Waaqayyo Kadhannaa Hundaaf Deebii Kan Hin Kennine Maaliifi?
Abbaan keenya inni samii Yihowaan kadhannaa keenya garaadhaa madde dhagaʼuuf fedhii qaba, isa gammachiisas. Taʼus, kadhannaa keenyaaf deebii akka hin kennine wantoonni isa taasisan jiru. Wantoonni kun maalfaʼi? Yeroo kadhannu hoo wantoota akkamii yaadatti qabachuu qabna? Mee qajeelfamoota Kitaaba Qulqulluu tokko tokko haa ilaallu.
‘Yommuu kadhattan waanuma wal fakkaatu irra deddeebitanii hin dubbatinaa.’—Maatewos 6:7.
Yihowaan kadhannaawwan yaadatti qabataman akka irra deddeebinu ykn kitaaba kadhannaa akka dubbsinu hin barbaadu. Kanaa mannaa, wanta garaa keenya keessa jiru akka isatti dubbannu barbaada. Michuun kee tokko guyyaa guyyaadhaan waanuma tokko utuu sitti dubbatee hangam akka si aarsu mee yaadi. Michoonni gaariin ifatti dubbatu, akkasumas haqa qabeeyyii dha. Jecha mataa keenyaatiin yommuu kadhannu, wanta dhuunfaatti nutti dhagaʼamu Abbaa keenya isa samiitiif ibsina.
“Kaayyoo dogoggoraatiif waan gaafattaniif, yoo gaafattan iyyuu hin argattan.”—Yaaqoob 4:3.
Wanta akka raawwannu ykn akka qabaannu inni hin barbaanne utuu beeknuu yoo isa kadhanne Waaqayyo nuu deebisa jennee eeguu hin qabnu. Fakkeenyaaf, Waaqayyo sassataa fi amantii dogoggoraa milkii wajjin wal qabate ifatti dhorkee utuu jiruu kadhannaa taphataan qumaaraa tokko milkaaʼina argachuuf dhiheessu ni deebisaa? (Isaayyaas 65:11; Luqaas 12:15) Yihowaan kadhannaawwan akkasii ni dhagaʼa jedhanii eeguun waan hin fakkaanne dha! Waaqayyo kadhannaa keenyaaf deebii akka nuu kennu yoo barbaanne, kadhannaan keenya wanta inni Kitaaba Qulqulluu keessatti nutti himee wajjin akka wal simu mirkaneessuu qabna.
“Namni seericha dhaggeeffachuu didu Kadhannaan isaa illee jibbisiisaa dha.”—Fakkeenya 28:9.
Bara duriitti Waaqayyo kadhannaa namoonni seerawwan qajeelinaa isaa hin fudhanne dhiheessaniif deebii hin kennu ture. (Isaayyaas 1:15, 16) Ilaalchi isaa ammas hin jijjiiramne. (Miilkiyaas 3:6) Waaqayyo kadhannaa keenya akka nuuf deebisu yoo barbaanne seera isaa wajjin wal simnee jiraachuuf wanta dandeenyu gochuu qabna. Taʼus, kanaan dura wanta dogoggoraa raawwanneerra yoo taʼe hoo? Kana jechuun Yihowaan matumaa nu hin dhagaʼu jechuudhaa? Akkas jechuu miti! Jireenya keenya yoo jijjiirree fi isa gammachiisuuf wanta dandeenyu yoo goone jaalalaan dhiifama nuuf godha.—Hojii Ergamootaa 3:19.