuu waan hin jaallanneef, teknoolojiitti fayyadamanii kophummaa isaanii of irranfachiisuu barbaadu. Dubartiin Oliiviyaa jedhamtu, “Moobaayilii ykn taabileetii koo utuu hin tuttuqin ykn televizyinii utuu hin banin daqiiqaa 15 turuun na nuffisiisa” jechuudhaan ifatti dubbatteetti.
Haa taʼu malee, kophaa taʼuun xiinxaluuf carraa nuuf bana; kun immoo wanta baranne yaadachuuf nu gargaara.
MEE YAADI: Yeroo kophaa taatutti xiinxaluuf itti fayyadamtaa?—1 XIMOTEWOS 4:15.
WANTA GOCHUU DANDEESSU
ITTI FAYYADAMA TEKNOOLOJII KEE QORI
Dandeettii yaaduu kee guddifachuuf teknoolojiitti fayyadamuu kan dandeessu karaawwan kamiini? Teknoolojiin dandeettii wanta tokko irratti xiyyeeffachuu fi waa barachuu kee irratti miidhaa geessisuu kan dandaʼu akkamitti?
QAJEELFAMA KITAABA QULQULLUU: “Ogummaa fi dandeettii yaaduu eeggadhu.”—FAKKEENYA 3:21.