Amantii Qabdaa?

Yihowaa gammachiisuuf amantii qabaachuu qabna. Taʼus, Kitaabni Qulqulluun, “Amantiin wanta namni hundi qabu miti” jedha. (2 Tas. 3:2) Phaawulos ergamaan yaada kana kan caqase yeroo waaʼee “namoota miidhaa geessisanii fi hamoo” taʼanii dubbatettidha; namoonni kun ariʼatama isarraan geessisaa turan. Yaanni amantii ilaalchisee dubbate garuu namoota hedduu kan argisiisudha. Namoonni tokko tokko ragaa ifa taʼee fi Uumaan akka jiru argisiisu fudhachuu didu. (Rom. 1:20) Warri kaanimmoo wanti ykn qaamni humna guddaa qabu tokko jiraachuusaa akka amanan dubbatu taʼa. Yihowaa gammachiisuuf garuu amantiin hammanaa qofti gaʼaa miti.

Yihowaan akka jiruu fi namoota amantii cimaa qaban akka eebbisu mirkanaaʼoo taʼuu qabna. (Ibr. 11:6) Amantiin kutaa firii hafuurasaati. Yihowaatti kadhannaa dhiheessuun hafuura qulqulluu argachuuf nu gargaara. (Luq. 11:9, 10, 13) Karaa gaariin hafuura qulqulluu argachuuf nu gargaaru Dubbii Waaqayyoo isa geggeessaa hafuurasaatiin barreeffame dubbisuudha. Achiis wanta dubbisnerratti yaaduu fi wanta baranne hojiirra oolchuuf yaaluu dandeenya. Yoo akkas goone, hafuurri Yihowaa jireenya keenyarratti dhiibbaa gochuudhaan amantii isa gammachiisu horachuuf akka nu gargaaru heyyamuu dandeenya.