Waaqayyo Abrahaamii Wajjin Kakuu Gale

BISHAAN BADIISAA bara Nohitti ga’e erga darbee, gara waggaa 350 ta’eera. Abrahaam, magaalaa badhaatuu Ur jedhamtu keessa jiraachaa kan ture si’a ta’u, magaalaan kun yeroo ammaatti Iraaq jedhamti. Abrahaam nama amantii guddaa qabu ture. Amma garuu amantiinsaa ni qorame.

Yihowaan, Abrahaam biyya itti dhalate gadhiisee, biyya ormaa, jechuunis biyya Kana’aan akka dhaqu itti hime. Abrahaamis mamii tokko malee abboomame. Haadha manaasaa Saaraa, ilma obboleessasaa Looxiifi miseensota maatiisaa hunda qabatee karaa fagoo erga deemee booda, Kana’aanitti dunkaana keessa jiraachuu jalqabe. Yihowaan kakuu Abrahaamiif gale keessatti sabni guddaan isa keessaa akka ba’u, sabni lafarraa karaasaa akka eebbifamuufi sanyiinsaa biyya Kana’aan akka dhaalu abdii kenneef.

Abrahaamiifi Loox hoolotaafi loon hedduu qabaachuudhaan sooreyyii ta’an. Abrahaam ofittummaa tokko malee, Loox naannoo barbaaderra akka jiraatu isa filachiise. Looxis biyya lalistuu kutaa Laga Yordaanos filatee, magaalaa Sodoomitti dhihaatee jiraachuu jalqabe. Haata’u malee namoonni biyya Soodom, amala gadhee kan qabaniifi Yihowaarratti cubbuu cimaa kan hojjetan turan.

Yihowaan, yeroo booda Abrahaam sanyiinsaa akka urjii waaqa keessaa akka baay’atu abdii kenneef. Abrahaamis abdii kana ni amane. Haata’u malee, haati manaa Abrahaam, Saaraan maseena turte. Abrahaam umriinsaa waggaa 99 yommuu ta’eefi Saaraanimmoo gara umrii 90⁠tti yommuu siqxetti, Waaqayyo ilma akka godhatan Abrahaamitti hime. Akkuma Waaqayyo dubbate, Saaraan ilma Yisihaq jedhamu deesse. Abrahaam ijoollee baay’ee kan godhate ta’us, Fayyisaan Eeden keessatti abdachiifame kan dhufu karaa Yisihaq ture.

Yeroo kanatti Looxiifi maatiinsaa magaalaa Sodoom keessa kan jiraatan ta’us, nama qajeelaa kan ture Loox, akka namoota addaggee magaalattii keessa jiraatanii hin turre. Yihowaan Sodoomirratti badiisa fiduuf yeroo murteesse, Loox badiisa kanarraa akka oolu isa akeekkachiisuuf dursee ergamoota garasaatti erge. Ergamoonni sunis, Looxiifi maatiinsaa Sodoomii akka ba’aniifi garagalaniis akka hin ilaalle isaan abbooman. Achiis Waaqayyo, magaalaa Sodoomiifi magaalaa Gomoraa ishee hamtuurratti ibiddaafi dhagaa boba’u roobsuudhaan, jiraattota magaalota kanaa balleesse. Looxiifi intaloonnisaa lamaan badiisicharraa ni oolan. Haata’u malee, haati manaa Loox tarii wanta dhiistee baate sana hawwuudhaan gara duubaa ilaalte. Waaqayyoof abboomamuu waan diddeefis lubbuushee dhabde.

—Uumama 11:10–19:38⁠rratti kan hundaa’e.