Dubartoonni kun bakka awwaalaa duwwaa taʼe yommuu argan baayʼee naʼanii taʼuu qaba! Maariyaam Magdalaan, gara “Simoon Pheexirosii fi barataa kan biraa isa Yesuus jaallatu[utti]” fiigde. Barataan kun Yohaannis ergamaa dha. (Yohaannis 20:2) Taʼus, dubartoonni gara biraan bakka awwaalaa kana jiran maleekaa tokko argan. Bakka awwaalaa kana keessa immoo maleekaa “uffata adii uffate” gara biraatu jira.—Maarqos 16:5.

Amma Maariyaam, Pheexirosii fi Yohaannisiin argite. Arganaa, “Gooftaa awwaalcha keessaa fudhataniiru; eessa akka isa kaaʼanis hin beeknu” isaaniin jette. (Yohaannis 20:2) Pheexirosii fi Yohaannis fiiguu jalqaban. Yohaannis Pheexiros caalaa saffisa waan qabuuf dursee bakka awwaalichaa gaʼe. Gad jedhee achi keessa yommuu ilaalu kafana qofa arge; garuu keessa hin seenne.

Pheexiros akkuma achi gaʼeen awwaalicha keessa seene. Uffata quncee talbaa irraa hojjetamee fi huccuu mataa Yesuusitti maramee ture arge. Yohaannisis bakka awwaalichaatti ol seenee erga ilaalee booda wanta Maariyaam dubbatte amane. Yesuus kanaan dura isaanitti himee kan ture taʼus, isaan keessaa namni akka inni duʼaa kaʼe hubate hin jiru. (Maatewos 16:21) Wanti taʼe kun dalga isaanitti taʼaa gara manaatti deebiʼan. Maariyaam ishiin bakka awwaalaatti deebite garuu achumatti hafte.