Teknoolojiin Dhiibbaa Akkamii Qaba? Gaaʼela Kee Irratti
Hiriyoonni gaaʼelaa teknoolojiitti karaa sirrii taʼeen kan fayyadaman taanaan caalaatti walitti dhihaachuuf isaan gargaara. Fakkeenyaaf, utuma iddoo adda addaa jiranii yeroo baayʼee wal arguuf isaan gargaara.
Haa taʼu malee, hiriyoonni gaaʼelaa tokko tokko teknoolojiitti karaa sirrii hin taaneen waan fayyadamaniif . . .
yeroo waliin dabarsan jalaa saama.
utuu hin barbaachisin hojii manatti akka fidan godha.
akka wal shakkan ykn waliif amanamoo akka hin taane godha.
WANTA BEEKUU QABDU
YEROO WALIIN DABARSUU
Abbaan manaa Mikaaʼel jedhamu, “Yeroo tokko tokko haati manaa koo utuma waliin jirruu akkuma waan na bira hin jirree taati. Yeroo dheeraadhaaf bilbila ishii ilaaluudhaan dabarsiti; garuu, ‘Hamma yoonaatti wanta sana hojjechuuf yeroo hin arganne’ naan jetti” jedheera. Abbaan manaa Jonaataan jedhamu, “hiriyoonni gaaʼelaa haala akkasii keessa jiran qaamaan wal bira kan jiran taʼus, akkuma waan baayʼee wal irraa fagaatanii jiraatanii” akka taʼan dubbateera.
MEE YAADI: Yeroo baayʼee bilbilli ykn ergaan barreeffamaa hiriyaa gaaʼelaa kee wajjin yeroo gaarii akka hin dabarsine gufuu ni taʼa?—EFESOON 5:33.
HOJII
Namoonni tokko tokko hojii yeroo mana jiranitti illee bilbila bilbilamuuf ykn iimeelii ergamuuf deebii akka kennan isaan dirqisiisu qabu. Namoonni tokko tokko immoo, hojiin isaanii akkas akka godhan kan isaan hin dirqisiisne taʼus, hojii isaanii bakka hojiitti dhiisanii dhufuun isaan rakkisa. Abbaan manaa Lii jedhamu, “Yeroon haadha manaa koo wajjin dabarsuuf murteessetti bilbila bakka hojiitii naaf bilbilamu ykn ergaa ergamu hundumaa deebisuu dhiisuun baayʼee na rakkisa” jechuudhaan ifatti dubbateera. Haati manaa Jooy jedhamtu immoo, “Kanan hojjedhu mana taaʼee waan taʼeef, hojii koo yoom dhaabuu akkan qabu beekuun na rakkisa. Madaallii eeguun carraaqqii gochuu gaafata” jetteetti.
MEE YAADI: Hiriyaan gaaʼelaa kee yeroo haasaʼu ykn haasoftu xiyyeeffannaa guutuu ni kennitaafii?—LUQAAS 8:18.
AMANAMUMMAA
Qorannaan tokko akka argisiisetti, wanti yeroo baayʼee hiriyoonni gaaʼelaa akka walitti buʼan godhu akkaataa weebsaayitii hawaasaa itti fayyadamani dha. Namoota qorannaan irratti geggeeffame keessaa dhibbeentaa kudhan kan taʼan, wantoota intarneetii irratti baasan hiriyaa gaaʼelaa isaanii akka dhoksan ifatti dubbataniiru.
Namoonni hedduun weebsaayitiin hawaasaa gaaʼela miidhuu, akkasumas hiriyoonni gaaʼelaa ejja raawwachuun akka isaanitti salphatu gochuu illee akka dandaʼu ni amanu. Namoonni wal hiikuu irratti abukaatoo taʼanii hojjetan, yeroo harʼaatti weebsaayitiin hawaasaa gaaʼelli hedduun akka diigamu gochuu irratti shoora guddaa akka taphatu dubbachuun isaanii nama hin dinqisiisu.
MEE YAADI: Walitti dhufeenya nama saala faallaa taʼe tokkoo wajjin qabdu hiriyaa gaaʼelaa kee ni dhoksitaa?—FAKKEENYA 4:23.
WANTA GOCHUU DANDEESSU
WANTOOTA DURSA KENNITUUF ADDA BAAFADHU
Namni nyaata lagate fayya buleessa taʼuu hin dandaʼu. Haaluma wal fakkaatun, namni hiriyaa gaaʼelaa isaa wajjin yeroo dabarsuu dagates gaaʼela gaarii qabaachuu hin dandaʼu.—Efesoon 5:28, 29.
QAJEELFAMA KITAABA QULQULLUU: “Wantoota caalaatti barbaachisoo taʼan adda [baasaa beekaa].”—FILIPHISIYUS 1:10.
Wantoota akka irratti hojjettan barbaaddu irratti mariʼadhaa ykn teknoolojiin gaaʼela kee irratti dhiibbaa akka hin goonee of eeguuf wanta gochuu yaadde barreeffadhu.
Yoo xinnaate guyyaatti al tokko waliin nyaachuu
Yeroo meeshaalee elektiroonikii itti hin fayyadamne qabaachuu
Sagantaa waliin taatanii yeroo addaa itti dabarsitan baafachuu
Saʼaatii hirribaatti bilbila cufuudhaan of biraa fageessuu
Meeshaalee elektirooniikiitiin xiyyeeffannaan keessan utuu hin hihiramin guyyaatti daqiiqaa 15f haasaʼuu
Guyyaa hundumaa yeroo murtaaʼeef intarneetii fayyadamuu dhiisuu