Eebba Namoonni Warra Rakkatan Gargaaran Argatan

Namoonni addunyaa maratti argaman hedduun nyaataa fi mana jireenyaa argachuun isaan barbaachisa. Tokko tokko immoo kan isaan barbaachisu abdii qofa dha. Carraaqqiin nuti namoota akkasii gargaaruuf goonu surraa fi eebba Waaqayyoo kan nuuf argamsiisu akkamitti?

WANTA KITAABNI QULQULLUUN JEDHU

“Namni hiyyeessaaf garaa laafu akka waan Waaqayyoof liqeessuu ti; Waaqayyos gatii isaa isaaf in deebisa.”—FAKKEENYA 19:17.

NAMA RAKKATE GARGAARUU JECHUUN MAAL JECHUU DHA?

Yesuus fakkeenya waaʼee nama saamtotaan haleelamee duʼaa fi jireenya gidduutti dhiifame tokkoo ibsu dubbatee ture. (Luqaas 10:29-37) Achiis namni gara laafessi tokko kan isa hin beekne taʼu illee, isatti goree nama garmalee madaaʼe kanaaf kunuunsa godhe. Namichi kun sanyiin isaa kan namichaa kanaa irraa adda taʼus kana godheera.

Namichi gaarummaa qabu kun nama madaaʼe kanaaf gargaarsa sadarkaa jalqabaa fi wanta barbaachisu gochuu qofa utuu hin taʼin, isa jajjabeessuudhaan, dhiphina isaa irraa akka bayyaannatu isa gargaareera.

Fakkeenya kana irraa maal baranna? Yesuus karaa dandeenyu kamiin iyyuu namoota rakkatan gargaaruu akka qabnu argisiiseera. (Fakkeenya 14:31) Kitaabni Qulqulluun, Waaqayyo dhiheenyatti hiyyummaa fi rakkina akka balleessu barsiisa. Taʼus, ‘Waaqayyo kana kan godhu akkamittii fi yoomi?’ jennee gaafanna taʼa. Mata dureen armaan gadii eebbawwan Uumaan kee inni jaalala qabeessa taʼe siif qopheesse ibsa.