Job

2 ꞌNepu̱ bi zo̱ho̱ näꞌä rä pa nuꞌmu̱ yä tꞌu̱ Äjuä bi yu̱tꞌi pa dä kupa yä luga ndelante de rä Zi Dada Jeoba, ꞌne rä Zithu bi presenta ꞌnehe pa dä kupa rä luga ndelante de rä Zi Dada Jeoba. 2 ꞌNepu̱ rä Zi Dada Jeoba bi ꞌñembäbi rä Zithu: «¿Xi nuꞌi habu̱ xkuä pengi?». Rä Zithu bi ꞌñembäbi Jeoba: «Dä ma dä no̱ke rä xiꞌmhai ꞌne dä ungä nꞌa mä gatꞌi». 3 ꞌNe Jeoba bi ꞌñembäbi rä Zithu: «¿Xkä u̱xä ri da mä ꞌme̱go Job? Joꞌo mä nꞌa nguꞌä ha rä xiꞌmhai. Näꞌä nzäntho pe̱fi näꞌä xä ñho: Pe̱ꞌspäbi nꞌa rä hogä ntsu Äjuä ꞌne di ꞌuege de näꞌä xä ntsꞌo. Mäske nuꞌi gi trata gä nkue̱ kongeꞌä pa gä huati mäske hinte xä yꞌo̱tꞌe, näꞌä hinxä ꞌuengi de Geki. 4 Pe rä Zithu bi ꞌñembäbi Jeoba: «Ngo̱ po ngo̱. Nꞌa rä jäꞌi ma dä mꞌu̱i dispuesto dä uni gatꞌho näꞌä pe̱ꞌtsi kontal dä ñängä rä bida. 5 Pe ndeꞌmu̱, tu̱ngi ri yꞌe̱ kontra geꞌä ꞌne u̱mbäbi rä ndoyꞌo ꞌne rä ngo̱, ꞌne hyandixä mu̱ hingä ma dä zañꞌäꞌi ha ri hmi». 6 Hänge Jeoba bi ꞌñembäbi rä Zithu: «¡Hyandi! Näꞌä o ha ri yꞌe̱. ¡Pe oxki ma gi hñäkuäbi rä te!». 7 Nubye̱, rä Zithu bi bo̱ni de rä thandi rä Zi Dada Jeoba ꞌne bi yꞌe̱mbäbi Job rꞌa yä säsi nuꞌu̱ mi yꞌaa po gatꞌho rä ndoyꞌo, dende rä mhengua asta rä ndehe. 8 ꞌNe Job bi gu̱ nꞌa xe̱ni rä domhi pa bi yꞌextꞌe rä ndoyꞌo, ꞌne bi gohi bi hñudi ha yä ꞌmospi. 9 Pa ri uadi, nubye̱ rä ꞌme̱hñä bi ꞌñembäbi: «¿Tobe xa gi sigi gi uanta ꞌne gi o̱te Äjuä? ¡Tsani Äjuä ꞌne tu de una vez!». 10 Pe Job bi dädi: «Nuꞌi gi ñä ngu nuꞌu̱ yä ꞌme̱hñä otho yä mfeni. Mu̱ de Äjuä xtä hänihu̱ näꞌä xä ñho, ¿hage hingä ma gä hänihu̱ ꞌnehe näꞌä xä ntsꞌo?». Gatꞌho geꞌä bi thogi Job, pe näꞌä hinte mä tsꞌo noya bi mää.