QAALAʼIINSA JIREENYAA DANDAMACHUU
Arjaa Taʼi
Qaalaʼiinsa jireenyaa wajjin walʼaansoo gochaa jirta yoo taʼe, arjummaa argisiisuun wanta hin dandaʼamne sitti fakkaachuu dandaʼa. Haataʼu malee, arjummaadhaan warra kaaniif kennuun kee rakkina dinagdee dandamachuuf si gargaaruu dandaʼa. Maallaqa qusachuus taʼe arjummaa argisiisuu ni dandeessa.
BARBAACHISAA KAN TAʼE MAALIIFI?
Karaawwan xixinnoo taʼaniinillee arjummaa argisiisuun, gammadoo taʼuu fi waaʼee ofii keenyaa miirri gaariin akka nutti dhagaʼamu taasisa. Qorannoowwan akka argisiisanitti warra kaaniif kennuun fayyummaa qaamaa fi sammuu keenyaatiif gaariidha. Fakkeenyaaf yaaddoo, dhiphinaa fi dhiibbaa dhiigaa dabalatee, dhukkubbii hirʼisuu dandaʼa. Dabalataanis hirriba keenya fooyyessuu dandaʼa.
Maallaqa ykn wantoota kan biroo warra kaaniif kan kenninu yoo taʼe, yeroo gargaarsi nu barbaachisutti gargaarsa isaanii fudhachuun nuuf salphata. Howaardi inni Ingilaandi keessa jiraatu akkas jedheera: “Anii fi haati manaa koo karaa warra kaanitti arjummaa argisiisnuu fi karaa itti isaan gargaarru argachuuf yaaluun keenya yommuu gargaarsi nu barbaachisutti fudhachuun akka nuuf salphatu godheera.” Dhugaadha, namoonni garaadhaa arjaa taʼan, warri kaan deebisanii waa akka isaaniif godhan hin eegan. Taʼus michoota dhugaa yeroo gargaarsi isaan barbaachisutti fedhiidhaan isaan gargaaran ni argatu.
WANTA GOCHUU DANDEESSU
Wanta qabdu warra kaaniif qoodi. Wanti qabdu muraasa yoo taʼellee wanta warra kaaniif qooduu dandeessu hin dhabdu; tarii nyaata xinnoollee taʼuu dandaʼa. Dankanii fi maatiin isaa warri Ugaandaa keessa jiraatan baayʼee hiyyeeyyiidha; taʼus warra kaanitti arjummaa ni argisiisu. Dankan akkas jedheera: “Dilbata Dilbata anii fi haati manaa koo nyaata nu faana akka nyaatuuf nama tokko mana keenyatti ni affeerra. Warra kaanii wajjin yeroo dabarsuun nu gammachiisa.”
Dhugaadha, warra kaaniif yeroo kenninu madaallii keenya eeggachuu qabna. Utuu hin barbaachisin maatiin kee akka rakkatu gochuun sirrii miti.—Iyyoob 17:5.
Akkas gochuuf yaali: Nyaata ykn wanta dhugamu nama tokko affeeri. Wanta itti hin fayyadamne yoo qabaatte michoota ykn olloota kee wanta kanatti fayyadamuu dandaʼanii fi yoo isaaniif kennite dinqisiifataniif maaliif hin kennitu?
Wanta kennuu dandeessu kan biraa. Kennaawwan gaggaarii namootaaf kennuu dandeenyu keessaa tokko tokko maallaqa nu hin baasisan. Fakkeenyaaf, wanta warra kaan fayyadu raawwachuudhaan yeroo fi xiyyeeffannaa keenya isaaniif kennuu dandeenya. Dubbii gaarii dubbachuunillee kennaa taʼuu dandaʼa. Kanaafuu, hammam akka isaan dinqisiifattu ykn akka isaan jaallatu warra kaanitti himi.
Akkas gochuuf yaali: Hojii mana keessaa hojjechuu, mana suphuu ykn isaaniif ergamuudhaan warra kaan gargaaruuf yaali. Michuu kee tokkoof kaardii ykn ergaa gabaabaa ergi; tarii waaʼeesaa akka yaaddu ibsuun qofti gaʼaa taʼuu dandaʼa.
Karaa itti warra kaanitti arjummaa argisiistu argachuuf kan yaaltu yoo taʼe eebba hedduu argachuu dandeessa.