Wanta Hunda Irra Caalu Argataniiru

NAMOONNI miliyoonaan lakkaaʼaman ayyaana Qillee kabajuu dhiisuu filataniiru. Maarree murtoo isaanii kana ilaalchisee maaltu isaanitti dhagaʼama? Wanti taʼe tokko akka isaanitti hafe isaanitti dhagaʼama? Ijoolleen isaanii hoo wanti itti hirʼate tokko akka jiru isaanitti dhagaʼamaa? Dhimma kana ilaalchisee Dhugaa Baatonni Yihowaa addunyaa mara irratti argaman maal akka jedhan haa ilaallu.

Yesuus Kiristoosiin yaadachuu: “Dhugaa Baatuu Yihowaa taʼuu koo dura bataskaana kanan dhaqu darbee darbee turre. Yoon dhaqes yeroo Ayyaana Qillee ykn Ayyaana Faasikaa qofa dha. Taʼus dhugaa isaa dubbachuuf yeroo kanatti illee waaʼee Yesuus Kiristoos hin yaadu. Amma Ayyaana Qillee kabajuu dhiiseera, taʼus walgaʼiiwwan Kiristiyaanaa irraatti torbanitti guyyaa laman argama; akkasumas wanta Kitaabni Qulqulluun waaʼee Yesuus dubbatu namoota kaan nan barsiisa!”—IIV, AWUSTIRAALIYAA.

Gammachuu kennuudhaan argamu: “Namoonni yeroo ani hin eegnetti kennaa yeroo naa kennan baayʼeen gammada. Utuu ani hin yaadin wanti tokko yommuu naaf godhamu natti tola! Kaardii qopheessee fi fakkii kaasee namoota kaaniif kennuun namoota baayʼee gammachiisa; anaanis na gammachiisa.”—RUUBEEN, KAABA AAYERLAANDI.

Namoota rakkatan gargaaruu: “Namoota dhukkubsataniif nyaata qopheessuun nutti tola. Isaan gammachiisuuf jecha yeroo tokko tokko abaaboo, keekii ykn kennaa xinnoo isaaniif geessuudhaan isaan gaafanna. Namoota kana waggaa keessatti yeroo kamitti iyyuu gaafachuu waan dandeenyuuf akkas gochuun nu gammachiisa.”—EMLII, AWUSTIRAALIYAA.

Maatiidhaan yeroo waliin dabarsuu: “Yeroo maatiin keenya walitti qabamuudhaan waliin dabarsan, ijoolleen keenya eessumawwan fi wasiilawwan, adaadaawwan, akkoo fi akaakayyuu, akkasumas durbiiwwan isaanii wajjin wal baruuf carraa argatu. Kana kan goonu guyyoota ayyaanaa eeguudhaan waan hin taaneef hin dhiphannu, miseensonni maatii keenyas kan isaan gaafannu waan isaan jaallannuuf akka taʼe beeku.”—WEENDII, ODOLAWWAN KEEYMAAN.

Nagaa: “Yeroo Ayyaana Qilleetti namoonni hojiidhaan waan muddamaniif waaʼee nagaa yaaduuf illee yeroo hin qaban. Amma abdii Kitaabni Qulqulluun ilmaan namootaatiif kenne waanan baradheef hin dhiphadhu. Ijoolleen koo gara fuulduraatti jireenyi gammachiisaan akka isaan eeggatu baradheera.”—SAANDIRAA, ISPEEN.