“Garaan Keenya Yeroo Kam Iyyuu Caalaa Hinaaffaa fi Jaalalaan Guutamee Ture”

JIMAATA ganama, Fulbaana 1922 namoonni 8,000 galma walgaʼii guddaa tokko keessatti walitti qabamanii kan turan siʼa taʼan, hoʼi isaa caalaatti dabalaa jira. Dura taaʼaan walgaʼichaa sagantaa bakka guddaa qabu kana irratti, namni barbaade galmicha keessaa baʼuu akka dandaʼu, yoo baʼe garuu deebiʼee ol seenuu akka hin dandeenye beeksisa dubbate.

Walgaʼichi jalqabamuu isaa dura faarfannaawwan hedduun erga faarfatamanii booda, obboleessi keenya Joseef Raazarfordi waltajjii irra baʼe. Dhaggeeffattoonni hedduun taaʼanii hawwiidhaan eeggachaa jiru. Muraasni isaanii immoo sababii hoʼaatiin asii fi achi deemaa jiru. Obboleessi haasaa dhiheessu taaʼanii akka dhaggeeffatan cimsee akeekkachiise. Utuu haasaan dhihaachaa jiruu, huccuu guddaan olitti maramee fannifame jiraachuu isaa namni hubatee ture jira laata?

Obboleessi keenya Raazarfordi haasaa mata duree “Mootummaan samii dhihaateera” jedhu qabu dhiheesse. Saʼaatii tokkoo fi walakkaadhaaf, raajonni bara durii waaʼee Mootummaa Waaqayyoo isa dhufaa jiruu ija jabinaan akkamitti labsaa akka turan kan ibse siʼa taʼu, sagaleen isaa inni furdaan galmicha keessatti guddisee dhagaʼama ture. Xumura haasaa isaa irra yommuu gaʼu, “Mootiin ulfinaa bulchuu akka jalqabe ni amantuu?” jedhee gaafate. Dhaggeeffattoonni sagalee guddaadhaan “Eeyyee!” jedhanii deebisan.

Obboleessi keenya Raazarfordi sagalee guddaadhaan itti fufee akkana jedhe: “Egaa, yaa ilmaan Waaqayyo isa hundumaa gararraa jiruu, gara maasichaatti deebiʼaa! Kunoo, Mootichi bulchuu jalqabeera! Isin immoo labsitoota isaa ti. Kanaaf, Mootichaa fi Mootummaa isaa beeksisaa, beeksisaa, beeksisaa.”

Yeroo kanatti, huccuu guddaan olitti maramee fannifamee ture sun yommuu diriirfamu, dhaadannoo “Mootichaa fi Mootummaa isaa beeksisaa” jedhu kan qabate taʼuun isaa ni beekame.

Obboleessi keenya Raa Boop jedhamu wanta yeroo sana ture yaadachuudhaan, “Dhaggeeffattoonni baayʼee gammadanii turan” jedheera. Obboleettiin Aanaa Gaardinar jedhamtu immoo, “yommuu harka walitti rukunnu keenyan galmichaa ni raafame” jechuudhaan dubbatteetti. Fireed Tiwaarooshis, “Dhaggeeffattoonni hundi tokkummaadhaan ol kaʼanii dhaabatan” jedheera. Iivaanjeloos Iskuufaas immoo, “Waanuma humni guddaan tokko teessoo keenya irraa harkisee nu kaasaa jiru fakkaata ture; hundi keenya kan ol kaane siʼa taʼu, iji keenyas imimmaaniin guutamee ture” jedheera.

Namoonni walgaʼii guddaa sana irratti argaman hedduun durumaan iyyuu misiraachoo Mootummichaa lallabaa turan. Walgaʼii sana booda garuu, misiraachicha akka haaraatti lallabuuf galma baafachuu akka qaban isaanitti dhagaʼame. Eetal Beenakoof, “garaan keenya yeroo kam iyyuu caalaa hinaaffaa fi jaalalaan guutamee ture” jechuudhaan, miira yeroo achii deebiʼan Barattoota Kitaaba Qulqulluutti dhagaʼamee ture dubbatteetti. Oodeesaa Taak, ishiin yeroo sanatti umuriin ishii waggaa 18 ture, yommuu walgaʼii guddaa kanaa deebitu waamicha “Eenyuutu deema?” jedhuudhaan dhihaateef deebii kennuuf kutattee turte. Akkana jetteetti: “Eessa ykn maal ykn akkamitti akkan lallabu hin beekun ture. Wanti ani beeku tokko yoo jiraate akkuma Isaayaas, ‘Kunoo, ani jira, ana ergi!’ jechuu barbaaduu koo ti.” (Isa. 6:8) Raalfi Leefilar, “Duulli Mootummicha beeksisuu yeroo harʼaatti addunyaa maratti taasifamaa jiru sirriitti kan jalqabame guyyaa gammachiisaa sanatti ture” jedheera.

Walgaʼii guddaan Seedaar Pooyinti Ohaayootti bara 1922⁠tti godhame kun, seenaa tiʼookraasii keessatti iddoo guddaa kan qabu taʼuun isaa kan nama dinqisiisu miti. Obboleessi keenya Joorji Gaangaas, “Walgaʼiin guddaan kun walgaʼii akkasii kam irraa iyyuu matumaa akka hin hafne fedhii akkan qabaadhu na taasiseera “ jedheera. Hamma yaadatuttis walgaʼii akkasii irraa matumaa hafee hin beeku. Juuliyaa Wiilkooksi akkana jechuudhaan barreessiteetti: “Barreeffamoota keenya irratti waaʼee walgaʼii bara 1922⁠tti Seedaar Pooyinti Ohaayootti godhamee ture yommuun dubbisu hundatti gammachuu guddaatu natti dhagaʼama. Yeroo hunda, ‘Yaa Yihowaa, walgaʼii kana irratti akkan argamu waan naa heyyamteef, sin galateeffadha’ jechuun barbaada.”

Haaluma walfakkaatuun, yeroo harʼaatti baayʼeen keenya walgaʼii guddaa keessumaa jaalalaa fi hinaaffaa Waaqa keenya isa guddaadhaa fi Mootii inni muudeef qabnu akka guddatu, akkasumas garaan keenya gammachuudhaan akka guutamu godhe ni yaadanna taʼa. Wanta gammachiisaa yaadannu akkasii irratti yommuu xiinxallu, nutis, “Yaa Yihowaa, walgaʼii kana irratti akkan argamu waan naa heyyamteef, sin galateeffadha” jechuuf kakaana.