Mootummaan Waaqayyoo Maal Raawwata?

WANTOOTA MOOTUMMAAN WAAQAYYOO RAAWWATE

Mata duree darberratti mallattoo Yesuus kenne ilaalleerra. Mallattoon kun Mootummaan Waaqayyoo samiirratti akka hundeeffamee fi Yesuus Kiristoos Mootii Mootummaa kanaa akka taʼe nuuf mirkaneessa.

Kitaabni Qulqulluun Yesuus yeroo aangoo qabatetti Seexanaa fi jinniiwwan isaa samii keessaa akka ariʼe dubbata. Yeroo ammaatti sochiin isaanii lafarratti kan daangeffamedha; bara 1914 jalqabee haalli addunyaa hammaachaa kan dhufe kanaafi.—Mulʼata 12:7, 9.

Haalli addunyaa hammaachaa kan deeme taʼus, Yesuus inni Mootii Mootummaa Waaqayyoo taʼe namoota guutummaa lafaarra jiran gargaaraa jira. Barumsa Kitaaba Qulqulluu addunyaa maratti kennamaa jiru isa Yesuus raajiidhaan dubbateef galanni haa taʼuutii, namoonni hedduun qajeelfamoota Kitaaba Qulqulluu barachaa fi jireenya isaanii keessatti hojiirra oolchaa jiru. (Isaayyaas 2:2-4) Namoonni miliyoonaan lakkaaʼaman hojiidhaaf ilaalcha madaalamaa qabaachuu, jireenya maatii isaanii fooyyessuu fi garba utuu isaaf hin taʼin qabeenyatti gammaduu barataniiru. Namoonni kun yeroo ammaatti of fayyadaa kan jiran yeroo taʼu, namoota Waaqayyo Mootummaa isaa jalatti akka bulan barbaadu keessaa tokko taʼuufis barachaa jiru.

MOOTUMMAAN WAAQAYYOO GARA FUULDURAATTI MAAL RAAWWATA?

Yesuus samii keessatti bulchaa kan jiru taʼus, mootummoonni ilmaan namootaa ammayyuu lafarratti bulchaa jiru. Haa taʼu malee Waaqayyo Yesuusiif qajeelfama, “Diinota kee gidduutti bulchi” jedhu kenneera. (Faarfannaa 110:2) Dhiheenyatti Yesuus mormitoota isaa hundumaa guutummaatti ni balleessa, warra Waaqayyoof ajajamuuf fedhii qabaniifimmoo boqonnaa argamsiisa.

Yeroo sanatti Mootummaan Waaqayyoo tarkaanfiiwwan armaan gadii fudhata:

• Amantaa sobaa haxaaʼee balleessa. Amantaawwan waaʼee Waaqayyoo soba barsiisanii fi jireenyi namootatti akka ulfaatu godhan ni balleeffamu. Kitaabni Qulqulluun amantaa sobaa dubartii sagaagaltuu tokkotti fakkeessa. Badiisni amantaa sobaa namoota baayʼee kan naasisu taʼa.—Mulʼata 17:15, 16.

• Bulchiinsa namootaa ni balleessa. Mootummaan Waaqayyoo bulchiinsa ilmaan namootaa hunda ni balleessa.—Mulʼata 19:15, 17, 18.

• Namoota hamoo ni balleessa. Namoonni wanta gaarii hin taane raawwachuu isaanii itti fufanii fi Waaqayyoof ajajamuu didan hoo maal taʼu? “Hamoonni . . . lafa irraa ni buqqifamu.”—Fakkeenya 2:22.

• Seexanaa fi jinniiwwan ni balleessa. Seexannii fi jinniiwwan, ‘sana booda saboota dogoggorsuu’ hin dandaʼan.—Mulʼata 20:3, 10.

Kun hundi namoota Mootummaa Waaqayyoo fudhataniif hiika akkamii qaba?

MOOTUMMAAN WAAQAYYOO ILMAAN NAMOOTAATIIF MAAL GODHA?

Yesuus samii keessatti Mootii taʼee bulchuudhaan, wanta bulchiinsi ilmaan namootaa kamiyyuu raawwachuu hin dandeenye raawwata. Warri ilmaan namootaa keessaa filatamanii fi 144,000 taʼan isaa wajjin bulchu. (Mulʼata 5:9, 10; 14:1, 3) Yesuus fedhiin Waaqayyoo lafarratti akka raawwatamu godha. Mootummaan Waaqayyoo namoota lafarra jiraataniif maal godha?

• Dhukkubaa fi duʼa ni balleessa. “Jiraattota biyyattii keessaa tokko illee, ‘Na dhukkuba’ hin jedhu,” “duutis kana booda hin jiraatu.”—Isaayyaas 33:24; Mulʼata 21:4.

• Nagaa fi tasgabbii dhugaa fida. “Nagaan ilmaan [keetii] baayʼee ni taʼa,” akkasumas “tokkoon tokkoon isaanii muka wayinii isaanii fi muka harbuu isaanii jala ni taaʼu, eenyu iyyuu isaan hin sodaachisu.”—Isaayyaas 54:13; Miikiyaas 4:4.

• Namoonni hojii gammachiisaa akka qabaatan godha. “Warri ani filadhes hojii harka isaaniitti guutummaatti ni gammadu. Isaan akkanumaan hin dhamaʼan.”—Isaayyaas 65:22, 23.

• Qilleensa naannoo ni sirreessa. “Lafti onaanii fi lafti waxalamaan ni gammadu, gammoojjiin ni gammada, akkuma saafronittis ni daraara.”—Isaayyaas 35:1.

• Bara baraaf jiraachuu akka dandaʼaniif namoota ni barsiisa. “Jireenya bara baraa argachuu akka dandaʼaniif, si Waaqa dhugaa isa tokkichaa fi Yesuus Kiristoos isa ati ergite sana beekuu qabu.”—Yohaannis 17:3.

Waaqayyo eebbawwan kana akka argattu barbaada. (Isaayyaas 48:18) Mata dureen ittaanu warra jireenya gara fuulduraatti argamu argatan keessaa tokko taʼuuf amma maal gochuu akka dandeessu ibsa.