Santiago

2 Zi kuhu̱, nuꞌmu̱ gi ñhanduihu̱ rꞌa nꞌañꞌo yä xuñha ꞌne yä prueba, hyandihu̱ ngu nꞌa rä oportunida pa gi johyahu̱, 3 ngeꞌä nuꞌähu̱ gi pädihu̱ ge ora gi ze̱tihu̱ yä prueba, mänꞌa di ze̱di ri komfiansahu̱ po Äjuä. 4 Pe ze̱tihu̱ gatꞌho näꞌä rä xuñha o näꞌä rä prueba gi hñanduihu̱, pa njabu̱ gi ꞌmu̱ihu̱ xä ñho ante rä thandi Äjuä ꞌne hinhñabu̱ gi fayahu̱. 5 Hänge mu̱ nꞌa de geꞌähu̱ di ꞌme̱ꞌähu̱ rä mfädi; njatꞌä yꞌapäbihu̱ Äjuä ꞌne näꞌä ma dä rꞌaꞌähu̱. Ngeꞌä näꞌä hingi yꞌu̱ya dä uni rä mfädi, ha nixi uni de gä kue̱. 13 Ora tso̱ho̱ nꞌa rä prueba, hinto dä ꞌñenä: «Äjuä huꞌskägi yä prueba». Ngeꞌä ko yä tsꞌo tꞌo̱tꞌe, hinto tsa dä hñuꞌspäbi yä prueba Äjuä, ꞌne näꞌäse̱ hinto huꞌspäbi yä prueba. 14 Pe kada nꞌaa thogise̱ yä prueba nuꞌmu̱ nuꞌu̱ yä nkꞌatꞌi pe̱ꞌtsi geꞌu̱ ju̱tꞌi ꞌne kadi. 15 ꞌNepu̱ xti te näꞌä rä nkꞌatꞌi, po̱ho̱ rä pekado; ꞌne xti tꞌo̱tꞌe näꞌä rä pekado, tsitsꞌi ha rä du. 19 Di ne gi pädihu̱ zi kuhu̱ ge debe mäntꞌä gi mꞌu̱ihu̱ dispuesto pa gi yꞌo̱dehu̱, pe hingä mäntꞌä gi ñähu̱ nixi mäntꞌä gi nkue̱hu̱. 23 Ngeꞌä nuꞌu̱ toꞌo o̱de rä Noya Äjuä ꞌne hingi pe̱fi, näꞌä mähye̱githo ko nꞌa rä jäꞌi näꞌä di yotꞌi rä hmi ha nꞌa rä ñhee. 24 Näꞌä bi yotꞌä ꞌmai, pe mi ma, nguntꞌä bi pumfri te ngu rä ꞌmai. 25 Pe toꞌo di jamäsu näꞌä heti ha näꞌä rä ley di ñängägihu̱ ꞌne o̱tꞌe ntsꞌe̱di po dä me̱fi, näꞌä hingä ho̱nse̱ xä yꞌo̱de, ꞌnehe xä me̱fi; ꞌne ma dä me̱ꞌtsi rä johya. 27 Rä so̱kämbeni näꞌä xä ntꞌaxi ꞌne hinxä ntsꞌoni ante rä thandi Äjuä mä Zi Dadahu, gehnä: gä suhu̱ nuꞌu̱ yä zi hyoya bätsi ꞌne yä biuda nuꞌmu̱ thogi yä xuñha, ꞌne gä ꞌuegehu̱ de nuꞌu̱ yä tsꞌoki ja ha nunä xiꞌmhai.