Miilfoordi Saawundi
BIYYOOTAA FI UUMMATA
Niiwu Ziilaandiin haa Daawwannu
GOSONNI Maawurii kiiloo meetira kumaan lakkaaʼamu garba irra qaxxaamuranii, Niiwu Ziilaandi kan qubatan gara waggaa 800 dura taʼuu hin oolu. Achitti taaʼumsa lafaa odoolawwan Polineezyiyaa warra hoʼa qabanii fi isaan dhiisanii dhufan irraa guutummaatti adda taʼe argatan. Biyyi kun bakka tulluun, tuullaan cabbii, burqituun danfaa fi roobni cabbii itti baayʼatu dha. Gara jaarraa shanii booda immoo, namoonni sanyii biraa Awurooppaa keessaa iddoo fagoo taʼee dhufanii achi buufatan. Yeroo harʼaa namoonni Niiwu Ziilaandii hedduun aadaawwan warra Angiloo-Saaksanii fi Poolineezyiyaa irraa maddan qabu. Uummata ishii keessaa gara dhibbeentaa 90 kan taʼan magaalaa keessa jiraatu. Magaalaan Weelingitan addunyaa keessatti magaalaa guddoo kibba fagootti argamtu dha.
Kuufama dhoqqee danfuu fi Odoola Kaabaatti argamu
Niiwu Ziilaandi wantoota garaagaraa baayʼee babbareedan waan qabduuf, fagaattee kan jirtu taʼus waggaatti tuuristoonni miliyoona sadii taʼan kan ishii daawwatan taʼuun isaa nama hin dinqisiisu.
Gosa mukaa kaarroo (fern) meetii fakkaatuu fi hamma meetira 10tti dheerachuu dandaʼu
Hamma 1948tti gosti simbirroo taakaahee jedhamtuu fi balaliʼuu hin dandeenye baddee akka turte yaadama ture
Niiwu Ziilaandi bineensota bosonaa adda addaa kan qabdu siʼa taʼu, biyyoota kam iyyuu caalaa gosoota simbirroo balaliʼuu hin dandeenye hedduu qabdi. Reptaayiliin loccuu fakkaatuu fi Tuwaataaraa jedhamu hamma waggaa 100 jiraatus achitti ni argama. Hoosiftoonni naannoo kana qofatti argaman, gosoota simbira halkanii muraasaa fi hoosiftoota guguddaa bishaan keessaa kan akka weelii fi dolfinii dha.
Dhugaa Baatonni Yihowaa gara waggaa 120tiif Niiwu Ziilaandi keessatti lallabaa turaniiru. Afaanota Poolineezyiyaa kan taʼan Niiyuuʼan, Raarotongaa, Saamoʼaa fi Toongaan dabalatee, yoo xinnaate afaan 19n Kitaaba Qulqulluu barsiisu.
Namoonni Maawurii uffata aadaa uffatanii sirba aadaa yommuu sirban