Namoota Hedduu Yuukreenii Baqachaa Jiran Irra Rakkinni Cimaan Gaʼaa Jira

Guraandhala 24, 2022 Raashiyaan Yuukreen weeraruu ishiitiin kan kaʼe namoonni bakka waraanaa sanaa baqatan wantoota jireenyaaf barbaachisan argachuun isaanitti ulfaateera.a

“Boombonni ni buufamu, dhoʼinsis ni dhagaʼama ture. Sodaa guddaa natti dhagaʼame jechaan ibsuu hin dandaʼu. Baaburoonni baqattoota feʼuuf qophaaʼan akka jiran yeroo beeknu, deemuuf murteessine. Nama tokkoof shaanxaa tokko qofa waan heyyamamuuf wanta hundumaa dhiisnee shaanxaadhuma tokko qofa fudhanne. Fudhachuu kan dandeenye dookmantoota, qoricha, bishaanii fi nyaata salphaa qofa ture. Waan hundumaa dhiisnee utuma boombiin buʼaa jiruu buufata baaburaa deemne.”—Naataaliyaa, Kaarkiiv, Yuukreen irraa.

“Hanga saʼaatii sanaatti waraanni ni kaʼa jennee hin yaanne. Kutaa magaalichaa tokko tokko irraa sagalee dhoʼinsaa nan dhagaʼe, achiis foddaan keenya ni raafame. Wantoota barbaachisoo qofa qabadhee baqachuufan murteesse. Ganama saʼaatii lamatti manaa baʼeen baabura Liviiv deemu yaabbadhe, achiis otoobisiidhaan gara Poolaandin deeme.”—Nadiijaa, Kaarkiiv, Yuukreen irraa.

Mata duree kana keessatti

• Maddi rakkina baqattoota kanaa inni guddaan maali dha?

• Baqattoonni abdii eessaa argachuu dandaʼu?

• Kitaabni Qulqulluu baqattoota yeroo harʼaa jiran gargaaruu ni dandaʼaa?

Maddi rakkina baqattoota kanaa inni guddaan maali dha?

Namoonni Yuukreenii baqachuu kan jalqaban Raashiyaan weerara waan banteefi. Haa taʼu malee, Kitaabni Qulqulluun rakkinoota kana hundaaf sababii guddaan akka jiru ibsa:

• Mootummoonni addunyaa maratti argaman ilmaan namootaa gargaaruu hin dandeenye. Namoonni aangoo qaban aangoo isaanii namoota hacuucuuf itti fayyadamu.—Lallaba 4:1; 8:9.

•  Seexanni, inni ‘bulchaa addunyaa kanaa’ taʼe namoota irratti dhiibbaa hamaa waan geessisuuf, Kitaabni Qulqulluu, ‘guutummaan addunyaa humna isa hamaa sana jala jira’ jedha.—Yohaannis 14:30; 1 Yohaannis 5:19.

• Rakkinoota jaarraa hedduuf namoota dararaa turan malees, Kitaabni Qulqulluun yeroon keessa jiraannu, ‘guyyoota dhumaa yeroo addaa baayʼee rakkisoo’ akka taʼan ibsa. (2 Ximotewos 3:1) Kana malees, guyyoonni kun taʼeewwan namoonni akka baqatan godhan kanneen akka waraanaa, balaa uumamaa, hanqina nyaataa fi dhibee daddarbaadhaan beekamu.—Luqaas 21:10, 11.

Baqattoonni abdii eessaa argachuu dandaʼu?

Kitaabni Qulqulluun Uumaan keenya Yihowaanb Waaqa baqattootaa fi namoota qeʼee isaanii irraa buqqaʼanitti jaalala argisiisuu fi garaa isaaniif laafu akka taʼe ibsa. (Keessa Deebii 10:18) Inni mootummaa isaa isa samii mootummoota namootaa balleessuudhaan bulchutti fayyadamee rakkina baqattootaa hundaa ni fura. (Daaniʼel 2:44; Maatewos 6:10) Yihowaan Mootummaa isaatti fayyadamee Seexana ni balleessa. (Roomaa 16:20) Mootummaan kun daangaawwan qoqqoodinsa uuman hunda balleessuudhaan guutummaa addunyaa bulcha. Ilmaan namootaa hundi maatii tokko taʼu. Namni kam iyyuu lammata qeʼee isaa irraa hin buqqaʼu; sababiin isaas, Kitaabni Qulqulluun, “Tokkoon tokkoon isaanii muka wayinii isaanii fi muka harbuu isaanii jala ni taaʼu, eenyu iyyuu isaan hin sodaachisu, sababiin isaas, Yihowaan Gooftaan Raayyaa kana dubbateera” jechuudhaan abdii kenna.—Miikiyaas 4:4.

Rakkina baqattoota yeroo harʼaa jiraniif furmaata waaraa kan kennu Mootummaa Waaqayyoo qofa dha. Yihowaan Mootummaa isaatti fayyadamee rakkinoota namoonni baqattoota akka taʼan godhan ni balleessa. Mee fakkeenyota tokko tokko haa ilaallu:

• Waraana. “[Yihowaan] waraana ni balleessa.” (Faarfannaa 46:9) Waaqayyo waraana akkamitti akka balleessu beekuuf, mata duree, “Lafa Irratti Nagaan kan Dhufu Akkamitti?” jedhu dubbisi.

• Cunqursaa fi hammina. “[Yihowaan] cunqursaa fi hammina irraa isaan oolcha.” (Faarfannaa 72:14) Namoonni amaloota isaanii warra badaa taʼan jijjiiruu kan dandaʼan akkamitti akka taʼe beekuuf, yaadawwan mata duree, “Jibba Injifachuu ni Dandeessa!” jedhu jalatti baʼan dubbisi.

• Hiyyummaa. ‘Yihowaan hiyyeessa gargaarsa argachuuf iyyatu ni oolcha.’ (Faarfannaa 72:12) Waaqayyo wantoota hiyyummaaf sababa taʼan akkamitti akka balleessu beekuuf, mata duree, “Yeroo Itti Rakkinni Dinagdee hin Jiraanne ni Dhufaa?” jedhu dubbisi.

• Hanqina nyaataa. “Midhaan hedduun lafa irra ni jiraata.” (Faarfannaa 72:16) Waaqayyo namni kam iyyuu akka hin beelofne gochuu kan dandaʼu akkamitti akka taʼe beekuuf, mata duree, “Addunyaa Beelli Keessa Hin Jirre” (Ingiliffa) jedhu dubbisi.

Kitaabni Qulqulluu baqattoota yeroo harʼaa jiran gargaaruu ni dandaʼaa?

Eeyyee. Kitaabni Qulqulluun abdii amansiisaa kennuu malees, baqattoonni rakkinoota amma isaan mudatan akka furan isaan gargaaruu dandaʼa.

Qajeelfama Kitaaba Qulqulluu: “Waan hundumaa ilaalchisee kadhannaa fi wawwaannaadhaan galataa wajjin iyyannoon keessan Waaqayyo biratti akka beekamu godhaa malee, waaʼee waan tokkoo illee hin yaaddaʼinaa; nagaan Waaqayyoo inni hubannaa hundumaa irra caalu . . . garaa keessanii fi yaada keessan ni eega.”— Filiphisiyus 4:6, 7.

Hiika isaa: Haalli keessa jirtu maal iyyuu yoo taʼe nagaa sammuu fi nagaa garaa akka sii kennu Waaqayyoon kadhadhu. Mata duree, “Filiphisiyus 4:6, 7—‘Waaʼee Waan Tokkoo Illee Hin Yaaddaʼinaa’” jedhu dubbisi.