Namoonni Nagaa Buusuu kan hin Dandeenye Maaliifi?—Kitaabni Qulqulluun Maal Jedha?

Geggeessitoonni addunyaa fi dhaabbileen idil addunyaa nagaa fiduu hin dandeenye. Waraana Addunyaa Lammaffaarraa kaasee akka yeroo ammaatti yeroon jeequmsi itti baayʼate hin jiru. Namoonni gara biliyoona lamaa taʼan, jechuunis uummata addunyaa keessaa kurmaana kan taʼan naannoo jeequmsi itti babalʼate keessa jiraatu.

Namoonni nagaa fiduu kan hin dandeenye maaliifi? Kitaabni Qulqulluun maal jedha?

Sababiiwwan namoonni nagaa fiduu itti hin dandeenye sadii

1. 1. Namoonni ilaalcha nagaa fiduuf yaalii gochuunillee rakkisaa akka isaanitti taʼu godhu qabu. Kitaabni Qulqulluun bara keenyatti “namoonni kan of jaallatan, maallaqa kan jaallatan, kan of jajan, kan of tuulan, . . . amanamoo kan hin taane, . . . walii galuuf fedhii kan hin qabne, . . . kan of hin toʼanne, gara jabeeyyii, . . . mata jabeeyyii, boonuudhaan kan of bokoksan [akka taʼan]” dubbata.—2 Ximotewos 3:2-4.

2. 2. Namoonni, dhuunfaattis taʼe gareedhaan, gargaarsa Yihowaaa isa Uumaasaanii taʼe malee rakkoowwansaaniitiif furmaata kennuu hin dandaʼan. Kitaabni Qulqulluun, ‘Namni yommuu deemu ofii isaatiin tarkaanfii isaa illee qajeelchuu hin dandaʼu’ jechuudhaan ifatti dubbata.—Ermiyaas 10:23.

3. 3. Addunyaan dhiibbaa bulchaa humna guddaa qabuu fi hamaa taʼe tokko jala jira; innis Seexana isa “guutummaa lafaa dogoggorsu” sanadha. (Mulʼata 12:9) “Guutummaan addunyaa . . . humna isa hamaa sanaa jala” hamma jiraatetti waraannii fi walitti buʼiinsi ni jiraata.—1 Yohaannis 5:19.

Nagaa fiduu kan dandaʼu eenyu?

Kitaabni Qulqulluun nagaan kan argamu carraaqqii namoonni godhaniin utuu hin taʼin, Waaqayyo biraa akka taʼe dubbata.

• “Yihowaan akkana jedha: ‘Wantan isiniif yaade akka gaariittan beeka; innis badiisa utuu hin taʼin nagaa dha; ani egeree gaarii fi abdii isiniif nan kenna.’”—Ermiyaas 29:11.

Waaqayyo waadaa kana kan raawwatu akkamitti? “Waaqayyo inni nagaa kennu ofii isaatii dhiheenyatti Seexana . . . ni buruqsa.” (Roomaa 16:20) Waaqayyo bulchiinsa samii Kitaabni Qulqulluun “Mootummaa Waaqayyoo” jedhee waamutti fayyadamee guutummaa addunyaarra nagaan akka jiraatu godha. (Luqaas 4:43) Mootii Mootummaa kanaa kan taʼe Yesuus Kiristoos yeroo lafa bulchutti namoonni akkamitti nagaadhaan jiraachuu akka dandaʼan ni baratu.—Isaayyaas 9:6, 7.

• Caalaatti barachuuf mata duree, “Mootummaan Waaqayyoo Maal Raawwata?” jedhu dubbisi