ФӔСИВӔДЫ ФАРСТАТӔ
Ме ’мгӕрттӕй мын исчи ӕмуат ӕрцӕуыны тыххӕй куы дзура, уӕд мын «нӕ» зӕгъынӕн цы баххуыс кӕндзӕн?
«Скъолайы куы ахуыр кодтон, уӕд-иу исчи куы радзырдта, кӕимӕдӕр ӕмуат кӕй ӕрцыд, уӕд-иу иннӕтӕ дӕр стынг сты, уымӕн ӕмӕ фӕстейӕ баззайын никӕй фӕндыд. Кӕй фӕнды, цӕмӕй йыл иннӕтӕ худой?» (Элейн, 21 азы).
Искуы ӕфсӕрмы кодтай, ӕмуат кӕй никӕимӕ ’рцыдтӕ, уымӕй, уымӕн ӕмӕ дӕм афтӕ кӕсы, ӕмӕ ӕрмӕст ды дӕ ахӕм?
Искуы дын, кӕй уарзыс, уыцы адӕймаг дзырдта, мемӕ ӕмуат ӕрцу, зӕгъгӕ?
Ацы статья дын баххуыс кӕндзӕн раст уынаффӕ рахӕссынӕн, исчи дын куы дзура, цӕмӕй йемӕ ӕмуат ӕрцӕуай кӕнӕ дӕхи искӕимӕ ӕмуат ӕрцӕуын куы фӕнда, уӕд.
Рӕдыд хъуыдытӕ ӕмӕ хабар ӕцӕгӕй куыд у
РӔДЫД ХЪУЫДЫ. Ме ’мгӕрттӕй, кӕимӕдӕр ӕмуат чи не ’рцыд, иу ахӕм дӕр нӕй (мӕн йеддӕмӕ).
ХАБАР ӔЦӔГӔЙ КУЫД У. Иртасджытӕ куыд сбӕрӕг кодтой, афтӕмӕй, 18 азы кӕуыл цӕуы, уыцы ӕрыгӕттӕй алы ӕртӕйӕ дӕр дыууӕ кӕимӕдӕр ӕмуат ӕрцыдысты. Фӕлӕ уый ууыл дзурӕг у, ӕмӕ, ӕмуат чи нӕма ӕрцыд, уыдон дӕр гыццыл не сты – 30 процентӕй фылдӕр. Уӕдӕ афтӕ зӕгъӕн нӕй, ӕмӕ се ’ппӕт дӕр искӕимӕ ӕмуат ӕрцӕуынц.
РӔДЫД ХЪУЫДЫ. Ӕмуат куы ’рцӕуӕм, уӕд кӕрӕдзи тынгдӕр уарздзыстӕм.
ХАБАР ӔЦӔГӔЙ КУЫД У. Афтӕ фӕдзурынц иуӕй-иу лӕппутӕ, цӕмӕй чызгимӕ ӕмуат ӕрцӕуой. Фӕлӕ уый афтӕ нӕу. Арӕхдӕр, лӕппу чызгимӕ ӕмуат куы ’рцӕуы, уӕд ӕй ныууадзы. Уый чызгӕн йӕ зӕрдӕ скъахы, уымӕн ӕмӕ афтӕ фӕхъуыды кӕны, ӕмӕ йӕ лӕппу уарзы кӕнӕ та йӕ зӕрдӕмӕ цӕуыa.
РӔДЫД ХЪУЫДЫ. Библимӕ гӕсгӕ нӕлгоймаг ӕмӕ сылгоймагӕн уый бар нӕй, цӕмӕй-иу ӕмуат ӕрцӕуой.
ХАБАР ӔЦӔГӔЙ КУЫД У. Библийы фыст ис, нӕлгоймаг ӕмӕ сылгоймаг ӕмуат кӕй ӕрцӕуынц, уым ӕвзӕрӕй кӕй ницы ис. Фӕлӕ ӕмуат ӕрцӕуӕн ис, лӕг ӕмӕ ус чи сты, ӕрмӕстдӕр уыдонӕн (Райдиан 1:28; 1 Коринфӕгтӕм 7:3).
РӔДЫД ХЪУЫДЫ. Библимӕ гӕсгӕ куы цӕрон, уӕд мӕ цард ӕнкъард уыдзӕн.
ХАБАР ӔЦӔГӔЙ КУЫД У. Бинонтӕ скӕныны размӕ ӕмуат куы никӕимӕ ’рцӕуай, уӕд амондджындӕр уыдзынӕ, уымӕн ӕмӕ дӕхи бахиздзынӕ ӕнӕхъуаджы мастӕй, фӕсмон ницӕуыл кӕндзынӕ, стӕй ӕндӕр зындзинӕдтӕй дӕр хызт уыдзынӕ.
Цавӕр хатдзӕг ис скӕнӕн. Ус ракурыны кӕнӕ чындзы ацӕуыны размӕ искӕимӕ ӕмуат чи никуы ’рцыд, уыдонӕй уый зиан никуы никӕмӕн ӕрхаста. Фӕлӕ уымӕй йӕхи чи нӕ бахызта, уыдонӕн та ӕрхаста.
Исчи мын ӕмуат ӕрцӕуыны тыххӕй куы дзура, уӕд мын «нӕ» зӕгъынӕн цы баххуыс кӕндзӕн?
Хъуамӕ фидарӕй зонай, хорз цы у ӕмӕ ӕвзӕр цы у, уый. Библимӕ гӕсгӕ фӕлтӕрд адӕймаг у, «йӕ зондӕй чи архайы ӕмӕ афтӕмӕй йӕ зонд, раст цы у ӕмӕ цы нӕу, уый ӕмбарын чи сахуыр кодта», уый (Дзуттӕгтӕм 5:14). Ахӕм адӕймаг, растыл цы фӕнымайы, ууыл фидар фӕхӕцы, ӕмӕ йӕ ӕнцонтӕй фӕрӕдийын кӕнӕн нӕ вӕййы.
«Ӕз тынг архайын, раст цы у, уый аразыныл, ӕмӕ мын иннӕты раз хорз ном ис. Ӕмӕ искӕй тыххӕй мӕ хорз ном фӕчъизи кӕнынмӕ нӕ хъавын» (Алисия, 16 азы).
Цӕуыл хъӕуы ахъуыды кӕнын. Цавӕр ном дӕ фӕнды скӕнын дӕхицӕн? Искӕй зӕрдӕ балхӕныны тыххӕй хъуамӕ мӕ хорз ном фесафон?
Уый фӕстӕ цы уыдзӕн, ууыл ахъуыды кӕн. Библийы фыст ис: «Адӕймаг цы байтауа, уый ӕркӕрддзӕн» (Галатӕгтӕм 6:7). Ахъуыды кӕн, искӕимӕ ӕмуат куы ’рцӕуай, уӕд уый дӕ цардыл дӕр ӕмӕ иннӕ адӕймаджы цардыл дӕр куыд фӕзындзӕн, ууылb.
«Адӕймаг бинонтӕ скӕныны размӕ искӕимӕ ӕмуат куы ’рцӕуы, уӕд арӕхдӕр ууыл фӕфӕсмон кӕны, худинаг ӕм фӕкӕсы кӕнӕ та йӕм афтӕ фӕкӕсы, ӕмӕ йӕ ничи уарзы. Уый кой нал кӕнын, ӕмӕ чидӕртӕ басывӕрджын вӕййынц кӕнӕ та хӕцгӕ низӕй фӕрынчын вӕййынц» (Сиенӕ, 16 азы).
Цӕуыл хъӕуы ахъуыды кӕнын. Иу чиныджы фыст ис: «Де ’мбӕлттӕ дын, зиан дын чи ’рхӕсдзӕн, ахӕм митӕ куы кӕнын кӕной, уӕд хъуамӕ семӕ дӕ рӕстӕг ӕрвитай кӕнӕ сын сӕ уынаффӕтӕм хъусай?» (Sex Smart).
Ӕмбаргӕ у. Нӕлгоймаг ӕмӕ сылгоймаджы ’хсӕн цы вӕййы, уым ӕвзӕрӕй ницы ис. Библийы фыст ис, лӕг ӕмӕ ус кӕрӕдзийыл кӕй хъуамӕ узӕлой (Ӕмбисӕндтӕ 5:18, 19).
«Нӕлгоймаг ӕмӕ сылгоймаджы ’хсӕн цы вӕййы, уый дӕр Хуыцауы диссаджы лӕвар у. Хуыцауы фӕнды, цӕмӕй нын уый ӕхсызгондзинад хӕсса, фӕлӕ уый тыххӕй скодта бинонтӕ» (Джереми, 17 азы).
Цӕуыл хъӕуы ахъуыды кӕнын. Ус куы ракурай кӕнӕ чындзы куы ацӕуай, уӕд дӕ цардӕмбалимӕ ӕмуат ӕрцӕудзынӕ. Уый дын ӕхсызгондзинад хӕсдзӕн ӕмӕ, уӕлдӕр цы зындзинӕдты кой ракодтам, уыдонӕй хызт уыдзынӕ.
a Кӕй зӕгъын ӕй хъӕуы, алы хатт афтӕ нӕ вӕййы, ӕмӕ лӕппу ныттыххӕй вӕййы чызгыл, цӕмӕй ӕмуат ӕрцӕуой. Арӕх чызджытӕ дӕр фӕдзурынц лӕппутӕн ӕмуат ӕрцӕуыны тыххӕй.
b Уый ӕркӕны бирӕ зындзинӕдтӕм. Зӕгъӕм, гӕнӕн ис, чызг басывӕрджын уа, кӕнӕ, ӕмуат чи ӕрцыд, уыдонӕй иуыл 18 азы куы нӕма цӕуа, уӕд, гӕнӕн ис, иннӕ ахӕстонмӕ дӕр бахауа.