Yihowaan Mootummaa isaatti fayyadamee rakkoowwan keenya hunda yeroo dhihootti ni balleessa. Misiraachoon kun gaarii waan taʼeef namni kam iyyuu dhagaʼuun isa barbaachisa. Yesuus duuka buutonni isaa ergaa kana namoota hundatti akka himan barbaada! (Maatewos 28:19, 20) Maarree Dhugaa Baatonni Yihowaa wanta Yihowaan ajaje raawwachaa kan jiran akkamitti?

1. Maatewos 24:14 yeroo harʼaa raawwatamaa kan jiru akkamitti?

Yesuus, “Misiraachoon Mootummichaa guutummaa lafaa irratti ni lallabama” jechuudhaan raajii dubbateera. (Maatewos 24:14) Dhugaa Baatonni Yihowaa hojii barbaachisaa taʼe kana irratti gammachuudhaan hirmaachaa jiru. Misiraachoo kana addunyaa maratti afaan 1,000 oliin lallabaa jirra! Hojiin baayʼee barbaachisaa taʼe kun carraaqqii fi qindoomina guddaa gaafata. Hojiin kun gargaarsa Yihowaa malee hojjetamuu hin dandaʼu.

2. Namootaaf lallabuuf carraaqqii akkamii goona?

Bakka namoota argachuu dandeenyu kamitti iyyuu ni lallabna. Akkuma Kiristiyaanota jaarraa jalqabaa “manaa gara manaa” deemnee ni lallabna. (Hojii Ergamootaa 5:42) Malli akka gaariitti qindaaʼe kun waggaa waggaadhaan namoota miliyoonaan lakkaaʼamaniif lallabuuf nu gargaareera. Namoonni yeroo hunda waan manatti hin argamneef, bakkawwan namoonni itti baayʼatan hedduuttis ni lallabna. Yeroo hunda waaʼee Yihowaa fi waaʼee kaayyoo isaa namootatti himuuf carraa barbaanna.

3. Misiraachicha lallabuuf itti gaafatamummaa kan qaban eenyu faʼi?

Kiristiyaanonni dhugaan hundi misiraachicha namoota kaanitti himuuf itti gaafatamummaan isaan irra jira. Itti gaafatamummaa keenya kanaaf xiyyeeffannaa guddaa kennina. Lubbuu namootaa oolchuu akka dandaʼu waan beeknuuf hamma nuuf dandaʼame lallabuuf carraaqqii goona. (1 Ximotewos 4:16 dubbisi.) Kitaabni Qulqulluun, “Tola waan fudhattaniif, tola kennaa” waan jedhuuf hojii kana raawwachuuf maallaqni nuuf hin kaffalamu. (Maatewos 10:7, 8) Ergaa keenya kan fudhatu namoota hunda miti. Taʼus hojiin kun kutaa waaqeffannaa keenyaa fi Yihowaa kan gammachiisu waan taʼeef lallabuu keenya itti fufna.

CAALAATTI BARADHU

4. Namoota hundumaaf lallabuuf carraaqqii goona

VIIDIYOO: “Hanga Handaara Lafaatti” Lallabuu (7:33)

• Carraaqqii Dhugaa Baatonni Yihowaa lallabuuf godhan ilaalchisee wanti si dinqisiisu maali dha?

Maatewos 22:39 fi Roomaa 10:13-15 dubbisaa, achiis gaaffiiwwan kanneen irratti mariʼadhaa:

• Tajaajilli keenya namoota akka jaallannu kan argisiisu akkamitti?

• Yihowaan namoota misiraachicha lallabaa jiraniif ilaalcha akkamii qaba?—Lakkoofsa 15 ilaali.

5. Nuti warra Waaqayyoo wajjin hojjennu dha

Muuxannoowwan hedduun Yihowaan hojii keenya geggeessaa akka jiru mirkaneessu. Fakkeenyaaf, Niiwu Ziilaandi keessatti obboleessi Pool jedhamu gaaf tokko waaree booda manaa gara manaa utuu tajaajilaa jiruu dubartii takkaa wajjin wal arge. Guyyuma sana ganama dubartiin sun maqaa Waaqayyoo isa Yihowaa jedhamutti fayyadamtee namni tokko dhufee akka ishii haasofsiisu kadhattee turte. Pool, “Anis mana ishii kanan dhaqe erga ishiin kadhattee saʼaatii sadii booda ture” jedheera.

Qorontos Tokkoffaa 3:9 dubbisaa, achiis gaaffii kana irratti mariʼadhaa:

• Muuxannoowwan akkasii Yihowaan hojii lallabaa geggeessaa akka jiru kan argisiisan akkamitti?

Hojii Ergamootaa 1:8 dubbisaa, achiis gaaffii kana irratti mariʼadhaa:

• Tajaajila keenya raawwachuuf gargaarsi Yihowaa kan nu barbaachisu maaliifi?

Kana beektaa?

Torban torbaniin walgaʼii torban gidduutti goonu irratti, leenjii lallabuuf nu gargaaru arganna. Walgaʼiiwwan kanneen keessaa isa tokko irratti argamtee beekta yoo taʼe, leenjii kennamu ilaalchisee maaltu sitti dhagaʼama?

6. Ajaja Waaqayyo akka lallabnuuf nuu kenne ni raawwanna

Jaarraa jalqabaatti mormitoonni duuka buutonni Yesuus akka hin lallabne dhowwuuf yaalanii turan. Kiristiyaanonni jaarraa jalqabaa ‘misiraachichi seera duratti fudhatama akka argatu gochuudhaan’ mirga lallabuuf qabaniif falmaniiru. (Filiphisiyus 1:7) Yeroo harʼaas Dhugaa Baatonni Yihowaa akkasuma godhu.a

VIIDIYOO: Misiraachichi Seera Duratti Fudhatama Akka Argatu Falmuu (2:28)

Hojii Ergamootaa 5:27-42 dubbisaa, achiis gaaffii kana irratti mariʼadhaa:

• Lallabuu keenya kan hin dhaabne maaliifi?—Lakkoofsa 29, 38 fi 39 ilaali.

MAAL BARATTE?

Yesuus duuka buutonni isaa misiraachicha saboota hundumaatiif akka lallaban ajajeera. Yihowaan sabni isaa hojii kana akka raawwatan isaan gargaaraa jira.

Irra Deebii

• Misiraachichi addunyaa maratti lallabamaa kan jiru akkamitti?

• Tajaajilli keenya namootaaf jaalala akka qabnu kan argisiisu akkamitti?

• Lallabuun hojii nama gammachiisu akka taʼe sitti dhagaʼamaa? Maaliif?

QORANNOO DABALATAA GODHI

Dhugaa Baatonni Yihowaa magaalota guguddaa keessatti namootaaf kan lallaban akkamitti akka taʼe ilaali.

Lallaba Addabaabayii Addaa Magaalaa Paarisitti Geggeeffame (5:11)

Dhugaa Baatonni Yihowaa baqattootaaf kan lallaban akkamitti?

Baqattoota Karaa Hafuuraa Dheebotan Gargaaruu (5:59)

Obboleettiin takka tajaajilli yeroo guutuu gammachiisaa taʼuu isaa kan ibsite akkamitti akka taʼe ilaali.

Hojii Kana Filachuun Koo Na Gammachiisa (6:29)

Waaʼee injifannoowwan dinqisiisoo mana murtiitti argannee fi hojiin misiraachicha lallabuu akka babalʼatu godhanii dubbisi.

“Labsitoonni Mootummichaa Mana Murtiitti Iyyatan” (Mootummaan Waaqayyoo Bulchaa Jira!, boqonnaa 13)

Yesuus cuuphaan ulaagaa Kiristiyaanni tokko guutuu qabu akka taʼe barsiiseera. (Maatewos 28:19, 20 dubbisi.) Garuu cuuphaan maali dha? Namni tokko galma kana irra gaʼuuf hoo maal gochuu qaba?

1. Cuuphaan akkamitti raawwatamuu qaba?

Jechi “cuuphuu” jedhu jecha Afaan Giriikii hiikni isaa bishaan keessa “gadi liccisiisuu” jedhu irraa kan dhufe dha. Yesuus yommuu cuuphametti laga Yordaanos keessa erga lixee booda ‘bishaanicha keessaa ol baʼe.’ (Maarqos 1:9, 10) Haaluma wal fakkaatuun, Kiristiyaanonni dhugaan guutummaatti bishaan keessa gadi lixuudhaan cuuphamu.

2. Cuuphamuun maal argisiisa?

Namni tokko cuuphamuun isaa Yihowaadhaaf akka of murteesse argisiisa. Maarree namni tokko kan of murteessu akkamitti? Cuuphamuu isaa dura, bara baraaf Yihowaa tajaajiluu akka barbaadu dhuunfaatti kadhannaadhaan isatti himuudhaani. Yihowaa qofa waaqeffachuuf, akkasumas jireenya isaa keessatti wanti baayʼee barbaachisaa taʼe fedha Waaqayyoo raawwachuu akka taʼe waadaa gala. Barumsaa fi fakkeenya Yesuus hordofuuf, ‘of ganuu fi yeroo hunda isa duukaa buʼuuf’ murteessa. (Maatewos 16:24) Of murteessuu fi cuuphamuun isaa Yihowaa fi namoota Yihowaa waaqeffatanii wajjin michummaa cimaa uumuuf isa gargaara.

3. Namni tokko cuuphamuu isaa dura maal gochuu qaba?

Cuuphamuu kee dura waaʼee Yihowaa barachuu fi amantii isa irratti qabdu guddifachuun kee baayʼee barbaachisaa dha. (Ibroota 11:6 dubbisi.) Beekumsii fi amantiin Yihowaa irratti qabdu yommuu guddachaa deemu jaalalli isaaf qabdus guddachaa deema. Kun immoo waaʼee isaa lallabuu fi ulaagaalee isaa wajjin wal simtee jiraachuuf si kakaasa. (2 Ximotewos 4:2; 1 Yohaannis 5:3) Namni tokko “guutummaatti isa gammachiisuuf akka Yihowaadhaaf taʼutti” jiraachaa jira yoo taʼe, jireenya isaa Waaqayyoof murteessuu fi cuuphamuu dandaʼa.—Qolosaayis 1:9, 10.a

CAALAATTI BARADHU

4. Cuuphaa Yesuus irraa barumsa argannu qabna

Cuuphaa Yesuus ilaalchisee odeeffannoo dabalataa argachuuf Maatewos 3:13-17 dubbisaa. Achiis gaaffiiwwan kanneen irratti mariʼadhaa:

• Yesuus yeroo cuuphametti mucaa xinnoo turee?

• Yesuus kan cuuphame akkamitti? Bishaan itti facaafamuudhaan cuuphamee?

Yesuus hojii addaa Waaqayyo lafa irratti isaaf kenne hojjechuu kan jalqabe erga cuuphamee booda dha. Luqaas 3:21-23 fi Yohaannis 6:38 dubbisaa, achiis gaaffii kana irratti mariʼadhaa:

• Yesuus erga cuuphamee booda hojii isa kamiif dursa kenne?

5. Cuuphaan galma bira gaʼuu dandeessu dha

Of murteessuu fi cuuphamuuf yaaduun jalqaba irratti ulfaataa fakkaachuu dandaʼa. Haa taʼu malee, waaʼee Yihowaa barachuu kee yoo itti fuftee fi isa beekaa yoo deemte, murtoo barbaachisaa taʼe kana gochuuf caalaatti amanannaa qabaachuu dandeessa. Namoota murtoo akkasii irra gaʼan tokko tokko ilaaluuf, VIIDIYICHA taphachiisaa.

VIIDIYOO: Yihowaa Wajjin Michummaa Uumuu (1:11)

Yohaannis 17:3 fi Yaaqoob 1:5 dubbisaa, achiis gaaffii kana irratti mariʼadhaa:

• Wanti namni tokko cuuphamuuf qophaaʼaa akka taʼu isa gargaaru maali dha?

1. Bara baraaf Yihowaa tajaajiluu akka barbaannu isatti himuudhaan isaaf of murteessina

2. Yommuu cuuphamnu Waaqayyoof akka of murteessine namootatti argisiisna

6. Miseensa maatii Yihowaa taʼuuf cuuphamuun barbaachisaa dha

Yeroo cuuphamnutti miseensa maatii addunyaa maratti tokkummaa qabu tokkoo taana. Bakkaa fi akkaataa guddinaa garaa garaa keessaa kan dhufne taanus, wanti itti amannuu fi ulaagaaleen naamusaa hordofnu tokko dha. Faarfannaa 25:14 fi 1 Pheexiros 2:17 dubbisaa, achiis gaaffii kana irratti mariʼadhaa:

• Akka caqasoota kanaatti, namni tokko cuuphamuun isaa kan isa fayyadu akkamitti?

MAAL BARATTE?

Yesuus Kiristiyaanonni cuuphamuun isaanii barbaachisaa akka taʼe barsiiseera. Namni tokko galma kana irra gaʼuuf amantii Yihowaa irratti qabu cimsachuu, ulaagaalee isaa wajjin wal simee jiraachuu fi isaaf of murteessuu qaba.

Irra Deebii

• Cuuphaan akkamitti raawwatamuu qaba? Barbaachisaa kan taʼe hoo maaliifi?

• Namni tokko cuuphamuun isaa maal argisiisa?

• Namni tokko of murteessee cuuphamuu isaa dura maal gochuutu isa barbaachisa?

QORANNOO DABALATAA GODHI

Cuuphaan maal jechuu akka taʼee fi maal jechuu akka hin taane baradhu.

“Cuuphaan Maali Dha?” (Mata duree jw.org irratti baʼe)

Namni tokko jijjiirama godhee cuuphamuu kan dandaʼu akkamitti akka taʼe dubbisi.

“Jaalalli Yihowaadhaaf Qabdan Cuuphamuuf Isin Kakaasa” (Masaraa Eegumsaa, Bitootessa 2020)

Namni tokko cuuphamuuf murteessuu kan qabu miiraan kakaʼee qofa akka hin taane hubadhu.

“Dhugaa Isaa Ofuma Kootii Akkan Mirkaneeffadhu Barbaadu Turan” (Mata duree Masaraa Eegumsaa irratti ba’e)

Cuuphamuun kee faayidaa hedduu kan siif argamsiisu maaliif akka taʼee fi cuuphamuuf qophaaʼuu kan dandeessu akkamitti akka taʼe ilaali.

“Cuuphamuun Qabaa?” (Gaaffilee Dargaggootaa fi Deebii Isaaniif Kenname Jildii 2, boqonnaa 37)