2 Crónicas

34 Josías mi pe̱ꞌtsi 8 nje̱ya nuꞌmu̱ bi thutsꞌi de gä rey, ꞌne bi mända po 31 nje̱ya ha Jerusalén. 2 Näꞌä bi me̱fi näꞌä xä ñho ante yä da rä Zi Dada Jeoba ꞌne bi ñꞌo ha näꞌä rä ꞌñuu bi ñꞌo David —näꞌä rä bo̱xita—. Himbi ꞌuengi nixi pa ri ñꞌe̱i ha nixi pa ri ngähä. 3 ꞌNe mi zo̱te hñäto nje̱ya de gä rey —nuꞌmu̱ mi nꞌa rä tsꞌu̱ntꞌu̱tho— bi mu̱di bi hyoni näꞌä rä Zi Dada bi xo̱kämbeni David. ꞌNe ha näꞌä rä je̱ya 12 bi mu̱di bi hñäki de Judá ꞌne de Jerusalén nuꞌu̱ yä luga xä ñhetsꞌi ꞌne nuꞌu̱ yä poste ꞌne nuꞌu̱ yä imagen mi xo̱kämbeni yä jäꞌi. 9 Nuꞌu̱ bi ma bä nuu Hilquías —näꞌä rä ndä gä majhä— ꞌne bi umbäbi näꞌä rä bojä xki thä de rä nguu Äjuä. Nuꞌu̱ yä levita mi mpe̱fi de gä nsu goxthi, geꞌu̱ xki muntsꞌi näꞌä rä bojä de Manasés, Efraín, ꞌne de Israel, ꞌne de Judá, Benjamín ꞌne de nuꞌu̱ yä jäꞌi mi ꞌmu̱i ha Jerusalén. 10 ꞌNepu̱ nuꞌu̱ bi gu̱ näꞌä rä bojä ꞌne bi umbäbi nuꞌu̱ xki thutsꞌi pa dä diriji nuꞌu̱ yä ꞌme̱fi ha rä ngu Jeoba. Nubye̱ nuꞌu̱ mi mpe̱fi ha rä ngu Jeoba, bi usa näꞌä rä bojä pa bi hyoki habu̱ xki tsꞌoki. 11 Bi tꞌumbäbi rä bojä nuꞌu̱ yä artesano ꞌne nuꞌu̱ yä me̱fi pa dä dai nuꞌu̱ yä do ya xä ntꞌäꞌtsi, yä zaa ꞌne yä biga pa drä jutsꞌi nuꞌu̱ yä nguu xki yo̱tꞌe, ngeꞌä nuꞌu̱ yä rey de Judá hinte xki me̱fi po dä hyoki. 14 Mientra nuꞌu̱ mi ju̱ki näꞌä rä bojä mi ja ha rä ngu rä Zi Dada Jeoba; rä majhä Hilquías bi zu̱di mi ꞌme̱ꞌtsi näꞌä rä mfistꞌofo de rä Ley Jeoba, näꞌä xki ntregabi rä hnini po mäde de Moisés. 18 Näꞌä rä sekretario mrä thuhu Safán, bi ꞌñembäbi rä rey: «Jaua nunä mfistꞌofo bi dini rä majhä Hilquías». ꞋNepu̱ Safán bi mu̱di bi hñeti pa bi yꞌo̱de rä rey te mi hutsꞌi ha näꞌä mfistꞌofoꞌä. 19 Ora rä rey bi yꞌo̱de näꞌä mi mängä rä Ley, bi tu̱ni rä hee. 20 ꞌNepu̱ rä rey bi mändabi Hilquías, Ahicam —näꞌä rä tꞌu̱ Safán—, Abdón —rä tꞌu̱ Miqueas—, Safán —näꞌä rä sekretario— ꞌne Asaya —näꞌä mrä ꞌme̱go rä rey—: 21 «Gi mahu̱, ꞌne guä ambäbihu̱ rä Zi Dada Jeoba te ne dä mää nunä rä mfistꞌofo gä tinihu̱, ꞌne te ja pa geki ꞌne pa nuꞌu̱ kohi ha rä hnini Israel ꞌne Judá. Porque rä kue̱ rä Zi Dada Jeoba ma dä ꞌñekägihu̱, ngeꞌä nuꞌu̱ mä xitahu̱ himbi yꞌo̱de näꞌä bi mända rä Zi Dada Jeoba ꞌne himbi me̱fi näꞌä hutsꞌi ha nunä mfistꞌofo».