Galmawwan Hafuuraakee Bira Ga’uu Kan Dandeessu Akkamitti?
1 Kiristiyaana dargaggeessa hamma taatetti, galmi jireenyakee keessatti qabdu jaalala Yihowaadhaaf qabdurrattiifi gorsa Yesus Kiristiyaanota hundaan ‘yaada keessan mootummaa Waaqayyootti hidhaa’ jechuudhaan kennerratti kan hundaa’e akka ta’u hin shakkisiisu. (Mat. 6:33) Galmikee qajeelchaa ta’uudhaan ykn bakka labsitoonni Mootummichaa caalaatti barbaachisan dhaquudhaan tajaajilakee bal’isuu ta’uu danda’a. Obboloonni tokko tokko hojii ijaarsaa addunyaa maratti hojjetamurratti fedhiidhaan hirmaachuuf, waajjira damee keessatti tajaajiluuf ykn misiyoonota ta’anii tajaajiluuf yookiinimmoo bakka barbaachisaa ta’e dhaqanii tajaajiluuf fedhii qabu ta’a. Galma akkasii qabaachuun dhugumaan kan nama gammachiisuufi nama galateeffachiisu mitii?
2 Galmawwan hafuuraakee galmeessuun bira ga’uuf si gargaara. Masaraan Eegumsaa Adoolessa 15, 2004: ‘Wanta yaadame tokko jechootaan ibsuuf yommuu yaaltu caalaatti ifa sii ta’a. Atis galmawwan keefi karaa galmawwan kanarra ga’uu itti dandeessu waraqaarratti galmeeffachuu dandeessa’ jedha. Kana malees, galma yeroo gabaabaa baasuun keenya sadarkaa irra jirru akka qorruufi sammuun keenya kaayyoo keenyarratti akka xiyyeeffatu nu gargaaruu danda’a.
3 Galmawwan Yeroo Gabaabaa: Hamma ammaatti kan hin cuuphamne yoo taate, cuuphamuuf maal gochuu akka qabdu yaadi. Barumsawwan Macaafa Qulqulluu bu’uura ta’an caalaatti hubachuun si barbaachisa ta’a. Akkas taanaan kitaaba Barumsa Macaafa Qulqulluu caqasawwan yaannisaanii hin kaa’amne hunda baastee dubbisuudhaan gadi fageenyaan qayyabachuuf galma baafadhu. (1 Xim. 4:15) Akkuma obboloota Bet’el keessatti tajaajilaniifi Giil’aaditti baratanirraa eegamutti, atis Macaafa Uumamaarraa kaastee hamma Mul’ataatti guutummaa Macaafa Qulqulluu dubbisuuf karoora baafadhu. Sana booda guyyaa guyyaadhaan Macaafa Qulqulluu dubbisuuf sagantaa baafadhu. (Far. 1:2, 3) Kana gochuunkee karaa hafuuraa guddachuuf hammam akka si gargaaru yaadi! Dubbisaafi qayyabannaa Macaafa Qulqulluukee yommuu jalqabduufi xumurtu kadhannaa godhi; yeroo hundaa waan baratte hojiirra oolchuuf yaali.—Yaq. 1:25.
4 Kan cuuphamte yoo taatemmoo galmawwan dabalataa akkamii hordofuu dandeessa? Dandeettii lallabaakee fooyyessuun si barbaachisaa? Fakkeenyaaf, akkaataa Sagalee Waaqayyoo tajaajilarratti itti fayyadamtuun dandeettiikee guddisuuf galma baafachuu dandeessaa? (2 Xim. 2:15) Tajaajilakee bal’isuu kan dandeessuhoo akkamitti? Galma gabaabaa umuriifi haala kee wajjin wal simu, akkasumas galmakee isa yeroo dheeraarra ga’uuf si gargaaru baafadhu.
5 Seenaa Milkaa’inaa: Tooniin, dargaggeessa waggaa 19 yeroo turetti waajjira damee Dhugaa Baatota Yihowaa tokko erga daawwatee booda, Bet’el galee tajaajiluu barbaade. Haata’u malee jireenya addaggummaa kan jiraatuufi kan hin cuuphamne ture. Tooniin jireenyasaa barumsa Yihowaa wajjin wal simsiisuuf murteessee cuuphaadhaaf ga’aa ta’uuf galma baafate. Erga cuuphamee booda, dura qajeelchaa gargaaraa achiis qajeelchaa ta’uuf galma baafachuudhaan, tajaajila kana yoom jalqabuu akka barbaadu Kaalaandariisaarratti barreesse. Yeroo xinnoodhaaf qajeelchaa ta’ee erga tajaajilee booda, Bet’elitti akka tajaajilu ennaa waamame gammachuu isatti dhaga’ame tilmaamuu dandeessa!
6 Atis Mootummaa Waaqayyoo deggeruudhaaf dursa kennuu yoo barbaadde, galmawwan hafuuraakee bira ga’uu dandeessa. “Hojii kee” kadhannaadhaan Yihowaatti beeksisiitii, galmakee bira ga’uuf garaadhaa carraaqi.—Fak. 16:3; 21:5.
[Gaaffiiwwan Qayyabannaa]
1. Dargaggoonni Kiristiyaanaa baay’een galmawwan hafuuraa akkamii qabu?
2. Galma hafuuraakee bira ga’uuf maaltu si gargaaruu danda’a?
3. Galmawwan gabaabaa namni tokko cuuphaadhaaf ga’aa akka ta’u gargaaran tokko tokko caqasi.
4. Kiristiyaanni Bet’el galee ykn misiyoonii ta’ee tajaajiluuf galma yeroo dheeraa baafate tokko, galmawwan yeroo gabaabaa akkamii baafachuu danda’a?
5. Obboleessi tokko galma yeroo gabaabaa baafachuunsaa galma Bet’el galee tajaajiluuf qabu bira akka ga’u kan isa gargaare akkamitti?
6. Galmawwan hafuuraa baafatte bira ga’uuf maaltu si gargaaruu danda’a?