LAAYIBRARII INTARNEETIIRRAA

“Falmii Ani . . . Dhiheeffadhu Dhaggeeffadhaa”

Waaʼee Mootummaa Waaqayyoo ‘Guutummaatti Dhugaa Baʼuu’
- 11. Jaarsoliin Phaawulosiif qajeelfama akkamii kennan? Qajeelfama kana hojiirra oolchuunoo maalfaa dabalata? (Miiljalees ilaali.)
  
  ¹¹ Oduun Yihudoonni Phaawulosiin ilaalchisee dhagaʼan soba taʼus, isaan jeeqee ture. Kanaafuu, jaarsoliin Phaawulosiif qajeelfama akkas jedhu kennan: “Namoonni wareega qaban afur nu bira jiru. Namoota kana fudhadhuu dhaqiitii akka Seerichaatti isaanii wajjin of qulqulleessi; mataa isaanii akka haaddataniifis baasii isaanii isaaniif kaffali. Akkana yoo goote, oduun waaʼee kee odeeffame soba taʼuu isaa fi atis Seericha eegdee karaa sirrii taʼeen deddeebiʼaa akka jirtu hundi isaanii ni beeku.”c—HoE. 21:23, 24.
  
  12. Phaawulos jaarsolii deggeruuf fedhii akka qabu kan argisiise akkamitti?
  
  ¹² Phaawulos, rakkinni inni guddaan oduu sobaa waaʼeesaa dubbatame utuu hin taʼin, hinaaffaa Kiristiyaanonni Yihudoota taʼan Seera Museetiif qaban akka taʼe isaanitti dubbachuu dandaʼa ture. Haataʼu malee, ulaagaa Waaqayyo baase hamma hin cabsinetti akka haalasaatti jijjiirama gochuuf fedhii qaba ture. Kanaan dura akkas jedhee barreesseera: “Ani yoon seera jala taʼuu baadhe illee, warra seera jala jiran gargaaruuf, warra seera jala jiraniif akka nama seera jala jiruun taʼe.” (1 Qor. 9:20) Kanaaf, bakka kanatti Phaawulos jaarsolii Yerusaalemiif ajajamuudhaan, “akka nama seera jala jiruu” taʼeera. Wanti Phaawulos godhe kun, nutis yeroo harʼaatti jaarsolii deggeruu fi wanta taʼe tokko karaa nuti barbaannuun akka hojjetan dhiibbaa isaanirratti gochuu akka hin qabne nu barsiisa.—Ibr. 13:17.
  
  Phaawulos seerri Kitaaba Qulqulluu hamma hin cabnetti yaada isaa ni jijjiira ture. Atoo?
  
  SEERA ROOMAA FI LAMMIILEE ROOMAA
  
  Abbootiin taayitaa mootummaa Roomaa yeroo baayʼee dhimma bulchiinsa naannoo ilaallatu keessa hin seenan. Akka walii galaatti Yihudoonni seera mataasaaniitiin geggeeffamu. Dhimma Phaawulos keessa kan seenan jeequmsi yeroo inni mana qulqullummaa dhaqetti kaʼe nagaa magaalattii balaadhaaf waan saaxileef ture.
  
  Bulchitoonni Roomaa namoota lammummaa Roomaa hin qabnerratti aangoo guddaa qabu. Namoota lammummaa Roomaa qabanirratti garuu aangoo akkasii hin qaban.f Namni lammii Roomaa taʼe tokko mirgoota adda addaa guutummaa bulchiinsa Roomaa keessatti hojiirra oolan argata. Fakkeenyaaf lammii Roomaa yakki itti hin murtoofne tokko hidhuun ykn reebuun seeraan aladha; gochi akkasii garboota qofarratti raawwatama ture. Akkasumas, lammiin Roomaa tokko murtoo bulchaan naannoo godhe mormuudhaan gara mootii mootota Roomaatti ol iyyachuu dandaʼa.
  
  Lammummaa Roomaa karaa hedduu argachuun ni dandaʼama. Inni jalqabaa dhaalaani. Darbee darbeemmoo, mootiin mootota Roomaa tajaajila namni tokko raawwateef ykn tajaajila namoonni magaalaa ykn koonyaa tokko keessa jiranii fi bilisa taʼan raawwataniif akka badhaasaatti lammummaa kennuu dandaʼa. Garbi lammii Roomaa tokkorraa bilisummaa isaa bitate, garbi lammii Roomaa tokkoon bilisa baʼe, ykn namni kanaan dura loltuu Roomaa turee fi yeroo booda raayyaa waraanaa keessaa baʼes lammii Roomaa taʼa. Haala tokko tokko keessattimmoo, lammummaa Roomaa bitachuun ni dandaʼama. Ajajaan waraanaa Qalaawudewos Liisiyas jedhamu Phaawulosiin, “Ani mirga lammummaa kana maallaqa hedduudhaanan bitadhe” kan jedhe kanaaf ture. Phaawulosis deebisee “Ani garuu dhalootaanan argadhe” isaan jedhe. (HoE. 22:28) Kanaafuu, akkamitti akka argatan beekuu baannus, abbootii Phaawulos keessaa tokkoon isaanii lammii Roomaa turan jechuudha.
  
  f Dhaloota Kiristoos booda jaarraa jalqabaatti Yihudaa keessa namoonni lammii Roomaa taʼan hedduun hin jiran turan. Jiraattota naannoowwan bulchiinsa Roomaa keessa jiran hundaaf lammummaan Roomaa kan kenname jaarraa sadaffaa keessa ture.

“Falmii Ani . . . Dhiheeffadhu Dhaggeeffadhaa”

Waaʼee Mootummaa Waaqayyoo ‘Guutummaatti Dhugaa Baʼuu’
- c Hayyoonni namoonni arfan Phaawulosii wajjin turan Naaziroota taʼuuf wareeganii akka turan dubbatu. (Lak. 6:1-21) Dhugaadha, Seerri Musee inni wareega akkasii wareeguu jajjabeessu hafeera. Phaawulos dhiironni kun wareega Yihowaadhaaf wareegan raawwachuun isaanii dogoggora akka hin qabne yaadee taʼuu dandaʼa. Kanaafuu, baasiisaanii isaaniif kaffaluun isaa fi bakka sana isaan faana dhaquunsaa dogoggora hin qabu. Wareegni isaan wareegan maal akka taʼe hin beeknu. Kanas taʼe sana, namoonni kun akkuma Naaziroonni gochaa turan cubbuu isaaniirraa qulqullaaʼuuf aarsaa horii dhiheessaniiru yoo taʼe, Phaawulos gocha isaanii kana akka hin deggerre beekamaadha. Aarsaan Kiristoos inni mudaa hin qabne aarsaawwan horii dhiifama cubbuu argachuuf dhihaachaa turan hunda hambiseera. Wanti inni godhe maaliyyuu yoo taʼe Phaawulos wanta qalbiisaa jeequ akkamiiyyuu raawwachuuf akka walii hin galle mirkanaaʼoo taʼuu ni dandeenya.